ជប៉ុន និងសហរដ្ឋអាមេរិកធ្វើសមយុទ្ធកងនាវាមុជទឹកនៅសមុទ្រចិនខាងត្បូង
តូក្យូ៖ កងកម្លាំងស្វ័យការពារដែនសមុទ្ររបស់ប្រទេសជប៉ុន (MSDF) និយាយថា ខ្លួនបានធ្វើសមយុទ្ធរួមគ្នាជាមួយកងទ័ពជើងទឹកអាមេរិកនៅសមុទ្រចិនខាងត្បូង កាលពីថ្ងៃអង្គារសប្តាហ៍នេះ ដោយបានបញ្ជូននាវាមុជទឹកទៅចូលរួមក្នុងសមយុទ្ធបែបនេះជាលើកដំបូង។
កងកម្លាំង MSDF បានប្រកាសថា ក្រៅពីនាវាមុជទឹក នាវាពិឃាតពីរគ្រឿង និងយន្តហោះល្បាតមួយគ្រឿងទៀតក៏បានចូលរួមក្នុងសមយុទ្ធនេះផងដែរ ខណៈកងទ័ពជើងទឹកអាមេរិកបានបញ្ជូននាវាពិឃាត និងយន្តហោះល្បាត។ សមយុទ្ធនេះ បើតាមសេចក្តីរាយការណ៍នោះ រួមមានការហ្វឹកហ្វឺនប្រឆាំងនាវាមុជទឹក ដែលពាក់ព័ន្ធនឹងការតាមដាននាវាចរណ៍ក្រោមទឹក។ កងកម្លាំង MSDF បន្ថែមថា នេះជាលើកទីមួយហើយ ដែលជប៉ុន និងអាមេរិកបានធ្វើសមយុទ្ធរួមគ្នានៅសមុទ្រចិនខាងត្បូងជាមួយនឹងនាវាមុជទឹក។
គួរបញ្ជាក់ថា ចិនបាននិងកំពុងបង្កើនវត្តមានរបស់ខ្លួននៅសមុទ្រចិនខាងត្បូង ដោយមធ្យោបាយមួយចំនួន ដូចជា ការសាងសង់កោះសិប្បនិម្មិត ដើម្បីបង្កើតមូលដ្ឋានយោធាជាដើម។ ទន្ទឹមនេះ សហរដ្ឋអាមេរិកក៏កំពុងព្យាយាមប្រឆាំងនឹងទង្វើបែបនេះផងដែរ ដោយបង្កើតក្របខណ្ឌសន្តិសុខថ្មីមួយនៅក្នុងតំបន់ឥណ្ឌូ-ប៉ាស៊ីហ្វិក ដោយបានហ៊ុំព័ទ្ធសមុទ្រចិនខាងត្បូង។ ក្រុមអ្នកសង្កេតការណ៍បាននិយាយថា សមយុទ្ធរួមគ្នានេះត្រូវបានរៀបចំឡើង ដើម្បីបញ្ជាក់ពីភាពជាដៃគូរបស់ជប៉ុន-អាមេរិក និងគោលបំណងរបស់ខ្លួនក្នុងការសម្រេចបាននូវតំបន់ឥណ្ឌូ-ប៉ាស៊ីហ្វិក ដោយសេរី និងបើកចំហ ហើយក៏ដើម្បីរក្សាប្រទេសចិនអោយស្ថិតក្រោមការឃ្លាំមើលផងដែរ៕ ប្រភព៖ NHK