កិច្ចប្រជុំរដ្ឋមន្ត្រីការបរទេសអាស៊ាន-អាមេរិកៈរដ្ឋមន្ត្រីការបរទេសកម្ពុជាចែករំលែកការព្រួយបារម្ភនិងភាពធ្ងន់ធ្ងរនៃការប្រកួតប្រជែងភូមិសាស្ត្រនយោបាយ
ភ្នំពេញៈ ក្នុងអំឡុងពេលនៃកិច្ចប្រជុំរដ្ឋមន្ត្រីការបរទេសអាស៊ាន-សហរដ្ឋអាមេរិក (ស.រ.អា)ក្នុងឱកាសនៃមហាសន្និបាត អង្គការសហប្រជាជាតិ លើកទី៧៦ កាលពីថ្ងៃទី២៣ ខែកញ្ញា ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសកម្ពុជាបានថ្លែងអំណរគុណដល់ស.រ.អាចំពោះការចូលរួមចំណែកយ៉ាងសំខាន់ក្នុងការប្រយុទ្ធប្រឆាំងនឹងជំងឺកូវីដ-១៩ រួមទាំងនៅប្រទេសកម្ពុជាផងដែរ។
រដ្ឋមន្ត្រីការបរទេសកម្ពុជាបានសម្តែងនូវសុទិដ្ឋិនិយមថា អាស៊ាន និងស.រ.អា នឹងបញ្ចប់ជំងឺរាតត្បាតកូវីដ-១៩ ក្នុងពេលឆាប់ៗខាងមុខនេះ ដើម្បីអាចចាប់ផ្តើមឡើងវិញនូវការធ្វើដំណើរដោយសុវត្ថិភាព ការផ្លាស់ប្តូរធុរកិច្ច និងសេដ្ឋកិច្ច ដោយមិនត្រឹមតែនៅក្នុងអាស៊ានប៉ុណ្ណោះទេ ប៉ុន្តែថែមទាំងរវាងអាស៊ាន និងស.រ.អា ព្រមទាំងជាមួយ នឹងប្រទេសនានាក្នុងសកលលោកផងដែរ។
ចំពោះបញ្ហាតំបន់និងអន្តរជាតិរដ្ឋមន្ត្រីការបរទេសកម្ពុជាបានចែករំលែកការព្រួយបារម្ភអំពីផលអវិជ្ជមានដែលបណ្តាលមកពីភាពស្មុគស្មាញដែលកំពុងតែកើនឡើង និងភាពធ្ងន់ធ្ងរនៃការប្រកួតប្រជែងភូមិសាស្ត្រនយោបាយ។
កាលពីថ្ងៃទី២៣ ខែកញ្ញាកន្លងទៅឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការ អន្តរជាតិនៃព្រះរាជាណាចក្រកម្ពុជាបានអញ្ជើញចូលរួមតាមប្រព័ន្ធវីដេអូក្នុងកិច្ចប្រជុំរដ្ឋមន្ត្រីការបរទេសអាស៊ាន-សហរដ្ឋអាមេរិក (ស.រ.អា) ក្នុងឱកាសនៃមហាសន្និបាតអង្គការសហប្រជាជាតិ លើកទី៧៦។ លោកជំទាវ រ៉េតណូ ម៉ារស៊ូឌី រដ្ឋមន្ត្រីការបរទេសនៃសាធារណរដ្ឋឥណ្ឌូនេស៊ី ដែលជាប្រទេសសម្របសម្រួលទំនាក់ទំនងដៃគូសន្ទនាអាស៊ាន-ស.រ.អា និងឯកឧត្តម អេនតូនី ប្លីនខេន រដ្ឋមន្រី្តការបរទេសសហរដ្ឋអាមេរិក ជាសហប្រធាននៃកិច្ចប្រជុំនេះ។
យោងតាមប្រភពក្រសួងការបរទេសបានបញ្ជាក់ថា កិច្ចប្រជុំបានពិភាក្សាអំពីការប្រយុទ្ធប្រឆាំងនឹងជំងឺកូវីដ១៩ ទំនាក់ទំនងអាស៊ាន-ស.រ.អា និងបញ្ហាតំបន់ និងអន្តរជាតិដែលជាកង្វល់ និងចំណាប់អារម្មណ៍រួម ក្នុងនោះរួមកិច្ចសហប្រតិបត្តិការ ដើម្បីដោះស្រាយបញ្ហាឆ្លងកាត់ព្រំដែន ដូចជាបញ្ហាការប្រែប្រួលអាកាសធាតុ។
ចំពោះទំនាក់ទំនងអាស៊ាន-ស.រ.អា អាស៊ានបានសង្កត់ធ្ងន់លើសារៈសំខាន់នៃការថែរក្សាពហុភាគីនិយម មជ្ឈភាពអាស៊ាន និងបានកោតសរសើរតួនាទីរបស់ស.រ.អា នៅក្នុងការអភិវឌ្ឍតំបន់ សមាហរណកម្មតំបន់ និងកិច្ចខិតខំប្រឹងប្រែងកសាងសហគមន៍អាស៊ាន តាមរយៈគំនិតផ្តួចផ្តើមតំបន់ និងអនុតំបន់នានា។
អាស៊ានបានកត់សម្គាល់ការប្តេជ្ញារបស់ស.រ.អា ក្នុងការធ្វើការជាមួយអាស៊ាន ដើម្បីជំរុញសន្តិភាព និងវិបុលភាពក្នុងតំបន់ ស្របតាមគោលការណ៍ដែលមានចែងនៅក្នុងទស្សនៈវិស័យអាស៊ានស្តីពីឥណ្ឌូ-ប៉ាស៊ីហ្វិកនិងគូសបញ្ជាក់ពីសារៈសំខាន់នៃការលើកកម្ពស់កិច្ចសហប្រតិបត្តិការក្នុងវិស័យយុទ្ធសាស្ត្រទាំង៤។ អាស៊ានបានស្វាគមន៍ចំពោះសំណើស.រ.អា ក្នុងការពង្រីកទំនាក់ទំនងអាស៊ាន-ស.រ.អា ក្នុងវិស័យដឹកជញ្ជូន សមភាពយេនឌ័រ ការពង្រឹងសិទ្ធិអំណាចស្ត្រី ថាមពល ការការពារបរិស្ថាន និងបម្រែបម្រួលអាកាសធាតុ ហើយរំពឹងដល់ការធ្វើសកម្មភាពរួមគ្នានាពេលដ៏ខ្លីខាងមុខ។
រដ្ឋមន្ត្រីការបរទេសអាស៊ាន និងរដ្ឋមន្ត្រីការបរទេសសហរដ្ឋអាមេរិក បានឯកភាពគ្នាពង្រឹងកិច្ចសហប្រតិបត្តិការអាស៊ាន-ស.រ.អា ដើម្បីប្រយុទ្ធប្រឆាំងនឹងជំងឺរាតត្បាតកូវីដ-១៩ និងផលប៉ះពាល់ដ៏ធំធេងរបស់ជំងឺនេះ និងធានាការស្តារសេដ្ឋកិច្ចឡើងវិញឱ្យរឹងមាំ។ អាស៊ានបានសម្តែងការកោតសរសើរដល់ការប្តេជ្ញារបស់ស.រ.អា ចំពោះសកម្មភាពគ្រប់ជ្រុងជ្រោយឆ្ពោះទៅរកការបញ្ចប់ជំងឺរាតត្បាតសកល ក៏ដូចជាការផ្តល់វ៉ាក់សាំងចំនួនជាង ២៣លានដូស និងទឹកប្រាក់ជិត ១៦០លានដុល្លារ ក្នុងក្របខ័ណ្ឌជំនួយសម្រាប់សង្គ្រោះបន្ទាន់ផ្នែកសុខាភិបាល និងមនុស្សធម៌ ដល់ប្រទេស ជាសមាជិកអាស៊ាន និងកិច្ចខិតខំប្រឹងប្រែងរបស់ទីភ្នាក់ងារ USAID ដើម្បីជួយដល់អាស៊ានក្នុងការអភិវឌ្ឍប្រព័ន្ធសម្របសម្រួលភាពបន្ទាន់ផ្នែកសុខភាពសាធារណៈអាស៊ាន។ អាស៊ាន និងស.រ.អា បានចែករំលែកទស្សនៈថា វ៉ាក់សាំងមិនគួរយកមកធ្វើជាឧបករណ៍នយោបាយ និងសារៈសំខាន់នៃលើកកម្ពស់សមភាពក្នុងការទទួលបានវ៉ាក់សាំង និងការចាក់វ៉ាក់សាំងដល់ប្រជាជនជុំវិញពិភពលោកអោយបានឆាប់រហ័សបំផុត។
កិច្ចប្រជុំបានសម្តែងការគាំទ្រចំពោះសំណើសេចក្ដីប្រកាសថ្នាក់ដឹកនាំអាស៊ាន-ស.រ.អា ស្តីពីការអភិវឌ្ឍឌីជីថល ដែលនឹងត្រូវអនុម័តនៅក្នុងកិច្ចប្រជុំកំពូលអាស៊ាន-ស.រ.អា លើកទី៩ នៅខែតុលា ឆ្នាំ២០២១ ហើយដែលអាចនឹងពង្រឹងការត្រៀមខ្លួនរបស់អាស៊ានសម្រាប់បដិវត្តន៍ឧស្សាហកម្មទី៤ (4IR) និងគាំទ្រកិច្ចខិតខំប្រឹងប្រែងរបស់អាស៊ានក្នុងការតភ្ជាប់ទំនាក់ទំនងឌីជីថល និងគម្លាតការអភិវឌ្ឍព័ត៌មានវិទ្យា (ICT) នៅក្នុងអាស៊ាន។
កិច្ចប្រជុំក៏បានផ្លាស់ប្តូរទស្សនៈផងដែរលើបញ្ហាតំបន់ និងអន្តរជាតិមួយចំនួន ដែលមានសារៈសំខាន់ចំពោះសន្តិភាព ស្ថិរភាព និងសន្តិសុខក្នុងតំបន់ រួមទាំងស្ថានការណ៍នៅប្រទេសមីយ៉ាន់ម៉ា និងការព្រួយបារម្ភពីទំនាក់ទំនងរបស់ប្រទេសមហាអំណាច។ អាស៊ានបានសង្កត់ធ្ងន់ពីសារៈសំខាន់នៃទំនាក់ទនងដែលមានភាពនឹងនរ និងផ្តល់ផលប្រយោជន៍ ជាជាងការប្រកួតប្រជែងរវាងចិន និងស.រ.អា ព្រោះវាអាចជួយរក្សាសន្តិភាព ស្ថិរភាព និងសុវត្ថិភាព ក្នុងតំបន់អាស៊ីប៉ាស៊ីហ្វិក ក៏ដូចជារក្សានូវកំណើនសេដ្ឋកិច្ច៕ ដោយៈ ពលជ័យ
