ឥណ្ឌា និងរុស្សីចុះកិច្ចព្រមព្រៀងយោធា បើទោះបីជាមានហានិភ័យទណ្ឌកម្មពីអាមេរិកក៏ដោយ
កាលពីថ្ងៃចន្ទ រុស្សី និងឥណ្ឌាបានចុះហត្ថលេខាលើកិច្ចព្រមព្រៀងមួយចំនួនជុំវិញកិច្ចសហប្រតិបត្តិការបច្ចេកទេសយោធា បើទោះបីជាមានហានិភ័យរងការដាក់ទណ្ឌកម្មពីអាមេរិកក៏ដោយ។
រដ្ឋមន្ត្រីការពារជាតិឥណ្ឌាលោករាជណាត ស៊ីង បានជួបពិភាក្សាជាមួយរដ្ឋមន្ត្រីការពាររុស្សីលោកសឺហ្គេ ស៊ូហ្គូប៉ុន្មានម៉ោងមុនជំនួបរវាងនាយករដ្ឋមន្ត្រីឥណ្ឌាលោកណារិនដ្រា ម៉ូឌី និងប្រធានធិបតីរុស្សីលោកវ៉្លាឌីមៀរ ពូទីន។ បន្ទាប់កិច្ចប្រជុំលោកស៊ីងបានប្រកាសថា «កិច្ចព្រមព្រៀង /កិច្ចសន្យា /ពិធីសារមួយចំនួនត្រូវបានចុះហត្ថលេខាទាក់ទងនឹងអាវុធធុនតូច និងកិច្ចសហប្រតិបត្តិការយោធា»។
កិច្ចព្រមព្រៀងទាំងនេះរួមមានមានកិច្ចសហប្រតិបត្តិការរវាងកងកម្លាំងយោធាប្រទេសទាំងពីរ រួមជាមួយកិច្ចសហប្រតិបត្តិការលើបញ្ហាផ្គត់ផ្គង់ និងអភិវឌ្ឍន៍អាវុធ និងឧបករណ៍យោធាផងដែរ។ ប្រទេសទាំងពីរបានយល់ព្រមលើកិច្ចសន្យាមួយដើម្បីផលិតកាំភ្លើង AK-203 ចំនួន ៥០០.០០០ ដើមនៅរដ្ឋអ៊ូតតា ប្រាដេសប្រទេសឥណ្ឌា។
យ៉ាងណាមិញ កាលពីឆ្នាំ ២០១៧ សភាអាមេរិកបានអនុម័តច្បាប់ស្ដីពីការប្រឆាំងសត្រូវរបស់អាមេរិកតាមរយៈការដាក់ទណ្ឌកម្ម។ ក្រោមច្បាប់នេះប្រទេសរុស្សី អ៊ីរ៉ង់ និងកូរ៉េខាងជើងត្រូវបានចាត់ទុកជាសត្រូវរបស់អាមេរិក ហើយអនុញ្ញាតឱ្យរដ្ឋាភិបាលអាមេរិកដាក់ទណ្ឌកម្មលើអ្នកពាក់ព័ន្ធនឹងកិច្ចសហប្រតិបត្តិការជាមួយសត្រូវទាំងនេះលើប្រធានបទមួយចំនួន ដូចជាយោធា និងថាមពល។ ច្បាប់នេះត្រូវបានគេរិះគន់ថាលើសពីយុត្តាធិការរបស់សហរដ្ឋអាមេរិក ហើយអាចរំលោភច្បាប់អន្តរជាតិ។
កាលពីឆ្នាំ២០១៨ អាមេរិកបានប្រើច្បាប់នេះដាក់ទណ្ឌកម្មលើសមាជិកមួយចំនួននៃកងទ័ពចិន ដែលពាក់ព័ន្ធទៅនឹងការនាំចូលយន្តហោះចម្បាំង និងមីស៊ីលការពារដែនអាកាសពីរុស្សី។ អាមេរិកក៏ធ្លាប់គំរាមដាក់ទណ្ឌកម្មទៅលើក្រុមហ៊ុនអាល្លឺម៉ង់ដែលពាក់ព័ន្ធនឹងគម្រោងបំពង់បង្ហូរឧស្ម័ន Nord Stream 2 របស់រុស្សី។
កាលពីខែមុនក្រុងវ៉ាស៊ីនតោនបាននិយាយថាប្រទេសឥណ្ឌាគឺមិនមានការលើកលែងពីការដាក់ទណ្ឌកម្មក្រោមច្បាប់នេះទេ៕
