Pacquiao ប្រកាសឈរឈ្មោះធ្វើជាប្រធានាធិបតីហ្វីលីពីន សម្រាប់ការបោះឆ្នោតឆ្នាំ២០២២
លោក Manny Pacquiao ដែលត្រូវបានគេស្គាល់ថា ជាអ្នកប្រដាល់ដ៏ល្បីមួយរូប បានប្រកាសកាលពីថ្ងៃអាទិត្យថា លោកនឹងឈរឈ្មោះជាបេក្ខភាពសម្រាប់តំណែងប្រធានាធិបតីហ្វីលីពីននៅក្នុងការបោះឆ្នោតនៅឆ្នាំ២០២២។
គណបក្សកាន់អំណាច PDP-Labanបក្ខពួកលោក Pacquiao បានរៀបចំសមាជគណបក្សថ្នាក់ជាតិ និងជ្រើសតាំងលោក Pacquiao ធ្វើជាបេក្ខភាពប្រធានាធិបតីរបស់គណបក្សមួយនេះ។
«ខ្ញុំយល់ព្រមទទួលយកការចាត់តាំង ជាបេក្ខភាពប្រធានាធិបតីនៃសាធារណរដ្ឋហ្វីលីពីន។ នេះជាពេលជោគជ័យសម្រាប់អ្នកត្រូវគេជិះជាន់។ នេះជាពេលដែលជាតិទាំងមូលរះចេញពីភាពក្រីក្រ។ នេះជាពេលវេលាសម្រាប់រដ្ឋាភិបាលស្អាតស្អំ»។ នេះជាការលើកឡើងរបស់លោក Pacquiao នៅក្នុងសមាជថ្ងៃអាទិត្យកន្លងទៅ។ ជាមួយគ្នានេះដែរ លោក Pacquiao ក៏បញ្ចេញសារនយោបាយថា មន្ត្រីពុករលួយនានា «នឹងរកផ្លូវចូលគុកនាពេលឆាប់ៗនេះ»។
លោក Pacquiao នៅមិនទាន់រើសយកដៃគូ សម្រាប់ឈរឈ្មោះធ្វើជាបេក្ខភាពអនុប្រធានាធិបតីនៅឡើយទេ។
យ៉ាងណាមិញ ក្នុងគណបក្សដដែល តែបក្ខពួកលោកប្រធានាធិបតី Rodrigo Duterte បានជ្រើសតាំងសមាជិកព្រឹទ្ធសភាលោក Bong Go ធ្វើជាបេក្ខភាពប្រធានាធិបតី ចំណែកឯលោក Duterte ខ្លួនលោកផ្ទាល់យល់ព្រមធ្វើជាអនុប្រធានាធិបតី។ លោក Bong Go ក្រោយមកក៏បដិសេធនឹងការជ្រើសតាំងនេះ។
យោងតាមការចុះផ្សាយរបស់សារព័ត៌មានហ្វីលីពីន Rappler ភាពចម្រូងចម្រាសនៅក្នុងគណបក្សនេះ នឹងត្រូវសម្រេចដោយគណៈកម្មាធិការរៀបចំការបោះឆ្នោតហ្វីលីពីន៕
ប្រភព៖ Rappler
