ប្រមុខការទូតរុស្ស៊ី៖ ទីក្រុងម៉ូស្គូចាត់ទុកការពង្រីកខ្លួនបន្ថែមរបស់អង្គការណាតូទៅកាន់ព្រំដែនប្រទេសរបស់ខ្លួនជា “បន្ទាត់ក្រហម”
ម៉ូស្គូ៖ រដ្ឋមន្ត្រីការបរទេសរុស្ស៊ីលោក សឺហ្គេ ឡាវរូវ ព្រមានថា ចលនាណាមួយបន្ថែមទៀតរបស់អង្គការណាតូ ឆ្ពោះទៅកាន់ព្រំដែនប្រទេសរុស្ស៊ី នឹងក្លាយជា “បន្ទាត់ក្រហម” នៅក្នុងការសន្ទនាជាមួយទីក្រុងម៉ូស្គូ។
លោក ឡាវរូវ បាននិយាយនៅក្នុងសន្និសីទសារព័ត៌មានរួមមួយ បន្ទាប់ពីកិច្ចប្រជុំជាមួយរដ្ឋមន្ត្រីការបរទេសបូស្នៀ ហើហ្សេហ្គោវីណា និងប៊ីសឺរ៉ា ទូកូវីគ ថា គោលជំហររបស់យើងលើការពង្រីកខ្លួនរបស់អង្គការណាតូ ត្រូវបានគេស្គាល់យ៉ាងច្បាស់… វានឹងក្លាយជាខ្សែបន្ទាត់ក្រហម ប្រសិនបើសម្ពន្ធភាពនេះបន្តខិតទៅជិតព្រំដែននៃសហព័ន្ធរុស្ស៊ី។ កាលពីថ្ងៃទី១៧ ខែធ្នូកន្លងទៅនេះ ក្រសួងការបរទេសរុស្ស៊ីបានបង្ហាញសំណើទៅកាន់សហរដ្ឋអាមេរិក និងអង្គការណាតូស្តីពីការធានាសន្តិសុខ ជាពិសេស គឺការកំណត់សម្ពន្ធភាពអាត្លង់ទិកនេះមិនអោយពង្រីកខ្លួនចូលទៅក្នុងទឹកដីអ៊ុយក្រែន។ ឯកសារទាំងនោះត្រូវបានប្រគល់ឱ្យទីក្រុងវ៉ាស៊ីនតោន និងសម្ពន្ធមិត្តរួចហើយ។
លោក ឡាវរូវ បានគូសបញ្ជាក់ថា សំណើដែលយើងបានធ្វើតាមបញ្ជារបស់ប្រធានាធិបតីរុស្ស៊ីលោក វ្ល៉ាឌីមៀ ពូទីន ដែលទាក់ទងនឹងការធានាសន្តិសុខរបស់សហព័ន្ធរុស្ស៊ី ក្នុងបរិបទនៃសន្តិសុខរួមនៅក្នុងតំបន់អឺរ៉ុប-អាត្លង់ទិកទាំងមូល ពួកគេឆ្លើយតបយ៉ាងច្បាស់ចំពោះវិធីដែលយើងមើលឃើញពីស្ថានភាព។ លោកបន្ថែមថា សេចក្តីព្រាងកិច្ចព្រមព្រៀងនេះ ឆ្លុះបញ្ចាំងពីការចាប់អារម្មណ៍របស់ទីក្រុងម៉ូស្គូ ក្នុងការជៀសវាងការវិវត្តន៍អវិជ្ជមាន និងលទ្ធផលដែលត្រូវបានស្នើឡើងដោយអ្នកយុទ្ធសាស្រ្តមួយចំនួននៅក្នុងសម្ពន្ធភាព៕ ប្រភព៖ Sputniknews
![](https://asset.ams.com.kh/central/media/141860-1024x682.jpg)
![](https://asset.ams.com.kh/central/media/Russia-explains-red-lines-on-NATO-expansion-1024x538.jpg)
![](https://asset.ams.com.kh/central/media/gettyimages-1183207515-1024x1024-1.jpg)