Positive Cambodia Ep32: កម្ពុជាចំណាយ១៩០០លានដុល្លារ ប្រយុទ្ធប្រឆាំងកូវីដ-១៩
ប្រធានបទៈ កម្ពុជាចំណាយ១៩០០លានដុល្លារ ប្រយុទ្ធប្រឆាំងកូវីដ-១៩ និងជាង៤០០លានដុល្លារ សម្រាប់សង្គ្រោះប្រជាពលរដ្ឋក្រីក្រ
សម្របសម្រួលៈ ពិធីការិនីៈ កញ្ញា ធីតា
វាគ្មិន លោក. ឃុន ប៊ុននី
សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា បានគូសបញ្ជាក់ប្រាប់ថា ចាប់តាំងពីផ្ទុះជំងឺកូវីដ-១៩ រហូតមកដល់ពេលនេះ កម្ពុជាបានចំណាយថវិកាអស់ ២,៣០០លានដុល្លារ សម្រាប់ប្រយុទ្ធប្រឆាំងកូវីដ-១៩ ហើយក្នុងនោះ ចំណាយថវិកាអស់ជាង ៤០០លានដុល្លារ សម្រាប់សង្គ្រោះប្រជាពលរដ្ឋក្រីក្រ។
សម្ដេច តេជោ ហ៊ុន សែន បានបញ្ជាក់យ៉ាងដូច្នេះថា «ការចំណាយរបស់យើង ដែលបានចាយទៅហើយ ឆ្នាំនេះអាច ១,៥០០លានដុល្លារ និងឆ្នាំមុន អស់៨០០លានដុល្លារ ដែលគិតលេខគត់សរុបចំនួន២,៣០០លានដុល្លារ»។ សម្ដេច បានលើកឡើងថា គ្រាន់តែការចាយលុយ សម្រាប់សង្គ្រោះប្រជាពលរដ្ឋក្រីក្រ គឺអស់ប្រមាណជាង៤០០លានដុល្លារ ក្នុងដំណាក់កាលកូវីដ-១៩។
សម្ដេច តេជោ ហ៊ុន សែន បានឲ្យដឹងថា មានគ្រួសារជិត៧០ម៉ឺនគ្រួសារ មុនកូវីដ-១៩ ជីវភាពលំបាក ដល់ក្នុងដំណាក់កូវីដ-១៩ ជីវភាពពួកគាត់ មានភាពប្រសើរ ដោយសារការងាររបស់ពួកគេនៅតែរកបាន និងថែមដោយថវិការដ្ឋ ជូនដល់ពួកគាត់ថែមទៀត។
បន្ថែមពីនោះទៀត នាយករដ្ឋមន្ដ្រីនៃកម្ពុជា បានបញ្ជាក់ថា រាជរដ្ឋាភិបាល នៅតែធានាខុសត្រូវនូវបញ្ហានេះ បន្ថែមទៅដោយកម្មករបាត់បង់ការងារធ្វើ ដែលត្រូវផ្ដល់ឲ្យពួកគាត់៤០ដុល្លារក្នុងមួយម្នាក់ បូកនិងថៅកែទៀតបាន៧០ដុល្លារ ឯផ្នែកសណ្ឋាគារជួយ៤០ដុល្លារក្នុងមួយខែ។
សម្ដេច តេជោ ហ៊ុន សែន បានបន្ថែមថា នេះជាការទទួលខុសត្រូវធំមួយរបស់រាជរដ្ឋាភិបាល ចំពោះជីវភាពរបស់ប្រជាពលរដ្ឋ ដោយមិនទាន់គិតទៅដល់ការចំណាយនានាបន្ថែម ទាក់ទងនឹងវ៉ាក់សាំង ថ្នាំព្យាបាល និងការការពារព្យាបាលផ្សេងៗទៀត។