ឥណ្ឌូនេស៊ីចូលកាន់តំណែងប្រធាន G20 ដាក់ការងើបឡើងវិញពីកូវីដ-១៩ ជាអាទិភាពសម្រាប់អាណត្តិឆ្នាំក្រោយ
កាលពីថ្ងៃអាទិត្យ ទី៣១ តុលាកន្លងទៅ ប្រទេសឥណ្ឌូនេស៊ីបានចូលកាន់តំណែងជាប្រធាននៃវេទិកាក្រុមប្រទេសសេដ្ឋកិច្ចធំៗ G20 ជាលើកដំបូង ដោយដាក់ការងើបឡើងវិញពីវិបត្តិរីករាលដាលជំងឺកូវីដ-១៩ ជាអាទិភាពខ្ពស់ក្នុងរបៀបវារៈនៃអាណត្តិឆ្នាំក្រោយ។
នាយករដ្ឋមន្ត្រីអ៊ីតាលីលោកម៉ារីអូ ដ្រាហ្គីបានធ្វើការផ្ទេរតំណែងទៅឱ្យប្រធានាធិបតីឥណ្ឌូនេស៊ីលោកចូកូ វីដូដូនៅពេលបិទកិច្ចប្រជុំរយៈពេលពីរថ្ងៃរវាងមេដឹកនាំក្រុមប្រទេសG20 ដែលជាជំនួបដោយផ្ទាល់លើកដំបូងចាប់តាំងពីឆ្នាំ ២០១៩។
ក្នុងនាមជាម្ចាស់ផ្ទះ និងជាប្រធាន ប្រទេសឥណ្ឌូនេស៊ីបានដាក់ «ងើបឡើងវិញជាមួយគ្នា ងើបឡើងវិញកាន់តែរឹងមាំ» ជាប្រធានបទស្នូលនៃរបៀបវារៈ G20 នៅឆ្នាំក្រោយ។ ឥណ្ឌូនេស៊ីនឹងជំរុញឱ្យមានការចែកចាយវ៉ាក់សាំងជាសាកលដោយស្មើភាព និងសមធម៌ ក៏ដូចជាការចែកចាយហិរញ្ញប្បទានគ្រប់គ្រាន់ តាមរយៈការបង្កើតក្រុមការងារផ្នែកហិរញ្ញវត្ថុ និងសុខភាពរួមគ្នា ដើម្បីដោះស្រាយបញ្ហាទាក់ទងនឹងការបង្ការជំងឺរាតត្បាត ការត្រៀមលក្ខណៈ និងការឆ្លើយតប។ អាណត្តិប្រធានG20 របស់ឥណ្ឌូនេស៊ី នឹងចាប់ផ្ដើមជាផ្លូវការនៅថ្ងៃទី ១ធ្នូ ខាងមុខនេះ នឹងត្រូវបានបញ្ចប់ដោយកិច្ចប្រជុំកំពូលនៃមេដឹកនាំនៅលើកោះបាលីនៅខែតុលាឆ្នាំក្រោយ៕
ប្រភព៖ The Straitstimes
