ភ្នំពេញ ៖ កម្លាំងចម្រុះនៃអធិការដ្ឋាននគរបាលខណ្ឌ បានធ្វេីការបង្ក្រាបជាក់ស្តែងករណី ប៉ុនប៉ងលួច (ទ្រព្យសម្បត្តិ) កាលពីវេលាម៉ោង០១និង៣០នាទី ថ្ងៃទី០១ ខែតុលា ឆ្នាំ២០២១ ត្រង់ចំណុចខាងមុខខ្លោងទ្វារវត្តពោធិញាណ ផ្លូវ៣៧១ ស្ថិតនៅភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។

សមត្ថកិច្ចជំនាញព្រហ្មទណ្ឌខណ្ឌដង្កោ បានឲ្យដឹងថា ជនសង្ស័យ០៥នាក់ដែលឃាត់ខ្លួនរួមមាន ៖ ទី០១ឈ្មោះ យ៉ាត ភារ៉ា ភេទប្រុស អាយុ២១ឆ្នាំ ជនជាតិខ្មែរ មុខរបរកម្មករផ្សារដើមគរ ស្នាក់នៅផ្ទះជួលភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ទី០២ឈ្មោះ ផាន ផារី ភេទប្រុស អាយុ២៨ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅភូមិដណ្តឹងធំ ឃុំដណ្តឹង ស្រុកបាទី ខេត្តតាកែវ ទី០៣ឈ្មោះ សុខ ចាន់ឌី ភេទប្រុស អាយុ៤១ឆ្នាំ ជនជាតិខ្មែរ មុខរបរទិញអេតចាយ ទីលំនៅភូមិដណ្តឹងធំ ឃុំដណ្តឹង ស្រុកបាទី ខេត្តតាកែវ ទី០៤ឈ្មោះ អ៊ុ ម៉ាប់ ភេទប្រុស អាយុ៣១ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅភូមិដណ្តឹងធំ ឃុំដណ្តឹង ស្រុកបាទី ខេត្តតាកែវ ទី០៥ឈ្មោះ អូន ម៉ាលីន ភេទប្រុស អាយុ២៧ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅតាមទីសាធារណៈ សង្កាត់ទួលស្វាយព្រៃ ខណ្ឌបឹកកេងកង រាជធានីភ្នំពេញ ។

ចំណែកវត្ថុតាងចាប់យក៖ ១/ដែកជ្រុងចុងសំប៉ែតស្រួចចំនួន០១, ២/កន្ត្រៃកាត់ក្រណាត់ចំនួន០១, ៣/សោរខ្សៀលេខ៨ចំនួន០២, ៤/សោរខ្សៀលេខ១០ចំនួន០១, ៥/ដង្កាប់ចំនួន០២, ៦/ទូរស័ព្ទដៃចំនួន០៤គ្រឿង (ម៉ាក ហូវេ ចំនួន០២គ្រឿង, ម៉ាកវីវ៉ូ ចំនួន០១គ្រឿង, ម៉ាកសាំសុងចំនួន០១គ្រឿង) ៧/ម៉ូតូរ៉ឺម៉កកង់បី ពណ៌ក្រហមខ្មៅ គ្មានផ្លាកលេខ (ម៉ូតូរ៉ឺម៉កចាស់)ចំនួន០១គ្រឿង ។

គួរបញ្ចាក់ថា កាលពីថ្ងៃទី០១ ខែតុលា ឆ្នាំ២០២១ វេលាម៉ោង០១និង៣០នាទី កម្លាំងប៉ុស្តិ៍នគរបាលរដ្ឋបាលដង្កោ និងកម្លាំងសមត្ថកិច្ចនគរបាលខណ្ឌដង្កោ បានសហការជាមួយកម្លាំងកងរាជអាវុធហត្ថខណ្ឌដង្កោ ជិះម៉ូតូល្បាតក្នុងភូមិសាស្ត្រខណ្ឌដង្កោ តាមផ្លូវ៣៧១ ដល់ចំណុចខ្លោងទ្វារពោធិញាណ ស្ថិតនៅភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ក៏បានឃើញជនសង្ស័យចំនួន០៥នាក់ កំពុងបើកម៉ូតូរ៉ឺម៉ក ពណ៌ក្រហមខ្មៅ គ្មានផ្លាកលេខ (ម៉ូតូរ៉ឺម៉កចាស់) ឌុបគ្នាលើផ្លូវ ៣៧១ ពីលិចទៅកើត ។

ពេលនោះសមត្ថកិច្ចមានការសង្ស័យ ក៏បានហៅឱ្យឈប់ ធ្វើការត្រួតពិនិត្យ ឃើញមានវត្ថុតាងពាក់ព័ន្ធបទល្មើសខាងលេី ក៏បានឃាត់ខ្លួនជនសង្ស័យទាំង០៥នាក់ យកមកធ្វើការសាកសួរនៅប៉ុស្តិ៍នគរបាលរដ្ឋបាលដង្កោតាមនីតិវិធី ៕ ដោយ ៖ ភារ៉ា និងប៊ុនធី