ឡាវបំបែកកំណត់ត្រា ឆ្លងដ៏ខ្លាំងពុំធ្លាប់មានសោះ
ទីភ្នាក់ងារសារព័ត៌មានស៊ីនហួរបានចេញផ្សាយថា ប្រទេសឡាវ ក្នុងរបាយការណ៍ថ្ងៃព្រហស្បតិ៍ ទី២៥ វិច្ឆិកា ២០២១ មនុស្សរហូតដល់ទៅ ១៥០៤នាក់ទៀត ឆ្លងកូវីដ១៩ ក្នុងពេល២៤ម៉ោងប៉ុណ្ណោះ និងជាតួលេខឆ្លងប្រចាំថ្ងៃ ខ្ពស់បំផុតមិនធ្លាប់មានឡើយ ក្នុងប្រទេសដែលមានប្រជាជនសរុបជាង ៧លាននាក់មួយនេះ។ ក្រៅពីនេះ ក៏មានអ្នកជំងឺស្លាប់ម្នាក់ទៀត។
គិតត្រឹមពេលនេះ ឡាវមានករណីឆ្លង COVID-19 សរុប ៦៧,៣២២ករណី ក្នុងនោះមានអ្នកស្លាប់សរុប ១៤៣នាក់។ ឡាវចាក់វ៉ាក់សាំងបង្ការជំងឺ COVID-19 ប្រមាណ ៦.០៣លានដូសប៉ុណ្ណោះ ក្នុងនោះប្រជាជន ២.៧៨លាននាក់ (៣៨.២% នៃចំនួនប្រជាជនសរុប) បានទទួលការចាក់គ្រប់ដូស។
កាលពីថ្ងៃពុធម្សិលមិញនេះ ឡាវក៏បានប្រកាសរកឃើញអ្នកឆ្លង COVID-19 ក្នុងចំនួនច្រើនខ្លាំងដែរ រហូតដល់ទៅជាង ១៤០០ករណី៕