គណបក្សគាំទ្រលោកពូទីនឈ្នះសំឡេងភាគច្រើនក្នុងការបោះឆ្នោត បើទោះបីជាការគាំទ្រធ្លាក់ចុះ
បើតាមលទ្ធផលបឋមកាលពីថ្ងៃចន្ទ ទី២០ កញ្ញា គណបក្សរួបរួមរុស្សី ដែលគាំទ្រលោកប្រធានាធិបតីវ្លាឌីមៀរ ពូទីន បានរក្សាសំឡេងភាគច្រើនក្នុងសភារុស្សីបន្ទាប់ពីការបោះឆ្នោតរយៈពេលបីថ្ងៃ និងការបង្ក្រាបទៅលើបក្សប្រឆាំង ប៉ុន្តែមានការធ្លាក់ចុះការគាំទ្របើប្រៀបធៀបទៅនឹងការបោះឆ្នោតអាណត្តិមុន។
លទ្ធផលបឋមចុះផ្សាយដោយគណៈកម្មការរៀបចំការបោះឆ្នោតរុស្សី គណបក្សរួបរួមរុស្សីទទួល សន្លឹកឆ្នោត ៤៦,១១ ភាគរយ តាមពីក្រោយដោយគណបក្សកុម្មុយនិស្តរុស្សីជាមួយនឹង ២១,៤ ភាគរយ។ កាលពីការបោះឆ្នោតសភាឆ្នាំ ២០១៦ គណបក្សរួបរួមរុស្សីបានទទួលសន្លឹកឆ្នោតជាង ៥៤ ភាគរយ ខណៈពេលដែលបក្សកុម្មុយនិស្តទទួលបានត្រឹមតែ ១៣ ភាគរយប៉ុណ្ណោះ។ ការធ្លាក់ចុះនេះគឺស្របនឹងលទ្ធផលនៃការស្ទង់មតិមុនការបោះឆ្នោតរបស់ភ្នាក់ងារស្ទង់មតិរបស់រដ្ឋរុស្សី។
អ្នកវិភាគមួយចំនួនបានគិតថាការធ្លាក់ចុះ បានគឺបង្កដោយសារភាពអាប់អន់ចិត្តរបស់អ្នកគាំទ្រវ័យក្មេងជុំវិញការធ្លាក់ចុះនៃស្តង់ដាររស់នៅក្នុងរយៈពេលប៉ុន្មានឆ្នាំនេះ រួមជាមួយនឹងការចោទប្រកាន់ពីបក្សប្រឆាំងអំពីអំពើពុករលួយ។
ចលនាប្រឆាំងរបស់លោកអាឡិចស៊ី ណាវ៉ាលនីបានធ្វើយុទ្ធនាការបោះឆ្នោតដោយយុទ្ធសាស្ត្រ ដោយជំរុញការបោះឆ្នោតលើបេក្ខជនដែលទំនងនឹងអាចយកឈ្នះលើបេក្ខជនបក្សរួបរួមរុស្សី បើទោះបីជាពួកគេមិនគាំទ្រក៏ដោយ ដើម្បីបង្កផលប៉ះពាល់ដល់ចំនួនសន្លឹកឆ្នោតរបស់គណបក្សកាន់អំណាច។ ភាគច្រើនពួកគេបានជំរុញឱ្យអ្នកគាំទ្របិទច្រមុះហើយបោះឆ្នោតគាំទ្របក្សកុម្មុយនិស្ត។
គណនីបណ្ដាញសង្គមរបស់លោកណាវ៉ាលនីបានបញ្ជូនសារទៅអ្នកគាំទ្រថា៖ «ប្រសិនបើគណបក្សរួបរួមរុស្សីអាចឈ្នះ ប្រទេសរបស់យើងអាចរំពឹងថានឹងមានភាពក្រីក្រ ៥ ឆ្នាំទៀតការគាបសង្កត់ ៥ ឆ្នាំនិង ៥ ឆ្នាំដែលបាត់បង់»។
សម្ព័ន្ធមិត្តរបស់លោកណាវ៉ាលនីត្រូវបានរារាំងមិនឱ្យឈរឈ្មោះបោះឆ្នោត បន្ទាប់ពីចលនាប្រឆាំងរបស់លោកត្រូវបានរំសាយកាលពីខែមិថុនាក្រោមការចោទប្រកាន់ថាជាក្រុមជ្រុលនិយម។ បេក្ខជនប្រឆាំងផ្សេងទៀតបាននិយាយថាពួកគេជាជនរងគ្រោះនៃយុទ្ធនាការល្បិចកខ្វក់ ឬមិនត្រូវអនុញ្ញាតឱ្យប្រកួតប្រជែង។
វិមានក្រឹមឡាំងបានច្រានចោលការចោទប្រកាន់អំពីការបង្ក្រាបអ្នកប្រឆាំង ហើយនិយាយថាបុគ្គលទាំងនេះគឺត្រូវបានផ្ដន្ទាទោសពីព្រោះពួកគេបានរំលោភច្បាប់។ រដ្ឋាភិបាលបាននិយាយពួកគេមិនមានលូកដៃពាក់ព័ន្ធនឹងដំណើរការចុះឈ្មោះបេក្ខជនទេ។
យ៉ាងណាមិញ លទ្ធផលនេះហាក់បីដូចជាមិនផ្លាស់ប្តូរទិដ្ឋភាពនយោបាយរុស្សីធំដុំឡើយដោយលោកពូទីន ដែលបានកាន់អំណាចតាំងពីឆ្នាំ ១៩៩៩ នៅតែមានឥទ្ធិពលដ៏ធំមុនការបោះឆ្នោតប្រធានាធិបតីនៅឆ្នាំ ២០២៤ ។ លោកពូទីនមិនទាន់និយាយថាតើលោកនឹងឈរឈ្មោះនៅឆ្នាំ ២០២៤ ដែរ ឬទេ។
បើទោះបីជាមានការធ្លាក់ចុះការគាំទ្រក្នុងចំណោមប្រជាជនវ័យក្មេងក៏ដោយ ក៏គោលនយោបាយការបរទេសដ៏រឹងមាំប្រឆាំងលោកខាងលិចរបស់លោកពូទីន នៅតែទាក់ទាញការគាំទ្រពីប្រជាជនរុស្សីភាគច្រើន។
ក្នុងពិធីជួបជុំអបអរសាទរនៅទីស្នាក់ការកណ្ដាលរបស់គណបក្សរួបរួមរុស្សីអភិបាលក្រុងរុស្សីលោកសឺហ្គី សូបាយ៉ានីនបានស្រែកថា៖ «ពូទីន! ពូទីន! ពូទីន!» ដែលការស្រែកនេះត្រូវបានបន្ទរដោយក្រុមគាំទ្រប្រមូលផ្ដុំនៅទីនោះ។ បន្ទាប់ពីការបោះឆ្នោតឆ្នាំ ២០១៦ គណបក្សរួបរួមរុស្សីបានគ្រប់គ្រងជិតបីភាគបួននៃអាសនៈ ៤៥០ របស់សភារុស្សី។ ឧត្ដមភាពនេះបានអនុញ្ញាតឱ្យពួកគេធ្វើកំណែទម្រង់រដ្ឋធម្មនុញ្ញដើម្បីអនុញ្ញាតឱ្យលោកពូទីនកាន់អំណាចបន្តទៀត អាចរហូតដល់ឆ្នាំ ២០៣៦៕
ប្រភព៖ Aljazeera
