ចិនត្រៀមខ្លួនក្នុងការធ្វើសង្គ្រាម ខណៈដែលសមាជិកសភាអាមេរិកធ្វើទស្សនកិច្ចនៅតៃវ៉ាន់
ចិនត្រៀមលក្ខណៈក្នុងការធ្វើសង្គ្រាមនៅតំបន់ច្រកសមុទ្រតៃវ៉ាន់ ខណៈពេលដែលប្រតិភូនៃសមាជិកសភាជាន់ទាបអាមេរិកចំនួន ៥រូប បានមកដល់តៃវ៉ាន់កាលពីយប់ថ្ងៃព្រហស្បតិ៍សប្ដាហ៍មុន ដោយមិនបានប្រកាសទុកជាមុន។
យ៉ាងណាមិញ នេះជាដំណើរទស្សនកិច្ចរបស់ក្រុមសមាជិកសភាអាមេរិកលើកទី២ហើយ ក្នុងខែវិច្ឆិកាឆ្នាំនេះ។
កាលពីថ្ងៃសុក្រកន្លងទៅ បញ្ជាការដ្ឋានភូមិភាគខាងកើតនៃកងទ័ពរំដោះប្រជាជនចិនប្រជាមានិត (PLA) បានប្រកាសថាខ្លួន «បានរៀបចំកងកម្លាំងជើងទឹក និងជើងអាកាស ដើម្បីបន្តការល្បាតក្នុងការត្រៀមលក្ខណៈសម្រាប់ប្រយុទ្ធ នៅគោលដៅច្រកសមុទ្រតៃវ៉ាន់»។
ប្រភពខាងលើបានបន្តថា៖ «សកម្មភាពពាក់ព័ន្ធនានាមានភាពចាំបាច់ក្នុងការឆ្លើយតបនឹងស្ថានការណ៍ក្នុងពេលបច្ចុប្បន្ននាឯច្រកសមុទ្រតៃវ៉ាន់។ តៃវ៉ាន់ជាផ្នែកមួយនៃដែនដីរបស់ចិន ហើយការការពារអធិបតេយ្យភាពជាតិ និងបូរណភាពដែនដីជាបេសកកម្មដ៏ពិសិដ្ឋរបស់យើង»។
យ៉ាងណាមិញ ខាងកងទ័ពចិនមិនបានបញ្ជាក់ពីព័ត៌មានលម្អិតថា ត្រៀមខ្លួនសម្រាប់ស្ថានការណ៍អ្វីឱ្យប្រាកដនោះទេ។
ក្រសួងការពារជាតិតៃវ៉ាន់បានរាយការណ៍ថា ចិនដីគោកបានបញ្ជូនយន្តហោះចម្បាំងចំនួន ៨គ្រឿងចូលក្នុងដែនអាកាសរបស់ខ្លួនកន្លងពេលថ្មីៗនេះ។
ប្រតិភូសមាជិកសភាអាមេរិកបានចូលទៅជួបជាមួយប្រធានាធិបតីតៃវ៉ាន់អ្នកស្រី ឆៃ អ៊ីងវែន (Tsai Ing Wen) ហើយបានបង្ហាញពីការប្ដេជ្ញាចិត្តរបស់អាមេរិកចំពោះតៃវ៉ាន់ ហើយបានសរសើរពីវឌ្ឍនភាពនានារបស់តៃវ៉ាន់៕
ប្រភព៖ Reuters
