ទំព័រដើមព័ត៌មានកិច្ចចរចានុយក្លេអ៊ែររវាងអ៊ីរ៉ង់ និងមហាអំណាចពិភពលោកនឹងចាប់ផ្ដើមវិញក្រោយពីផ្អាកជិត៦ខែ

កិច្ចចរចានុយក្លេអ៊ែររវាងអ៊ីរ៉ង់ និងមហាអំណាចពិភពលោកនឹងចាប់ផ្ដើមវិញក្រោយពីផ្អាកជិត៦ខែ

កិច្ច​ចរចា​រវាង​អ៊ីរ៉ង់​ និង​មហា​អំណាច​ពិភពលោក​ដើម្បី​ស្ដារ​កិច្ចព្រមព្រៀង​នុយក្លេអ៊ែរ​ឆ្នាំ​ ២០១៥ បាន​ចាប់​ផ្ដើម​ឡើង​វិញ​កាល​ថ្ងៃ​ចន្ទ ទី​២៩​វិច្ឆិកា​ បន្ទាប់​ពី​ការ​ផ្អាក​ជិត​ ៦ ខែ​ ប៉ុន្តែ​ការ​រំពឹង​ទុក​សម្រាប់​ការ​ទទួល​លទ្ធផល​ធំ​ដុំ​ណា​មួយ​បាន​ធ្លាក់​ចុះ​យ៉ាង​ខ្លាំង​។

បន្ទាប់​ពី​ការ​ពិភាក្សា​ទ្វេភាគី​កាល​ពី​ថ្ងៃ​អាទិត្យ​ អ៊ីរ៉ង់ រុស្ស៊ី ចិន ចក្រភពអង់គ្លេស បារាំង អាល្លឺម៉ង់ និង​សហភាព​អឺរ៉ុប​បាន​យល់ព្រម​ចាប់​ផ្ដើម​ការ​ចរចា​ឡើង​វិញ​នៅ​ថ្ងៃ​ចន្ទ​។ ជា​ថ្មី​ម្ដង​ទៀត​ អ៊ីរ៉ង់​បាន​បដិសេធ​មិន​ធ្វើ​ការ​ចារចា​ដោយ​ផ្ទាល់​ជា​មួយ​សហរដ្ឋអាមេរិក​។

លទ្ធផល​នៃ​ការ​ចរចា​នេះ​អាច​ជួយអោយ​​អ៊ីរ៉ង់​រួចខ្លួន​ពី​ការ​ដាក់​ទណ្ឌកម្ម​លោក​ខាង​លិច​ ឬ​ឈាន​ដាល់​ការ​រឹត​បន្តឹង​បន្ថែម​ទៀត​លើ​សេដ្ឋកិច្ច​ និង​ការ​កើន​ឡើង​ការ​វាយ​ប្រហារ​របស់​អ៊ីស្រាអែល​ទៅ​លើ​រោង​ចក្រ​នុយក្លេអ៊ែរ​របស់​អ៊ីរ៉ង់​។

កិច្ចព្រមព្រៀង​នុយក្លេអ៊ែរ​ឆ្នាំ​២០១៥ បាន​ដក​ទណ្ឌកម្ម​អន្តរជាតិ​លើ​ប្រទេស​អ៊ីរ៉ង់ ជា​ថ្នូរ​នឹង​ការ​ដាក់​កម្រិត​លើ​កម្មវិធី​នុយក្លេអ៊ែរ​របស់​អ៊ីរ៉ង់​។ ប៉ុន្តែ​កាល​ពី​ឆ្នាំ​ ២០១៨ អតីត​ប្រធានាធិបតី​អាមេរិក​លោក​ដូណាល់ ត្រាំ​បាន​ដក​ខ្លួន​ចេញ​ពី​កិច្ចព្រមព្រៀង ហើយ​ដាក់​ទណ្ឌកម្ម​ឡើង​វិញ​ទៅ​លើ​អ៊ីរ៉ង់​វិញ​។ អ៊ីរ៉ង់​បាន​ឆ្លើយ​តប​ដោយ​រំលោភ​លក្ខខណ្ឌ​ ដោយ​ធ្វើ​ការ​បន្សុទ្ធ​អ៊ុយរ៉ាន្យោម​ កាន់​តែ​ច្រើន​ទៅ​ៗ និង​សុទ្ធ​ទៅ​ៗ​ ធ្វើ​ឱ្យ​មាន​ការ​ព្រួយបារម្ភ​ថា​អ៊ីរ៉ង់​អាច​ផលិត​អាវុធ​នុយក្លេអ៊ែរ​ក្នុង​រយៈ​ពេល​ដ៏​ខ្លី​។

បន្ទាប់​ពី​ប្រធានាធិបតី​អាមេរិក​លោក​ចូ បៃដិន​ចូល​កាន់​អំណាច​នៅ​ដើមឆ្នាំ​នេះ​មក​ ភាគី​ទាំង​សង​ខាង​បាន​បង្ហាញ​ឆន្ទៈ​ចង់​ស្ដារ​កិច្ចព្រមព្រៀង​នេះ​ឡើង​វិញ​ ប៉ុន្តែ​អ៊ីរ៉ង់​បាន​បដិសេធ​មិន​ធ្វើ​ការ​ចរចា​ដោយ​ផ្ទាល់​ជា​មួយ​អាមេរិក​។ បន្ទាប់​ការ​ចរចា​ ៦ ជុំ​ ភាគី​ទាំង​ពីរ​មិន​បាន​យល់ព្រម​លើ​អ្វី​មួយ​នៅ​ឡើយ​ទេ​ ហើយ​បាន​ផ្អាក​ការ​ចរចា​ដោយ​មិន​កំណត់​ថ្ងៃ​បើក​វិញ​។

ចាប់​តាំង​ពី​ពេល​នោះ​មក​ប្រទេស​បាន​តែងតាំង​ប្រធានាធិបតី​ថ្មី​​មាន​និន្នាការ​នយោបាយ​បែប​អភិរក្សនិយម ​ប្រឆាំង​នឹង​លោក​ខាង​លិច ដែល​បាន​សន្យា​ថា​នឹង​បង្កើន​ការ​ទាមទារ​ក្នុង​ការ​ចរចា​។ ស្រប​ពេល​ជា​មួយ​គ្នា​នេះ​ មាន​ការ​សង្ស័យ​ថា​អ៊ីស្រាអែល​បាន​ធ្វើ​ការ​វាយ​ប្រហារ​ទៅ​លើ​កម្មវិធី​នុយក្លេអ៊ែរ​ និង​ការ​ធ្វើ​ឃាត​អ្នក​វិទ្យាសាស្ត្រ​។

ការ​ជាប់​គាំង ទំហំ​នៃ​ការ​ទាមទារ​របស់​អ៊ីរ៉ង់​ និន្នាការ​របស់​រដ្ឋបាល​ថ្មី​របស់​អ៊ីរ៉ង់ ការ​វាយ​ប្រហារ​ទៅ​លើ​អ៊ីរ៉ង់ និង​ការ​ភ័យ​ខ្លាច​របស់​លោក​ខាង​លិច​ថា​អ៊ីរ៉ង់​កំពុង​ជំរុញ​កម្មវិធី​អាវុធ​នុយក្លេអ៊ែរ​របស់​ខ្លួន​ដោយ​សម្ងាត់​ បាន​បង្កើត​ឱ្យ​អារម្មណ៍​ទុទ្ទិដ្ឋិនិយម​ក្នុង​ចំណោម​អ្នក​ចរចា​។

ប្រសិន​បើ​ការ​ចរចា​បរាជ័យ សហរដ្ឋអាមេរិក​ និង​សម្ព័ន្ធមិត្ត​របស់​ខ្លួន​អាចមាន​ការ​​ប្រឈម​មុខ​ដាក់​គ្នា​ជា​មួយ​អ៊ីរ៉ង់​នៅ​ទី​ភ្នាក់ងារ​ថាមពល​បរមាណូ​អន្តរជាតិ (IAEA) នៅ​ខែ​ក្រោយ​ ដោយ​កោះហៅ​កិច្ចប្រជុំ​អាសន្ន​។ នាយករដ្ឋមន្ត្រី​អ៊ីស្រាអែល​គឺ​កំពុង​កសាង​ណាហ្វតាលី បេនណេត​គឺ​កំពុង​កសាង​រណសិរ្ស​ប្រសិន​ការ​ចរចា​បរាជ័យ​។

យ៉ាង​ណា​មិញ ​អ្នក​វិភាគ​មួយ​ចំនួន​គិត​ថា​សម្ពាធ​សេដ្ឋកិច្ច​ និង​នយោបាយ​នៅ​ពេល​បច្ចុប្បន្ន​នៅ​មិន​ទាន់​គ្រប់គ្រាន់​ដើម្បី​ជំរុញ​ឱ្យ​អ៊ីរ៉ង់​ត្រឡប់​ទៅ​អនុលោម​តាម​កិច្ចព្រមព្រៀង​វិញ​ទេ​ ប៉ុន្តែ​​បាតុកម្ម​តវ៉ា​កង្វះ​ទឹក​ប៉ុន្មាន​សប្ដាហ៍​ចុង​ក្រោយ​នេះ​អាច​បង្ហាញ​ភាព​ទន់​ខ្សោយ​ផ្ទៃ​ក្នុង​របស់​អ៊ីរ៉ង់​។ ការ​ដក​ទណ្ឌកម្ម​សេដ្ឋកិច្ច​គឺ​នៅ​តែ​ជា​គោលដៅ​ដ៏​ពេញ​និយម​មួយ​នៅ​ក្នុង​ប្រទេស​អ៊ីរ៉ង់ ប៉ុន្តែ​របប​បច្ចុប្បន្ន បាន​ធ្វើ​តិចតួច​ដើម្បី​រៀប​ចំ​ប្រទេស​ជាតិ​ខាង​នយោបាយ​សម្រាប់​ការ​លះបង់​ ដែល​អាច​ជា​ចាំ​បាច់​៕

ប្រភព៖ The Guardian

- Advertisement -spot_img
spot_img
ឆាយ រត្ថា
លោក ឆាយ រត្ថា ជាបុគ្គលិកផ្នែកព័ត៌មានវិទ្យា នៃអគ្គនាយកដ្ឋានវិទ្យុ និងទូរទស្សន៍ អប្សរា

ព័ត៌មានជាប់ទាក់ទង

- Advertisement -spot_img

អត្ថបទវិភាគ

ព័ត៌មានថ្មី

- Advertisement -spot_imgspot_img

ព័ត៌មានពេញនិយម