ឥណ្ឌូនេស៊ីកំពុងតែតាក់តែងច្បាប់តម្រូវឱ្យក្រុមហ៊ុនបណ្ដាញសង្គមចែកប្រាក់ចំណូលឱ្យក្រុមហ៊ុនព័ត៌មានក្នុងស្រុក
អាជ្ញាធរឥណ្ឌូនេស៊ីកំពុងតែតាក់តែងច្បាប់មួយ ដែលតម្រូវឱ្យក្រុមហ៊ុនបណ្ដាញសង្គមយក្សដូចជា ក្រុមហ៊ុន Facebook ឬ ក្រុមហ៊ុន Google ចរចាជាមួយក្រុមហ៊ុនព័ត៌មាន ឬ ក្រុមហ៊ុនប្រព័ន្ធផ្សព្វផ្សាយនៅក្នុងស្រុក ដើម្បីបែងចែកប្រាក់ចំណូលឱ្យមានភាពយុត្តិធម៌។
ច្បាប់នេះមានទំនោរស្រដៀងនឹងអូស្ត្រាលីដែរ ដោយអូស្ត្រាលីបានអនុម័តច្បាប់នេះ កាលពីខែមីនាកន្លងទៅ ប៉ុន្តែបើតាមបទពិសោធន៍អូស្ត្រាលី ក្រុមហ៊ុនព័ត៌មានធំៗបាននាំគ្នាទៅចរចាជាមួយ Facebook ឬ Google បានមុន ដោយទុកឱ្យក្រុមហ៊ុនប្រព័ន្ធផ្សព្វផ្សាយតូចៗនៅត្រដាបត្រដួសដង្ហោយជំនួយពីរដ្ឋាភិបាល និងមហាសេដ្ឋីនានា។
បើយោងតាមសេចក្ដីព្រាងច្បាប់ ដែលរ៉យទ័រទទួលបាន ក្រៅពីតម្រូវឱ្យអង្គភាពព័ត៌មាន និងក្រុមហ៊ុនបណ្ដាញសង្គមធំៗចរចាជាមួយ អង្គភាពព័ត៌មានក្នុងស្រុក ខាងអាជ្ញាធរក៏អំពាវនាវឱ្យក្រុមហ៊ុនយក្សទាំងនោះជួយលុបបំបាត់ព័ត៌មានក្លែងក្លាយផងដែរ។ សេចក្ដីព្រាងនេះនៅដំណាក់កាលតាក់តែងនៅឡើយ ហើយមិនទាន់បញ្ជូនទៅសភានោះទេ។
លោក Wenseslaus Manggut ប្រធានសមាគមប្រព័ន្ធផ្សព្វផ្សាយតាមប្រព័ន្ធអ៊ីនធឺណិតឥណ្ឌូនេស៊ីបានប្រាប់រ៉យទ័រថា ច្បាប់នេះមានគោលដៅក្នុងការធានាឱ្យបាននូវការបែងចែកប្រាក់ចំណូលសមរម្យទៅកាន់ប្រព័ន្ធផ្សព្វផ្សាយក្នុងស្រុកណា ដែលផលិតព័ត៌មានល្អៗ។ អ្នកមកពីក្រសួងទំនាក់ទំនងរបស់ឥណ្ឌូនេស៊ីបានឱ្យដឹងថា គេនៅមិនទាន់ច្បាស់ថា សេចក្ដីព្រាងនេះនឹងបង្កើតចេញជាច្បាប់មួយដាច់ដោយឡែក ឬ ដាក់បញ្ចូលនៅក្នុងច្បាប់ដែលមានស្រាប់នោះទេ។
