លោក ពូទីន៖ រុស្ស៊ីកំពុងឈានមុខគេផ្នែកបច្ចេកវិទ្យាមីស៊ីលល្បឿនលឿនជាងសំឡេង
មូស្គូ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយថា រុស្ស៊ីគឺជាប្រទេសនាំមុខគេលើពិភពលោកផ្នែកបច្ចេកវិទ្យាមីស៊ីលលឿនជាងសំឡេង ហើយនៅពេលដែលប្រទេសផ្សេងទៀតតាមទាន់ ខ្លួនទំនងជាមានបច្ចេកវិទ្យាអភិវឌ្ឍន៍ ដើម្បីទប់ទល់នឹងអាវុធថ្មីទាំងនេះ។
រុស្ស៊ី និងសហរដ្ឋអាមេរិកមានភាពប្រហាក់ប្រហែលគ្នាពីចំនួនក្បាលគ្រាប់ និងនាវាផ្ទុកអាវុធ។ ប៉ុន្តែនៅក្នុងការអភិវឌ្ឍកម្រិតខ្ពស់ យើងពិតណាស់ឈានមុខគេ។ នេះបើតាមលោក ពូទីន ថ្លែងនៅក្នុងវីដេអូអត្ថាធិប្បាយមួយមានចំណងជើងថា «រុស្ស៊ី ប្រវត្តិសាស្ត្រថ្មី» ដែលបានចាក់ផ្សាយកាលពីថ្ងៃអាទិត្យម្សិលមិញ។ លោក ពូទីន បន្ថែមថា រុស្ស៊ីក៏ស្ថិតក្នុងចំណាត់ថ្នាក់លេខ១ក្នុងពិភពលោកដែរ អំពីទំហំនៃការធ្វើទំនើបកម្មនៃអាវុធចាស់ៗរបស់ខ្លួន ហើយថា នាពេលអនាគត ប្រទេសមហាអំណាចផ្សេងៗ នឹងមានបច្ចេកវិទ្យាមីស៊ីលល្បឿនលឿនជាងសំឡេងដូចគ្នា។ នៅពេលពួកគេមានអាវុធនេះ វាទំនងជានឹងមានការប្រកួតប្រជែងអាវុធកម្រិតខ្ពស់។
សូមរំលឹកផងដែរថា កាលពីខែមុន ប្រធានាធិបតីរុស្ស៊ីរូបនេះបាននិយាយថា ការធ្វើតេស្តកាំជ្រូចនាវាល្បឿនលឿនជាងសំឡេង Zircon របស់រុស្ស៊ីជិតរួចរាល់ហើយ ហើយនឹងបញ្ជូនទៅកងទ័ពជើងទឹកនាដើមឆ្នាំ២០២២។ ទន្ទឹមនេះ អ្នកជំនាញលោកខាងលិចមួយចំនួនបានចោទសួរថាតើអាវុធជំនាន់ថ្មីរបស់រុស្ស៊ីមានភាពជឿនលឿនកម្រិតណា ខណៈពេលដែលទទួលស្គាល់ថាការរួមបញ្ចូលគ្នានៃល្បឿន ភាពបត់បែន និងរយៈកម្ពស់នៃមីស៊ីលលឿនជាងសំឡេង ធ្វើឱ្យពួកគេពិបាកក្នុងការតាមដាន និងស្ទាក់ចាប់៕ ប្រភព៖ Reuters
