រកឃើញសពខ្លាធំមួយក្បាលក្នុងធុងក្លាសេ នៅវៀតណាម
សាកសពសត្វខ្លាមួយក្បាល ទម្ងន់១៦០គីឡូក្រាម ជាមួយនឹងឆ្នឹងសត្វទម្ងន់៣៤គីឡូក្រាមផ្សេងទៀត ត្រូវបានប្រទះឃើញក្នុងផ្ទះមួយកន្លែង ក្នុងខេត្ត Ha Tinh តំបន់កណ្តាលប្រទេសវៀតណាម កាលពីពេលថ្មីៗនេះ ចេញផ្សាយដោយទីភ្នាក់ងារព័ត៌មាន Vietnamexpress កាលពីចុងសប្តាហ៍។
ប្រភពបន្តថា វត្ថុទាំងនេះត្រូវបានរកឃើញក្នុងទូក្លាសេ របស់បុរសវ័យ៤២ឆ្នាំម្នាក់ ឈ្មោះ Nguyen Van Chung រស់នៅក្នុងស្រុក Huong Son នៃខេត្ត Ha Tinh ។ មន្ត្រីបរិស្ថានក្រុងហាណូយ និងនគរបាលស្រុកបានឆ្មក់បង្ក្រាបករណីនេះ។
ជនសង្ស័យបានរៀបរាប់ថា រូបគេបានជួបអ្នកបើកឡានកុងតឺនឺម្នាក់ នៅភោជនីយដ្ឋានមួយកន្លែង ក្នុងស្រុកខាងលើ កាលពីឆ្នាំមុន ហើយអ្នកបើកបររូបនេះបានចូលមកផ្ទះរបស់ខ្លួន ស្នើសុំរក្សាទុកធុងក្លាសេ ផ្ទុកសត្វ ដោយផ្តល់លុយមួយចំនួន ហើយខ្លួនក៏ទទួលយក។ ប្រមាណ១០ថ្ងៃក្រោយមកនេះ អ្នកបើកបររូបនេះបានទៅផ្ទះខ្លួនម្តងទៀត ជាមួយនឹងធុងក្លាសេមួយទៀត ហើយខ្លួនបានឃើញថា មានសពសត្វខ្លាក្នុងនោះ និងឆ្នឹងសត្វផ្សេងៗទៀត ខ្លួនក៏បដិសេធមិនទទួល ប៉ុន្តែអ្នកបើកបររូបនេះបានផ្តល់ថវិការ ៩លានដុង ឬ ជិត៤០០លានដុល្លារអាមេរិក ខ្លួនក៏ប្តូរចិត្តទទួលវិញ។
សម្រាប់វៀតណាម វាគឺជាអំពើខុសច្បាប់ ក្នុងការប្រមាញ់ សម្លាប់ ចាប់ ដឹកជញ្ជូន ឬ ជួញដូរសត្វព្រៃ ដែលប្រឈមនឹងការជាប់ពន្ធនាគារ ដល់ទៅ១៥ឆ្នាំ និងពិន័យជាប្រាក់ ១៥ពាន់លានដុង ខណៈសត្វខ្លាត្រូវបានចាត់ជាសត្វក្នុងបញ្ជីក្រហមរបស់អង្គការ IUCN៕
