វៀតណាមសម្រេចចំណាយជាង៣២លានដុល្លារ ទិញវ៉ាក់សាំងគុយបា ៥លានដូស
ប្រទេសវៀតណាមនឹងចំណាយថវិកា ចំនួន៧៤២ទ្រីលានដុង ឬ ៣២.៦៣លានដុល្លារអាមេរិក ទិញវ៉ាក់សាំងនិងដឹកជញ្ជូនវ៉ាក់សាំង Abdala ផលិតនៅប្រទេសគុយបា ចំនួន៥លានដូស។
សូមបញ្ជាក់ថា រដ្ឋាភិបាលវៀតណាមបានសម្រេចការចំណាយទិញ វ៉ាក់សាំង Abdala ក្នុងចំនួននេះ ដោយប្រើប្រាស់ថវិកាមូលនិធិ កាលពីថ្ងៃព្រហស្បតិ៍។
រដ្ឋាភិបាលវៀតណាម កាលពីថ្ងៃទី ២០ កញ្ញា បានព្រមព្រៀងចុះកុងត្រា ករណីពិសេស ទិញវ៉ាក់សំាំងប្រភេទនេះ ចំនួន១០លានដូស ពីប្រទេសគុយបា។
គុយបានបានអនុម័តឲ្យប្រើវ៉ាក់សាំងនេះ កាលពីថ្ងៃទី៩ កក្កដា បន្ទាប់ពីក្រុមអ្នកផលិតអះអាងថា វាមានប្រសិទ្ធភាពជាង៩២ភាគរយ ជាមួយនឹងដូសទី៣។
មកទល់ពេលនេះ វៀតណាមបានសម្រេចប្រើវ៉ាក់សាំង ៨ប្រភេទហើយ ផលិតនៅប្រទេសផ្សេងៗគ្នា។ វៀតណាមគ្រោងនឹងប្រមូលវ៉ាក់សាំងឲ្យបាន១៥០លានដូស ចាក់ជូនពលរដ្ឋ យ៉ាងតិច ៧០ភាគរយ នៃចំនួនប្រជាជនសរុប៩៦លាននាក់ នៅត្រឹមខែមេសា ២០២២៕