រដ្ឋមន្ត្រីការបរទេស ស.អា.រ និងចិនឆ្លៀតជួបគ្នា អំឡុងកិច្ចប្រជុំ G-20
រដ្ឋមន្ត្រីការបរទេសសហរដ្ឋអាមេរិក លោក អាន់តូនី ប្លីនកែន និងរដ្ឋមន្ត្រីការបរទេសចិន លោក វ៉ាង យី បានជួបពិភាក្សាគ្នាក្នុងកិច្ចប្រជុំចង្អៀតមួយ អំឡុងពេលកិច្ចប្រជុំកំពូលនៃប្រទេសសេដ្ឋកិច្ចជឿនលឿនចំនួន ២០ ឬ G-20 ដែលប្រព្រឹត្តិទៅនៅទីក្រុងរ៉ូម ប្រទេសអ៊ីតាលី កាលពីថ្ងៃអាទិត្យកន្លងទៅ។
ប្រភពពីក្រសួងការបរទេសអាមេរិក បានចុះផ្សាយពីជំនួបរវាងលោកទាំងពីរ ហើយបានរៀបរាប់សង្ខេបៗថា ប្រធានបទដែលយកមកពិភាក្សាមានរឿងជាច្រើនរាប់ចាប់តាំងពីបញ្ហាពិភពលោករួមមាន បញ្ហាអ៊ីរ៉ង់ កូរ៉េខាងជើង និងមីយ៉ាន់ម៉ា ក៏ដូចជាបញ្ហារំលោភសិទ្ធិមនុស្សនៅប្រទេសចិន ដែលរាប់បញ្ចូលនឹងរឿងតៃវ៉ាន់ជាដើម។
ចំណែកឯខាងចិនវិញ សារព័ត៌មានរដ្ឋស៊ីនហួរ ចុះផ្សាយយ៉ាងច្រើន ជាពិសេសទៅលើបញ្ហាតៃវ៉ាន់តែម្ដង។ លោក វ៉ាង យី ជំរុញឱ្យភាគីអាមេរិកបញ្ឈប់នូវការគាំទ្រ គំនិត «តៃវ៉ាន់ឯករាជ្យ» ហើយគោរពគោលនយោបាយ «ចិនតែមួយ» ឱ្យបានពិតប្រាកដ ជាជាងគោរពបានតែមាត់ ហើយដល់ពេលអនុវត្តមិនបានពេញលេញ។
ពាក់ព័ន្ធនឹងតៃវ៉ាន់ បើយោងតាមប្រភពពីមន្ត្រីក្រសួងការបរទេសអាមេរិក ចុះផ្សាយដោយរ៉យទ័រ ខាងអាមេរិកបានបញ្ជាក់ត្រង់ៗថា អាមេរិកប្រឆាំងនឹងសកម្មភាពឯកតោភាគីរបស់ចិនក្នុងការផ្លាស់ប្ដូរបច្ចុប្បន្ននៅតំបន់ច្រកសមុទ្រតៃវ៉ាន់។
បន្ថែមពីនេះទៀត ភាគីចិន បានលើកឡើងថា ទំនាក់ទំនងទ្វេភាគីរវាងចិន និងអាមេរិកមានភាពល្អក់កករដោយសារតែអាមេរិកដើរគោលនយោបាយខុស ដោយអនុម័តប្រមាណ ៣០០ច្បាប់ប្រឆាំងចិន និងដាក់ទណ្ឌកម្មស្ថាប័ន និងក្រុមហ៊ុនសរុបចំនួន ៩០០។
ទោះជាយ៉ាងណាក៏ដោយ ប្រមុខការទូតនៃប្រទេសទាំងពីរបានសន្យាជាមួយគ្នាថា នឹងជជែកគ្នាតទៅទៀត ដើម្បីដោះស្រាយបញ្ហាទ្វេភាគីនានា និងបញ្ហាពិភពលោក៕
ប្រភព៖ news.cn
