កណ្តាល ៖ លោក ណុប ដារ៉ា អភិបាលរងខេត្តកណ្តាល នាថ្ងៃទី ២៩ ខែវិច្ឆិកា ឆ្នាំ២០២១នេះ បានដឹកនាំក្រុមការងារចម្រុះ ចុះត្រួតពិនិត្យសកម្មភាពអាជីវកម្មជីកខ្សាច់ និងការដឹកជញ្ជូនដី ក្នុងការដ្ឋានចំនួន២កន្លែង ស្ថិតនៅក្នុងស្រុកកណ្តាលស្ទឹង ខេត្តកណ្តាល ។ លោកអភិបាលរងខេត្តបានមានប្រសាសន៍ថា ក្រុមការងារចម្រុះបានចុះពិនិត្យ និងផ្អាកអាជីវកម្មជីកដីខ្សាច់ខាងលើជាបណ្តោះអាសន្មដោយសារតែពុំទាន់មានអាជ្ញាប័ណ្ណអនុញ្ញាតិឱ្យធ្វើអាជីវកម្ម និងអាជ្ញាប័ណ្ណដែលហួសសពុលភាព ។

លោកបានណែនាំដល់ អាជ្ញាធរស្រុកកណ្តាលស្ទឹង ត្រូវចុះស្រង់ស្ថិតិរាល់អាជីវកម្មរ៉ែទាំងឡាយណាដែលគ្មានអាជ្ញាប័ណ្ណ ឬអាជ្ញាប័ណ្ណហួសសុពលភាពឱ្យអស់ ហើយត្រូវណែនាំឱ្យម្ចាស់អាជីវកម្មទាំងនោះ ត្រូវស្នើសុំធ្វើអាជ្ញាប័ណ្ណថ្មីឬបន្តសុពលភាពអាជ្ញាប័ណ្ណរបស់ខ្លួនឡើងវិញ ឱ្យបានត្រឹមត្រូវស្របតាមច្បាប់កំណត់ និងគោរពអនុវត្តឱ្យបានតាមកិច្ចសន្យា។

ក្នុងការចុះត្រួតពិនិត្យរណ្តៅដីទាំង២ខាងលើដែលរណ្តៅទី១ របស់លោក ថុន ផាន់ណារ៉ូល មានទីតាំងស្ថិតក្នុងភូមិច្រឡាំង ឃុំរលាំងកែន ក្រុមការងារចម្រុះបានរកឃើញថា ទីតាំងខាងលើមានសកម្មភាពជីកដីក្នុងទីតាំងចាស់ និងទីតាំងកំពុងស្នើសុំអាជ្ញាប័ណ្ណ និងពុំមានរបងព័ទ្ធជុំវិញការដ្ឋាន និងគ្មានលក្ខណៈបចេ្ចកទេសត្រឹមត្រូវក្នុងការជីកនោះទេ ។

ចំណែករណ្តៅដីទី២ របស់លោក ឡាង លីហួ ស្ថិតក្នុងភូមិ អន្លង់រមៀតខាងត្បូង ឃុំអន្លង់រមៀត កំពុងមានសកម្មភាពធ្វើអាជីវកម្មចំនួន ១រណ្តៅដែលមានទំហំ ២៥៩៣១,២ម៉ែត្រ ដែលមានជម្រៅ ៨,៣៤ម៉ែត្រ ហើយក្រុមការងារបានវាស់វែងជាក់ស្តែងរកឃើញថារណ្តៅនេះគឺខុសតាមគោលការណ៍របស់ក្រសួងបានណែនាំ និងអាជ្ញាប័ណ្ណហួសសុពលភាព។ លោកបន្តថា ដើម្បីដំណើរការអាជីវកម្មឡើងវិញបាន ទាល់តែ ម្ចាស់អាជីវកម្ម សុំច្បាប់ចេញពីរដ្ឋបាលខេត្ត ក្រសួង និងមន្ទីររ៉ែ និងថាមពលស្រប់ច្បាប់ ទើបអាចប្រកបអាជីវកម្មបាន ។

ទន្ទឹមនឹងនេះដែរ លោកក៏បានជម្រុញដល់ មន្ទីរពាក់ព័ន្ធ និងកងកម្លាំងមានសមត្ថកិច្ច ត្រូវបន្តចាត់វិធានការឱ្យបានម៉ឺងម៉ាត់ ដល់ម្ចាស់អាជីវកម្ម ឱ្យអនុវត្តតាមកិច្ចសន្យា និងច្បាប់ពាក់ព័ន្ធនានា រាល់ការដឹកដី ដឹកខ្សាច់ ត្រូវអនុវត្តតាមបទដ្ឋានបច្ចេកទេសត្រឹមត្រូវ ដឹកកុំឱ្យហុយ និងជ្រុះខ្សាច់មកលើផ្លូវ ដែលបានធ្វើឱ្យប៉ះពាល់ដល់អ្នកធ្វើដំណើរ និងប្រជាពលរដ្ឋរស់នៅតាមដងផ្លូវ និងដើម្បី ចូលរួមចំណែក ចំពោះ តម្រូវការ នៃ ការអភិវឌ្ឍ សេដ្ឋកិច្ច តែ ការប្រកប អាជីវកម្ម នោះ ត្រូវគោរព តាម បទដ្ឋាន បច្ចេកទេស មិនត្រូវ ធ្វើឱ្យប៉ះពាល់ ដ ល់ សហគមន៍ ជីវភាព និង សុខុមាលភាព ប្រជាពលរដ្ឋ ឡើយ ។

លោកបានបន្ថែមថា ក្រុមការងារនឹងបន្តចុះពិនិត្យតាម ការដ្ឋានអាជីវកម្មជាបន្តបន្ទាប់ទៀត ដើម្បីពង្រឹងការគ្រប់គ្រង និងកាត់បន្ថយហានិភ័យនានា ដែលប៉ះពាល់ដល់បរិស្ថាន និងបង្កគ្រោះថ្នាក់ដល់ប្រជាពលរដ្ឋ ដែលនៅជិតតំបន់នោះ និងអ្នកធ្វើដំណើរតាមដងផ្លូវ ។ សូមបញ្ជាក់ថា ប្រជាពលរដ្ឋដែលមានដីស្រែនៅក្បែរកន្លែងប្រកបអាជីវកម្មជីកដីបានសំណូមពរដល់ម្ចាស់អាជីវកម្មមេត្តាធ្វើរបងឱ្យបានត្រឹមត្រូវដើម្បីចៀសវាងបញ្ហាគ្រោះថ្នាក់ផ្សេងៗ និងមិនត្រូវជីកបំពានប៉ះពាល់ដល់ដីស្រែរបស់ពួកគាត់ឡើយព្រមទាំងត្រូវគោរពតាមអាជ្ញាប័ណ្ណដែលក្រសួងអនុញ្ញាតអោយធើ្វអាជីវកម្ម ៕ ឆ ដា