រដ្ឋមន្ត្រីការបរទេសចិន៖ អនាគតតែមួយគត់របស់តៃវ៉ាន់ គឺការបង្រួបបង្រួមជាមួយចិនដីគោក
នៅក្នុងកំឡុងពេលនៃកិច្ចប្រជុំកំពូលក្រុមប្រទេស G20កាលពីថ្ងៃសៅរ៍ ទី៣០ តុលារដ្ឋមន្ត្រីការបរទេសចិនលោកវ៉ាង យីបាននិយាយថាកោះតៃវ៉ាន់គ្មានអនាគតអ្វីផ្សេងពីការបង្រួបបង្រួមឡើងវិញជាមួយចិនដីគោកទេ។
បើតាមសេចក្ដីថ្លែងការណ៍មួយដែលបានបង្ហោះលើគេហទំព័រក្រសួងការបរទេសចិនលោកវ៉ាងបានលើកឡើងបែបនេះនៅពេលដែលលោកកំពុងឆ្លើយតបនឹងសំណួរអំពីកិច្ចខិតខំប្រឹងប្រែងរបស់បណ្ដាប្រទេសរួមទាំងសហរដ្ឋអាមេរិកក្នុងការគាំទ្រដល់ការចូលរួមរបស់តៃវ៉ាន់នៅក្នុងអង្គការសហប្រជាជាតិ និងក្នុងសហគមន៍អន្តរជាតិ។
លោកវ៉ាង យីថា៖ «ប្រវត្តិសាស្ត្រ និងអង្គហេតុផ្លូវច្បាប់នៃ ‘ចិនតែមួយ’ គឺមិនអាចប្រកែកបានទេ ហើយវឌ្ឍនភាពសម្រាប់ប្រជាជន ១,៤ ពាន់លាននាក់របស់ប្រទេសចិន ដើម្បីលើកកម្ពស់ការបង្រួបបង្រួមជាតិដោយសន្តិភាពនៃមាតុភូមិគឺមិនអាចបញ្ឈប់បានទេ»។
កាលពីដើមសប្ដាហ៍មុន ក្រុងប៉េកាំងរិះគន់ការអំពាវនាវរបស់រដ្ឋមន្ត្រីការបរទេសអាមេរិកអាន់តូនី ប្លីនខែនទៅកាន់សមាជិកអង្គការសហប្រជាជាតិឱ្យគាំទ្រការចូលរួមរបស់កោះតៃវ៉ាន់ ដោយព្រមានថាការគាំទ្រកោះតៃវ៉ាន់នឹងបង្ក «ហានិភ័យដ៏ធំធេង» ក្នុងទំនាក់ទំនងរវាងប្រទេសចិន និងសហរដ្ឋអាមេរិក។
ផ្សេងពីនេះ កាលពីថ្ងៃសៅរ៍ប្រទេសចិនក៏បានផ្ញើរសារមួយទៅកាន់ប្រទេសលីទុយអានីផងដែរ បន្ទាប់ពីប្រទេសនេះយល់ព្រមជាមួយកោះតៃវ៉ាន់ក្នុងការបើកការិយាល័យការទូតទៅវិញទៅមក៕
ប្រភព៖ The Straitstimes