អ៊ីស្រាអែលចាប់ខ្លួនអ្នកទោសប៉ាឡេស្ទីន ២ នាក់ចុងក្រោយ បន្ទាប់ពីរត់ចេញពីពន្ធនាគារ
ហ្ស៊េរុយសាឡិម៖ កងកម្លាំងអ៊ីស្រាអែលចាប់ខ្លួនអ្នកទោសជនជាតិប៉ាឡេស្ទីន ២នាក់ចុងក្រោយ បន្ទាប់ពីរត់គេចខ្លួនចេញពីពន្ធនាគារដែលមានសន្តិសុខតឹងរ៉ឹងជិតពីរសប្តាហ៍មុន ដែលជនជាតិអ៊ីស្រាអែលហៅថាជាភាពអាម៉ាសសម្រាប់ប្រព័ន្ធសន្តិសុខរបស់ខ្លួន ហើយជនជាតិប៉ាឡេស្ទីនចាត់ទុកថាជាទង្វើនៃវីរភាពក្រោមការជិះជាន់របស់អ៊ីស្រាអែល។
ស្នងការប៉ូលីសអ៊ីស្រាអែលលោក Yaakov Shabtai និយាយថា សមាជិកពីរនាក់នៃក្រុមសកម្មប្រយុទ្ធជីហាដអ៊ិស្លាមរួមមានលោក Munadil Nafayat និង Eham Kamamji ត្រូវបានចាប់ខ្លួនមុនពេលព្រលឹមស្រាងៗ ពីផ្ទះមួយក្នុងទីក្រុង Jenin របស់ប៉ាឡេស្ទីនក្នុងតំបន់ West Bank ក្រោមប្រតិបត្តិការរួមគ្នាជាមួយអង្គភាពកងកម្លាំងពិសេសរបស់ប៉ូលីស និងទីភ្នាក់ងារស៊ើបការណ៍សម្ងាត់ក្នុងស្រុកអ៊ីស្រាអែល។
ក្នុងចំណោមអ្នករត់គេចទាំង ៦ នាក់ មានតែអ្នកទាំងពីរនេះទេ ដែលអាចភៀសខ្លួនរហូតដល់ West Bank ខណៈដែល ៤ នាក់ទៀតត្រូវបានចាប់ខ្លួននៅភាគខាងជើងអ៊ីស្រាអែលប្រហែលជាងមួយសប្ដាហ៍មុន។ ជនជាតិប៉ាឡេស្ទីនចាត់ទុកសមាជិកក្រុមប្រដាប់អាវុធដែលអ៊ីស្រាអែលចាប់ដាក់ពន្ធនាគារថាជាវីរបុរសក្នុងការតស៊ូបង្កើតរដ្ឋនៅតំបន់ West Bank ហ្កាហ្សា និងហ្ស៊េរុយសាឡិមខាងកើត ដែលជាទឹកដីអ៊ីស្រាអែលដណ្តើមបាននៅក្នុងសង្គ្រាមមជ្ឈឹមបូព៌ាឆ្នាំ ១៩៦៧ ខណៈអ៊ីស្រាអែលចាត់ទុកពួកនេះថាជាភេរវករ។
ការរត់គេចខ្លួនពីអ្នកទោសដែលផ្តន្ទាទោសពីបទឧក្រិដ្ឋកម្មភេរវកម្ម ទាំង ៦នាក់ បង្កឱ្យមានភាពច្របូកច្របល់នៅអ៊ីស្រាអែល ដោយខ្លះចាត់ទុកថា ជាភាពកំសោយនៃប្រព័ន្ធពន្ធនាគារ នីតិវិធីសន្តិសុខ និងសមត្ថភាពប្រមូលព័ត៌មានស៊ើបការណ៍សម្ងាត់របស់រដ្ឋាភិបាល។ ប៉ុន្តែសម្រាប់ជនជាតិប៉ាឡេស្ទីនជាច្រើន ការណ៍នេះជាទង្វើដែលលើកស្ទួយសីលធម៌នៃវីរភាព។
យោងតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ជនជាតិប៉ាឡេស្ទីនបានធ្វើបាតុកម្មគាំទ្រអ្នកទោសដែលរត់គេចខ្លួននៅទូទាំងតំបន់ West Bank និង ហ្ស៊េរុយសាឡិមខាងកើត។ សមាជិកនៃជនជាតិភាគតិចអារ៉ាប់របស់អ៊ីស្រាអែល ដែលតែងតែកំណត់អត្តសញ្ញាណខ្លួនថាជាជនជាតិប៉ាឡេស្ទីន ក៏បានបង្ហាញការគាំទ្រផងដែរ ជាមួយនឹងការតវ៉ាជាច្រើនទៀតដែលគ្រោងនឹងធ្វើជាបន្តបន្ទាប់។
បច្ចុប្បន្ន ជនជាតិប៉ាឡេស្ទីនប្រហែល ៥ ០០០ នាក់កំពុងជាប់ឃុំនៅក្នុងពន្ធនាគារអ៊ីស្រាអែល។
ប្រភព៖ New York Times
