គោព្រៃកម្ពុជា រកបាន3ពិន្ទុដំបូង ក្រោយស៊ីឡាវ 3-0 នៃពាន AFF Suzuki Cup 2020
ក្រុមបាល់ទាត់ជម្រើសជាតិកម្ពុជា(គោព្រៃកម្ពុជា)រកបាន៣ពិន្ទុដំបូង ក្រោយយកឈ្នះក្រុមបាល់ទាត់ជម្រើសជាតិឡាវ(ដំណើបឡាវ)ដោយលទ្ធផល ៣-០ ក្នុងការប្រកួតលើកទី៣របស់ខ្លួនក្នុងពានរង្វាន់បាល់ទាត់ជើងឯកអាស៊ីអាគ្នេយ៍ AFF
ក្រុមបាល់ទាត់ជម្រើសជាតិកម្ពុជា(គោព្រៃកម្ពុជា)រកបាន៣ពិន្ទុដំបូង ក្រោយយកឈ្នះក្រុមបាល់ទាត់ជម្រើសជាតិឡាវ(ដំណើបឡាវ)ដោយលទ្ធផល ៣-០ ក្នុងការប្រកួតលើកទី៣របស់ខ្លួនក្នុងពានរង្វាន់បាល់ទាត់ជើងឯកអាស៊ីអាគ្នេយ៍ AFF Suzuki Cup 2020 ពូល B កាលពីល្ងាចថ្ងៃទី១៥ ធ្នូ នៅកីឡដ្ឋាន Bishan ប្រទេសសិង្ហបុរី។
ក្នុងការប្រកួតនេះ ចាន់ វឌ្ឍនាកា រកបានគ្រាប់បាល់នាំមុខឲ្យក្រុមគោព្រៃកម្ពុជា ២គ្រាប់មុនក្នុងតង់ទី១ នៅនាទីទី៣១ និង៤១ មុនសិស្សប្អូន សៀង ចន្ធា បន្ថែមគ្រាប់ទី៣ នៅនាទីទី៧៥ ហើយលទ្ធផលនេះក៏បានរក្សាដល់ចប់ការប្រកួតពេញម៉ោង ៩០នាទីតែម្ដង។
នេះគឺជាជ័យជម្នះលើកដំបូងរបស់ក្រុមគោព្រៃកម្ពុជា ក្នុងពានរង្វាន់ប្រចាំតំបន់នេះ បន្ទាប់ពីរងបរាជ័យ២ប្រកួតដំបូងក្រោមថ្វីជើងក្រុមម៉ាឡេស៊ី និងឥណ្ឌូណេស៊ី។ រីឯឡាវវិញបានបញ្ចប់បេសកកម្មរបស់ខ្លួនហើយក្នុងព្រឹត្តិការណ៍នេះ ដោយមិនទាន់ស្គាល់ជ័យជម្នះឡើយ ក្រោយបរាជ័យ ៤ប្រកួតជាប់គ្នា។
ជាមួយនឹងជ័យជម្នះនេះ អ្នកចាត់ការក្រុមគោព្រៃកម្ពុជា លោក Keisuke Honda បានបង្ហាញអារម្មណ៍រីករាយយ៉ាងខ្លាំង ។ ជាក់ស្ដែងនៅក្នុងទំព័រហ្វេសប៊ុកផ្លូវការរបស់លោកបានសរសេរថា«ពួកគេ(ក្រុមគោព្រៃកម្ពុជា)ធ្វើបានល្អណាស់។ ខ្ញុំពិតជាមានមោទនភាពចំពោះពួកគេ។ ខ្ញុំក៏ចាប់អារម្មណ៍ផងដែរដល់កូនក្រុមដែលមិនបានចូលរួមលេងតែបានហ្វឹកហាត់យ៉ាងយកចិត្តទុកដាក់បន្ទាប់ពីបញ្ចប់ការប្រកួតយប់នេះ ។ ពួកគេកំពុងព្យាយាមធ្វើឱ្យខ្លួនក្លាយជាកីឡាករអាជីព ។
អ្នកទាំងអស់គ្នាគួរតែមានមោទនភាពចំពោះខ្លួនឯង សូមចូលរួមអបអរសាទរ!»។
យ៉ាងណាក៏ដោយ ក្រុមគោព្រៃកម្ពុជាក៏អស់ឱកាសប្រជែងកៅអីវគ្គបន្ដដែរ ទោះបីនៅសល់១ប្រកួតចុងក្រោយត្រូវជួបវៀតណាម នាថ្ងៃទី១៩ ធ្នូ ខាងមុខឈ្នះក្ដី ក៏មិនអាចស្រោចស្រង់បានដែរព្រោះនៅក្នុងពូលB នេះមាន៣ក្រុមកំពុងមានពិន្ទុនាំមុខរួចស្រេចបាត់ទៅហើយ ដូចជាវៀតណាម និងឥណ្ឌូណេស៊ីមាន៧ពិន្ទុដូចគ្នា និងម៉ាឡេស៊ីមាន៦ពិន្ទុ ចំណែកកម្ពុជាទើបតែមាន
៣ពិន្ទុប៉ុណ្ណោះ ៕