គណៈចលនាមហាជននៃគណៈកម្មាធិការកណ្តាលគណបក្សប្រជាជនកម្ពុជានិង គណៈចលនាមហាជនមជ្ឈិម​បក្សកុម្មុយនីស្តវៀតណាម បានជួបពិភាក្សាដើម្បីពង្រឹងកិច្ចសហប្រតិបត្តិការទ្វេភាគីនិង​ទិសដៅកិច្ចសហប្រតិ​បត្តិការទៅថ្ងៃអនាគត ។ជំនួបពិភាក្សាការងារតាមប្រព័ន្ធវីដេអូរវាង ប្រធានគណៈចលនាមហាជន នៃគណៈ​កម្មា​ធិការកណ្តាលគណបក្សប្រជាជនកម្ពុជាលោកជំទាវកិត្តិសង្គហបណ្ឌិត ម៉ែន សំអន និង ប្រធានគណៈចលនា​មហា​ជនមជ្ឈិមបក្សកុម្មុយនីស្តវៀតណាមលោកជំទាវ ប៊ួយ ធី មិញ ហាយបានធ្វើឡើងនៅថ្ងៃទី២៩ ខែវិច្ឆិកា ឆ្នាំ២០២១នេះដោយផ្តើតទៅលើការពិភាក្សាអំពីចំណងមិត្តភាព កិច្ចសហប្រតិបត្តិការទ្វេភាគីនិងទិស​ដៅកិច្ច​សហប្រតិបត្តិការទៅថ្ងៃអនាគតរវាងគណបក្សទាំងពីរ។

នៅក្នុងជំនួបនេះលោកជំទាវកិត្តិសង្គហបណ្ឌិត ម៉ែន សំអនបានសម្តែងនូវសេចក្តីរីករាយដែល​បានជួបពិភាក្សា​ជាមួយ​លោកជំទាវ ប៊ួយ ធី មិញ ហាយព្រមទាំងបានចូលរួមអបអរសាទរលោកជំទាវ​ដែលត្រូវបានជ្រើសតាំង​ជាលេខាមជ្ឈិមបក្ស និងជាប្រធានគណៈចលនាមហាជនមជ្ឈិមបក្សកុម្មុយនីស្តវៀតណាម នៅក្នុងអាណត្តិ​ថ្មី​នេះ។

ក្នុងជំនួបលើកទី៤នៃ គណៈចលនាមហាជននៃគណៈកម្មាធិការកណ្តាលគណបក្សប្រជាជនកម្ពុជា និងគណៈ​ចលនាមហាជនមជ្ឍិមបក្សកុម្មុយនីស្តវៀតណាមនេះភាគីទាំងពីរបានអះអាងថា ប្រវត្តិនៃទំនាក់ទំនង​ជាបងប្អូន​រវាងគណបក្សនិងប្រទេសទំាំងពីរ ដែលតែងតែជួយគ្នាទៅវិញទៅមកគ្រប់កាលៈទេសៈ បានចាក់ឫសយ៉ាងជ្រៅ​ទៅក្នុងក្រអៅបេះដូងនៃថ្នាក់ដឹកនាំ កម្មាភិបាលគ្រប់លំដាប់ថ្នាក់ និងប្រជាជននៃប្រទេសទាំងពីរ។ ភាគី​ទាំងពីរ​បានជូនព័ត៌មានគ្នាទៅវិញទៅមក អំពីសភាពការណ៍លេចធ្លោរបស់គណបក្ស និងប្រទេសនីមួយៗជាពិសេស​បទ​ពិសោធន៍ល្អៗ និងយន្តការសក្តិសិទ្ធនានា ក្នុងដំណាក់កាលនៃការរីករាលដាលជំងឺកូវីដ១៩ ព្រមទាំងទិសដៅ​ក្នុងការបង្កើនកិច្ចសហប្រតិបត្តិការរវាងគណបក្សនិងប្រទេសទាំងពីរ ដើម្បីផលប្រយោជន៍របស់ប្រជា​ជននៃ​ប្រទេសទាំងពីរ។

ភាគីទាំងពីរបានវាយតម្លៃខ្ពស់ចំពោះលទ្ធផលប្រកបដោយផ្លែផ្កាក្នុងការអនុវត្តស្មារតីនៃកិច្ចប្រជុំកំពូល និងកិច្ច​ព្រម​ព្រៀងរវាងគណបក្សទាំងពីរ  ដែលរួមមាន  កម្មវិធីអាហារូបករណ៍ ការផ្លាស់ប្តូរគណៈប្រតិភូជាន់ខ្ពស់ គណៈ​ប្រតិភូជំនាញ អង្គការមហាជន និងការសម្របសម្រួលសេវាកម្មសុខភាពនានា​ជូនប្រជាជនតាមបណ្តា​ខេត្តជាប់​ព្រំដែន និងសិស្សនិស្សិតកម្ពុជាដែលកំពុងសិក្សានៅប្រទេសវៀតណាមជាដើម។ បន្ថែមពីលើនេះ ភាគីទាំង​ពីរ​បានឯកភាព បន្តថែរក្សា និងពង្រឹងគ្រប់យន្តការទំនាក់ទំនងនៅគ្រប់ថ្នាក់រវាងគណបក្ស និងប្រទេសទាំងពីរ ដើម្បី​រួមគ្នាដោះស្រាយបញ្ហានានាឲ្យទាន់ពេលវេលា និងមានប្រសិទ្ធភាព៕