គណបក្សកាន់អំណាចសិង្ហបុរី នៅតែបន្តមិនទាន់រកឃើញអ្នកជំនួសតំណែងលោក លី សៀនឡុង
គណបក្សសកម្មភាពប្រជាជន (People’s Action Party – PAP) គណបក្សកាន់អំណាចរបស់ប្រទេសសិង្ហបុរី នៅតែបន្តរកមិនទាន់កំណត់យកសមាសភាពអ្នកជំនួសតំណែងរបស់ លោកនាយករដ្ឋមន្ត្រី លី សៀនឡុង ស្របពេលដែលគណបក្សនេះបានរៀបចំសន្និបាតប្រចាំឆ្នាំរបស់ខ្លួននៅក្នុងថ្ងៃអាទិត្យនេះ។
ពាក់ព័ន្ធនឹងបញ្ហានេះដែរ លោក លី សៀនឡុង ដែលជាអគ្គលេខាធិការនៃគណបក្ស PAP ក៏បានលើកឡើងថា ក្រុមជំនាន់ទី៤ ឬ នៅសិង្ហបុរីច្រើនតែហៅថា 4G ត្រូវការពេលវេលាបន្ថែមទៀតក្នុងការជ្រើសរើសមេដឹកនាំរបស់ខ្លួន។
តាមពិតទៅក្រុម 4G នេះ ធ្លាប់មានមេដឹកនាំរួចជាស្រេចហើយ ដោយអ្នកនយោបាយរូបនោះគឺ លោក ហេង ស្វីគៀត (Heng Swee Keat) ដែលលោកត្រូវបានតែងតាំងជាឧបការីទី១នៃអគ្គលេខាធិការគណបក្ស PAP កាលពីឆ្នាំ២០១៨ កន្លងទៅ។ តំណែងឧបការីទី១នេះហើយ ជាតំណែងនៃមេដឹកនាំបន្តវេនក្នុងគណបក្សកាន់អំណាចសិង្ហបុរី។
យ៉ាងណាមិញ កាលពីខែមេសា ឆ្នាំ២០២១នេះ លោក ហេង បានលាលែងចេញពីតំណែងពីមេដឹកនាំនៃក្រុមជំនាន់ទី៤។ លោកយល់ថា ស្របពេលដែលលោកមានអាយុ ៦០ឆ្នាំហើយ លោកគិតថា លោកនឹងមានពេលវេលាតិចតួចក្នុងការដឹកនាំប្រទេស ប្រកបដោយប្រសិទ្ធភាព ហេតុដូច្នេះហើយ ទើបលោកបើកផ្លូវឱ្យអ្នកមានអាយុតិចជាងលោក ធ្វើជាអ្នកស្នងតំណែងលោក លី សៀនឡុង។
កន្លងទៅ លោក លី សៀនឡុង បានលើកឡើងថា លោកនឹងលាលែងចេញតំណែងនៅពេលលោកមានអាយុ ៧០ឆ្នាំ ដែលត្រូវនឹងឆ្នាំ២០២២។ យ៉ាងណាមិញ ស្របពេលដែលស្ថានភាពកូវីដ-១៩ នៅរាលដាល ហើយជាពិសេសនៅពេលដែល លោក ហេង លាលែងចេញពីមេដឹកនាំក្រុម 4G នាយករដ្ឋមន្ត្រីសិង្ហបុរីរូបនេះបាននិយាយថា លោកនឹងបន្តតំណែងរហូតទាល់តែ ក្រុមមេដឹកនាំជំនាន់ទី ៤ រកឃើញមេដឹកនាំរបស់ខ្លួន។
ជាមួយនឹងស្ថានភាពនេះដែរ លោក លី បាននិយាយក្នុងសន្និបាតបក្សកាលពីថ្ងៃទី២៨ វិច្ឆិកាថា៖ «ស្របពេលដែលមានស្ថិរភាពហើយ ការកំណត់អ្នកបន្តវេនរបស់ខ្ញុំជាកិច្ចការដ៏សំខាន់មួយ ដែលមិនអាចទុកចោលជារៀងរហូតបានទេ»។
«ក្រុម 4G នឹងត្រូវការពេលវេលាយូរបន្តិចទៀតក្នុងការសម្រេចចិត្ត។ តែខ្ញុំជឿជាក់ថា ពួកគេនឹងដោះស្រាយដាច់ស្រេចនៅមុនពេលការបោះឆ្នោតនៅអាណត្តិក្រោយ»។ នេះបើតាមការលើកឡើងបន្តរបស់លោក លី។
សិង្ហបុរីនឹងរៀបចំការបោះឆ្នោតលើកក្រោយទៀត នៅឆ្នាំ២០២៥ ខាងមុខនេះ។
លោកនាយករដ្ឋមន្ត្រី លី សៀនឡុង បានលើកឡើងថា ក្រុមថ្នាក់ដឹកនាំជំនាន់ទី ៤ មិនមែនចាត់ទុករឿងជ្រើសរើសអ្នកបន្តវេនជារឿងលេងសើចមួយនោះទេ ដោយសារតែរឿងនេះជាការកំណត់ជោគវាសនារបស់ប្រទេសសិង្ហបុរី។
បន្ថែមពីលើនេះទៀត លោក លី បានសង្កត់ធ្ងន់ថា មេដឹកនាំសិង្ហបុរីមិនមែនជា «ចៅហ្វាយ» ឬ «អ្នកឈ្នះការប្រណាំងប្រជែង» នោះទេ តែជាអ្នកដែលអាចធ្វើឱ្យក្រុមទាំងមូលមានសាមគ្គីភាព ហើយធ្វើឱ្យក្រុមទាំងមូលបញ្ចេញឱ្យអស់ពីសមត្ថភាព។
ក្រោយពីលោក ហេង លាលែងពីតំណែង សារព័ត៌មានក្នុងស្រុកសិង្ហបុរី ក៏ដូចជាមជ្ឈដ្ឋានអ្នកតាមដានស្ថានភាពនយោបាយសិង្ហបុរីនានាបានសម្លឹងមើលឃើញបេក្ខភាពចំនួន ៣រូប ដែលអាចក្លាយជាសមាសភាពអ្នកស្នងតំណែងជានាយករដ្ឋមន្ត្រីសិង្ហបុរី។
អ្នកនយោបាយទាំង ៣រូបនោះគឺ (១) លោក ឆាន់ ឈុនស៊ីង (Chan Chun Sing) អាយុ ៥១ឆ្នាំ បច្ចុប្បន្នជារដ្ឋមន្ត្រីក្រសួងអប់រំ (២) លោក អូ យ៉េគង់ (Ong Ye Kung) អាយុ ៥១ឆ្នាំ ដែលពេលនេះជារដ្ឋមន្ត្រីក្រសួងសុខាភិបាល និង (៣) លោក ឡូរិន វង់ (Lawrence Wong) អាយុ ៤៨ឆ្នាំ កំពុងកាន់តំណែងជារដ្ឋមន្ត្រីក្រសួងហិរញ្ញវត្ថុ។
យ៉ាងណាមិញ សិង្ហបុរីមាននាយករដ្ឋមន្ត្រី ៣ជំនាន់មកហើយ ដោយជំនាន់ទី១គឺ លោក លី ក្វាន់យូ ដែលជាស្ថាបនិកនៃសាធារណរដ្ឋសិង្ហបុរី ដោយលោកកាន់តំណែងអស់រយៈពេល ៣១ឆ្នាំ។ ជំនាន់ទី២ គឺ លោក ហ្គូ ចុកតុង (Goh Chok Tong) ដែលកាន់តំណែងចាប់ពីឆ្នាំ១៩៩០ ដល់ឆ្នាំ២០០៤។ ជំនាន់ទី៣ ដែលជាជំនាន់បច្ចុប្បន្នគឺ ស្ថិតក្រោមការដឹកនាំរបស់លោក លី សៀនឡុង ដោយលោកកាន់តំណែងបានប្រមាណ ១៧ឆ្នាំមកហើយ៕
ប្រភព៖ CNA
