ថៃ Test ចំណតសុវណ្ណភូមិ ត្រៀមទទួលភ្ញៀវអន្តរជាតិឡើងវិញ
ចំណតអាកាសយានដ្ឋានដ៏សំខាន់របស់ថៃបានដំណើរការសាកល្បង មុនពេលបើកប្រទេសឡើងវិញ នាថ្ងៃចន្ទ សប្តាហ៍ក្រោយ។
ចំណតអាកាសយានដ្ឋានអន្តរជាតិ សុវណ្ណភូមិ បានធ្វើការសាកល្បងប្រតិបត្តិការ កាលពីថ្ងៃពុធ ទី២៧ តុលា ដើម្បីត្រៀមខ្លួនទទួលស្វាគមន៍ភ្ញៀវទេសចរបរទេសដែលគ្រោងនឹងទៅប្រទេសថៃ ឡើងវិញ នាថ្ងៃទី១ វិច្ឆិកា ពោលគឺចំពេលដែលថៃបើកព្រំដែនរបស់ខ្លួនវិញ សម្រាប់ ភ្ញៀវបរទេស តាមជើងហោះហើរ។
ការសាកល្បងនេះ មានមនុស្សប្រមាណ១៥០នាក់ សម្តែងធ្វើជាទេសចរដែលមកពីអាល្លឺម៉ង់ ដើម្បីកំណត់រយៈពេលដែលនឹងចំណាយពេលសម្រាប់អ្នកដំណើរម្នាក់ៗ ចុះពីយន្តហោះ ឆ្លងកាត់ឧបករណ៍ចាប់សញ្ញាកម្ដៅ ដំណើរការឯកសារ ឆ្លងកាត់ការត្រួតពិនិត្យអន្តោប្រវេសន៍ និងគយ និងចាកចេញពីព្រលានយន្តហោះ។
លោក Kittipong Kittikachorn នាយកអាកាសយានដ្ឋានសុវណ្ណភូមិបាននិយាយថា ពេលវេលាជាមធ្យម ដើម្បីបញ្ចប់ដំណើរការទាំងមូលគួរតែមានប្រហែល ២៥ នាទី។ ព្រលានយន្តហោះក៏បានបង្កើតគោលការណ៍ណែនាំសម្រាប់អ្នកដំណើរ ដែលមកដល់ក្រោយពេលចុះពីយន្តហោះដែរ។
យោងតាមផ្នែកកិច្ចការកុងស៊ុលរបស់ថៃបានឱ្យដឹងថា អ្នកដំណើរដែលមកដល់ត្រូវបានបែងចែក ពីក្រុមអ្នកដែលមកពី ៤៦ ប្រទេសឬតំបន់ ចេញដំណើរដែលមានហានិភ័យទាប ដែលមិនចាំបាច់ត្រូវដាក់ឱ្យនៅដាច់ដោយឡែក ប្រសិនបើពួកគេត្រូវបានចាក់បញ្ចូលពេញលេញជាមួយនឹងវ៉ាក់សាំងដែលទទួលស្គាល់ មានលទ្ធផលតេស្ត COVID-19 អវិជ្ជមានក្នុងរយៈពេល ៧២ ម៉ោង។ មុនពេលចេញដំណើរ និងមានការធានារ៉ាប់រងសុខភាពចំនួន ៥ម៉ឺន ដុល្លារអាមេរិក។
បន្ទាប់ពីឆ្លងកាត់ការធ្វើតេស្ត RT-PCR នៅពេលមកដល់ ពួកគេអាចធ្វើដំណើរគ្រប់ទីកន្លែងក្នុងប្រទេសថៃ ប៉ុន្តែត្រូវទាញយក និងដំឡើងកម្មវិធីតាមដាន និងឆ្លងកាត់ការធ្វើតេស្ត នៅចុងសប្តាហ៍ដំបូងរបស់ពួកគេ នៅក្នុងប្រទេសថៃ៕ ប្រភពពី Thai BPS
