Netflix ប្រឈមនឹងបណ្ដឹងលើរឿងភាគ The Unlikely Murder អំពីឃាតកម្មនាយករដ្ឋមន្ត្រីស៊ុយអែតលោក Olof Palme
ឯកសារផ្លូវច្បាប់ចេញផ្សាយកាលពីថ្ងៃអង្គារបង្ហាញថា ក្រុមហ៊ុនចាក់ផ្សាយវីដេអូតាមបណ្ដាញអ៊ីនធឺណែត Netflix ប្រឈមមុខនឹងបណ្តឹងបរិហារកេរ្តិ៍នៅប្រទេសស៊ុយអែត ជុំវិញរឿងភាគរបស់ខ្លួនឈ្មោះ The Unlikely Murderer ជាប់ពាក់ព័ន្ធជនសង្ស័យសំខាន់ក្នុងឃាតកម្មនាយករដ្ឋមន្ត្រីស៊ុយអែតលោក Olof Palme កាលពីឆ្នាំ ១៩៨៦ ។
តាមការចុះផ្សាយរបស់សារពត៌មានអាអេហ្វប៉េ បណ្ដឹងដែលដាក់ជូនអធិការបតីនៃប្រទេសស៊ុយអែតដែលកាន់សំណុំរឿងសេរីភាពនៃការបញ្ចេញមតិអះអាងថា ការបង្ហាញពីអតីតទីប្រឹក្សាផ្សាយពាណិជ្ជកម្មលោក Stig Engstrom ជាខ្មាន់កាំភ្លើង គឺជា «ករណីបរិហារកេរ្តិ៍យ៉ាងច្បាស់លាស់»។
លោក Engstrom ត្រូវបានគេស្គាល់ថាជាអ្នកប្រឆាំងយ៉ាងម៉ឺងម៉ាត់ចំពោះគោលនយោបាយឆ្វេងនិយមរបស់លោក Palme និងស្លាប់នៅឆ្នាំ ២០២០ ត្រូវបានគេដាក់ឈ្មោះថាជាជនសង្ស័យសំខាន់នៅក្នុងសំណុំរឿងឃាតកម្មក្នុងខែមិថុនា ឆ្នាំ ២០២០។ ប៉ុន្តែប្រធានរដ្ឋអាជ្ញាលោក Krister Petersson និយាយថា ដោយសារតែលោក Engstrom ស្លាប់បាត់ទៅហើយនោះ គ្មានការចោទប្រកាន់ណាមួយធ្វើឡើង ហើយសំណុំរឿងក៏ត្រូវបិទ។
លោក Palme ត្រូវបានគេបាញ់សម្លាប់នៅល្ងាចថ្ងៃទី ២៨ ខែកុម្ភៈ ឆ្នាំ ១៩៨៦ បន្ទាប់ពីចេញពីរោងកុនក្នុងក្រុង Stockholm ជាមួយប្រពន្ធរបស់លោក។ លោកត្រូវជនដៃដល់បាញ់ចំខ្នងហើយរត់គេចពីកន្លែងកើតហេតុ ចំណែកឯមេដឹកនាំស៊ុយអែតដែលកាលនោះវ័យ៥៩ឆ្នាំ ត្រូវស្លាប់ក្នុងថ្លុកឈាមលើចិញ្ចើមផ្លូវ។
លោក Engstrom បង្ហាញខ្លួនទៅប៉ូលិសក្នុងនាមជាសាក្សីមុនពេលការស៊ើបអង្កេត។ រឿង The Unlikely Murderer របស់ Netflix ដែលមានប្រាំវគ្គ ផ្អែកលើសៀវភៅដែលឈ្នះពានរង្វាន់ឆ្នាំ ២០១៨ ដោយអ្នករាយការណ៍ស៊ើបអង្កេតលោក Thomas Pettersson ដែលថាលោក Engstrom ជាអ្នកបាញ់លោក Palme បន្ទាប់មកក៏បិទបាំងសកម្មភាពរបស់លោកដោយធ្វើជាសាក្សី។
ការបង្ហាញបែបនេះបង្កឱ្យមានភាពចម្រូងចម្រាសក្នុងប្រទេសស៊ុយអែត។ ក្រុមហ៊ុន Netflix ការពាររឿងរបស់ខ្លួនថាជាការបំផុសគំនិតដោយសៀវភៅរបស់លោក Pettersson។ នៅចុងបញ្ចប់នៃវគ្គនីមួយៗនៃរឿងមាននិយាយថា លោក Engstrom មិនត្រូវបានគេបង្ហាញថាជាឃាតករនោះទេ។
អធិការបតីនៃការិយាល័យយុត្តិធម៌និយាយកាលពីថ្ងៃអង្គារថា អត្តសញ្ញាណរបស់បុគ្គលដែលដាក់ពាក្យបណ្តឹងបរិហារកេរ្តិ៍ត្រូវចាត់ទុកជាសម្ងាត់។
ក្រុមហ៊ុន Netflix កំពុងប្រឈមមុខនឹងការប្តឹងបរិហារកេរ្តិ៍លើរឿងភាគផ្សេងទៀត រួមទាំងរឿង Making a Murderer ដែលផលិតឡើងក្នុងឆ្នាំ ២០១៥ជាដើម។
ប្រភព៖ SCMP