មុត ចន្ថា ទម្លាយរឿងអាស្រូវ សម រង្ស៊ី និងបក្ខពួកពីរនាក់ដែលកិបកេងប្រាក់រាប់លានដុល្លារពីគម្រោងបោកប្រាស់
ភ្នំពេញ៖ រឿងអាស្រូវនៃអំពើទុច្ចរិតទាំងនយោបាយ និងលុយកាក់ដែលប្រព្រឹត្តដោយទណ្ឌិត សម រង្ស៊ី និងបក្ខពួកជំនិតពីរនាក់ទៀត ត្រូវបានលាតត្រដាងបន្ថែម ដែលក្នុងនេះមានទឹកប្រាក់រហូតរាប់លានដុល្លារ។
លើបណ្ដាញសង្គមហ្វេសប៊ុកនៅថ្ងៃទី១៣ ខែធ្នូ ឆ្នាំ២០២១នេះ លោក មុត ចន្ថា ដែលអតីតមន្ត្រីជាន់ខ្ពស់មួយរូបនៃអតីតគណបក្សសង្គ្រោះជាតិបានសរសេរថា មេដឹកនាំនយោបាយទុច្ចរិត និងពុករលួយដែលឃុបឃិតគ្នាកេងប្រវ័ញ្ចលុយមូលនិធិគម្រោងទូរទស្សន៍ព្រះអាទិត្យជិត១លានដុល្លារ, លុយគម្រោងមាតុភូមិនិវត្តន៍លើកទី១ ថ្ងៃ៩វិច្ឆិកា២០១៩ និងគម្រោងមាតុភូមិនិវត្តន៍ លើកទី២ ថ្ងៃ៤ឧសភា២០២១ ជាង៥០ម៉ឺនដុល្លារ និងលុយលក់ប័ណ្ណនាឡិកាដៃកាស្យូជាង២០ម៉ឺនដុល្លារ ព្រមទាំងលុយអតីតគណបក្សសង្គ្រោះជាតិរាប់សែនដុល្លារ។
លោក មុត ចន្ថា បន្តថា ជនដែលកំពុងជាប់សង្ស័យក្នុងអំពើទុច្ចរិតកេងប្រវ័ញ្ចលុយទាំងនេះ រួមមានៈ លោក សម រង្ស៊ី, លោក យឹម សុវណ្ណ និងលោក គី វណ្ណដារ៉ា។
លោក មុត ចន្ថា បានបញ្ជាក់នៅចុងបញ្ចប់នៃសំណេរថា “កុំតាំងខ្លួនជាមនុស្សស្អាតស្អំប្រើម្រាមដៃចង្អុលចោទដាក់គេថា ជនពុករលួយ តាមពិតខ្លួនឯង និងគូកនកំពុងជាប់បទសង្ស័យយ៉ាងធ្ងន់ធ្ងរពីអំពើទុច្ចរិតកេងប្រវ័ញ្ចលួចលុយរាប់លានដុល្លារ។
ជនជាប់សង្ស័យក្នុងអំពើទុច្ចរិតកេងប្រវ័ញ្ចលុយខាងលើ ត្រូវតែបង្វែរលុយមកវិញ ឬត្រូវប្រឈមនឹងបណ្តឹងព្រហ្មទណ្ឌ រួមទាំងបក្សនយោបាយដែលខ្លួនគាំទ្រទាំងនយោបាយ និងទាំងហិរញ្ញវត្ថុ៕
ដោយៈពលជ័យ
