ខណៈកំពុងស្ថិតក្រោមសម្ពាធ តាលីបង់ឆ្លៀតជួបគណៈប្រតិភូសហភាពអឺរ៉ុប និងសហរដ្ឋអាម៉េរិក ដើម្បីជំរុញការគាំទ្រ
ដូហា៖ ក្រុមតាលីបង់បានធ្វើកិច្ចចរចាទល់មុខគ្នាជាលើកដំបូងជាមួយគណៈប្រតិភូអាមេរិក-សហភាពអឺរ៉ុបនៅប្រទេសកាតា ស្របពេលដែលទីក្រុងព្រុចសែលបានសន្យាផ្តល់ជំនួយ ១ពាន់លានអឺរ៉ូ ឬស្មើនឹង ១,២ពាន់លានដុល្លារដល់អាហ្វហ្គានីស្ថាន។
នៅឯកិច្ចប្រជុំក្នុងទីក្រុងដូហា និងសន្និសីទនៃប្រទេសមានសេដ្ឋកិច្ចធំៗរបស់ពិភពលោក G20 សារសម្រាប់ក្រុមតាលីបង់គឺដូចគ្នា ក្នុងនោះរួមមាន៖ ពិភពលោកប្តេជ្ញាផ្តល់ជំនួយមនុស្សធម៌ដល់ប្រជាជន ដែលរងគ្រោះនៅអាហ្វហ្គានីស្ថាន ហើយប្រទេសនេះមិនត្រូវក្លាយជាមូលដ្ឋានរបស់ពួកសកម្មប្រយុទ្ធទេ។ ជាមួយគ្នានេះ ប្រធានគណៈកម្មការសហភាពអឺរ៉ុបលោកស្រី Ursula von der Leyen បានគូសបញ្ជាក់ថា ជំនួយនេះគឺដើម្បីបញ្ចៀសការដួលរលំផ្នែកមនុស្សធម៌និងសេដ្ឋកិច្ចសង្គម ហើយថា ជំនួយគឺជាការគាំទ្រដោយផ្ទាល់សម្រាប់ប្រជាជនអាហ្វហ្គានីស្ថាន ហើយនឹងត្រូវផ្ទេរទៅកាន់បណ្តាអង្គការអន្តរជាតិមិនមែនរដ្ឋាភិបាលបណ្តោះអាសន្នរបស់តាលីបង់ ដែលទីក្រុងព្រុចសែលមិនទទួលស្គាល់នោះទេ។
សហភាពអឺរ៉ុបបានបើកកិច្ចប្រជុំកំពូល G20 តាមអនឡាញ ដោយសន្យាផ្តល់កញ្ចប់ថវិកាមួយពាន់លានអឺរ៉ូ រួមទាំងប្រាក់សម្រាប់តម្រូវការមនុស្សធម៌បន្ទាន់ និងប្រទេសជិតខាងអាហ្វហ្គានីស្ថាន ត្រូវទទួលយកជនជាតិអាហ្វហ្គានីស្ថានដែលភៀសខ្លួនពីតាលីបង់។ បច្ចុប្បន្នតាលីបង់កំពុងស្វែងរកការទទួលស្គាល់ ក៏ដូចជាជំនួយដើម្បីបញ្ចៀសគ្រោះមហន្តរាយមនុស្សធម៌ បន្ទាប់ពីពួកគេបានវិលត្រឡប់មកកាន់អំណាចវិញកាលពីខែសីហា បន្ទាប់ពីការដកកងទ័ពអាមេរិក៕ ប្រភព៖ CNA
