ភ្នំពេញ ៖ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី១២ ខែវិច្ឆិកា ឆ្នាំ២០២១នេះ បានចេញសេចក្តីថ្លែងការណ៍មួយ បដិសេធយ៉ាងដាច់អហង្ការចំពោះការទណ្ឌកម្មរបស់អាមេរិក មកលើយោធាជាន់ខ្ពស់២រូប ដែលធ្វើឡើងដោយហេតុផលភូមិសាស្ត្រនយោបាយ។ សេចក្តីថ្លែងការណ៍កម្ពុជា បានបញ្ជាក់ថា៖ «ក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា សូមបដិសេធយ៉ាងដាច់អហង្ការចំពោះអំណាចយុត្តាធិការហួសព្រំដែនរបស់សហរដ្ឋអាមេរិកមកលើមន្ត្រីកម្ពុជា ក្រោមការចោទប្រកាន់គ្មានមូលដ្ឋាន ដែលធ្វើឡើងដោយហេតុផលភូមិសាស្ត្រនយោបាយ»។

ប្រតិកម្មរបស់ក្រសួងការបរទេស និងសហប្រតិបត្តិការអន្តរជាតិកម្ពុជា បានធ្វើឡើងបន្ទាប់ពីក្រសួង រតនាគារ សហរដ្ឋ អាមេរិក និងក្រសួង ការបរទេស សហរដ្ឋ អាមេរិក កាលពីថ្ងៃទី១០ ខែវិច្ឆិកា ឆ្នាំ២០២១ កន្លងទៅនេះ បានដាក់ទណ្ឌកម្មដោយឯកតោភាគីលើ នាយ ឧត្តមសេនីយ៍ ចៅ ភិរុណ អគ្គនាយកនៃ អគ្គនាយកដ្ឋាន សម្ភារបច្ចេកទេស និង នាយឧត្តមនាវី ទៀ វិញ មេបញ្ជាការ កងទ័ព ជើងទឹក ដោយចោទថា ពាក់ព័ន្ធនឹងអំពើពុករលួយក្នុងការអភិវឌ្ឃតំបន់កងទ័ពជើងទឹករាម ខេត្តព្រះសីហនុ ហើយថា ជាការ អនុវត្ត ច្បាប់ Global Magnitsky។

ទណ្ឌកម្ម រួមមាន ទាំងការ មិនអនុញាតឲ្យ ឧត្តមសេនីយ៍ កម្ពុជា ទាំងពីរ រួមទាំងក្រុមគ្រួសារសាច់ញាតិ ទទួលបានទិដ្ឋការ ចូលទៅ កាន់សហរដ្ឋអាមរិក ហើយទ្រព្យសម្បត្តិ ដែលមាននៅក្នុងសហរដ្ឋអាមេរិក ឬគ្រប់គ្រង ដោយបុគ្គលទាំងពីររូបនេះនៅ សហរដ្ឋអាមេរិក នឹង ត្រូវបង្កក និងត្រូវរាយការណ៍ ជូនមកការិយាល័យ គ្រប់គ្រង អចលនទ្រព្យ បរទេស នៃ ក្រសួង រតនាគារ សហរដ្ឋ អាមរិក ផងដែរ ។

ក្រសួងការបរទេសកម្ពុជា បានចាត់ទុកថា យុទ្ធនាការលាបពណ៌ និងការដាក់ទណ្ឌកម្មជាឯកតោភាគីរបស់សហរដ្ឋអាមេរិកប្រឆាំងនឹងបុគ្គលសាធារណៈនៃរដ្ឋអធិបតេយ្យមួយ មិនត្រឹមតែបំពានលើច្បាប់អន្តរជាតិ និងបទដ្ឋានមូលដ្ឋាននៃទំនាក់ទំនងអន្តរជាតិប៉ុណ្ណោះទេ ប៉ុន្តែបានបង្ហាញពីការមាក់ងាយទាំងស្រុងដល់ឯករាជ្យភាពនិងជាការជ្រៀតជ្រែកយ៉ាងធ្ងន់ធ្ងរចូលកិច្ចការផ្ទៃក្នុងរបស់ប្រទេសផ្សេងទៀតផងដែរ។

«ការដាក់ទណ្ឌកម្មនេះ គឺជាការអនុវត្តផ្ទុយទៅនឹងសេចក្តីសម្រេចចិត្តរបស់ក្រុមប្រឹក្សាសិទ្ធិមនុស្ស (៤៦/៥) ដែលត្រូវបានអនុម័តក្នុងខែមីនា ឆ្នាំ២០២១ ហើយដែលបានធ្វើការថ្កោលទោសយ៉ាងខ្លាំងចំពោះការបន្តប្រើប្រាស់វិធានការដោយបង្ខិតបង្ខំជាឯកតោភាគីរបស់មហាអំណាចមួយចំនួន ជាឧបករណ៍ដាក់សម្ពាធលើប្រទេសអភិវឌ្ឍន៍តិចតួច និងប្រទេសកំពុងអភិវឌ្ឍន៍ សំដៅរារាំងប្រទេសទាំងនោះមិនឱ្យអនុវត្តសិទ្ធិស្វ័យសម្រេចក្នុងការជ្រើសរើសប្រព័ន្ធនយោបាយ សេដ្ឋកិច្ច និងសង្គមរបស់ខ្លួន»។ នេះបើតាមសេចក្តីថ្លែងការណ៍ដដែល។

ក្រសួងការបរទេសកម្ពុជា បានបញ្ជាក់បន្ថែមទៀតថា កម្ពុជាតែងតែបង្ហាញនូវបំណងប្រាថ្នាចង់ឱ្យមានទំនាក់ទំនងកាន់តែរឹងមាំនិងជិតស្និទ្ធជាងនេះ ទោះបីជាមានអតីតកាលដ៏ឈឺចាប់ជាមួយសហរដ្ឋអាមេរិកយ៉ាងណាក៏ដោយ។ ក្នុងសប្តាហ៍នេះ ក្រសួងការបរទេសសហរដ្ឋអាមេរិក បានបង្ហាញពីចំណាប់អារម្មណ៍របស់ខ្លួនក្នុងការ «ធ្វើការរួមគ្នាជាមួយកម្ពុជាក្នុងនាម ជាប្រធានអាស៊ានបន្ទាប់»។ ក៏ប៉ុន្តែទណ្ឌកម្មដែលដាក់ចេញដោយមិនស្របច្បាប់នេះ គឺជាការបោះជំហានខុសទិសដៅមួយទៀតដែលងាកចេញទាំងស្រុងពីស្មារតីមិត្តភាព និងកិច្ចខិតខំប្រឹងប្រែងជាថ្មី ក្នុងការជំរុញភាពជាដៃគូប្រកបដោយផ្លែផ្ការវាងប្រទេសទាំងពីរ នៅក្នុងវិស័យមួយចំនួនដូចជា ពាណិជ្ជកម្មនិងការវិនិយោគ ការប្រយុទ្ធប្រឆាំងភេរវកម្ម បេសកកម្មរក្សាសន្តិភាព ការរុករកអដ្ឋិធាតុទាហានអាមេរិកបាត់ខ្លួន(POW/MIA) ការធ្វើមាតុភូមិនិវត្តន៍ពលរដ្ឋខ្មែរ អ្នកស្ម័គ្រចិត្ត Peace Corps ទំនាក់ទំនងប្រជាជន និងប្រជាជន និងបញ្ហាសំខាន់ៗក្នុងតំបន់នៃផលប្រយោជន៍រួម។

នេះមិនមែនជាលើកទី១ទេ ដែលសហរដ្ឋអាមេរិក បានចេញវិធានការដាក់ទណ្ឌកម្មចំពោះមន្រ្តីយោធាជាន់ខ្ពស់កម្ពុជា ដោយឯកតោភាគី។ នាពេលកន្លងទៅសហរដ្ឋអាមេរិកក៏បានផ្សព្វផ្សាយចោទប្រកាន់ជាបន្តបន្ទាប់ពាក់ព័ន្ធនឹងការអភិវឌ្ឍ តំបន់កងទ័ពជើងទឹករាម ខេត្តព្រះសីហនុ និងការសាងសង់ព្រលានយ ន្តហោះនៅតំបន់តារាសាគរ ខេត្តកោះកុងផងដែរ។ សហរដ្ឋអាមេរិក ក៏បានរករឿងចំពោះការវាយកម្ទេចអគារតូចមួយ ដែលខ្លួនជួយសាងសង់នៅតំបន់រាមផងដែរ ៕