Positive Cambodia Ep34: សម្តេចតេជោ អំពាវនាវឱ្យជំរុញការលើកកម្ពស់សេវាទឹកស្អាត និងអនាម័យជនបទ
សម្តេចតេជោ នាយករដ្ឋមន្ត្រី ហ៊ុន សែន អំពាវនាវដល់ភាគីពាក់ព័ន្ធជំរុញការលើកកម្ពស់អនាម័យជនបទឱ្យខ្លាំងក្លាថែមទៀត ដោយជំរុញឱ្យមានសន្ទុះ ៥% រៀងរាល់ឆ្នាំ ដើម្បីសម្រេចបានគោលដៅឆ្នាំ២០២៥ ដែលប្រជាពលរដ្ឋទទួលបានសេវាទឹកស្អាត និងអនាម័យមាននិរន្តរភាព។
សម្តេចតេជោ ថ្លែងថានៅឆ្នាំ២០០៧ថា ប្រជាជនកម្ពុជាមានលទ្ធភាពប្រើបង្គន់អនាម័យត្រឹម ១៦%។ ឆ្នាំ២០១៩ លទ្ធផលជំរឿនទូទៅប្រជាជនកម្ពុជាបានបង្ហាញថា អត្រាគ្របដណ្តប់អនាម័យជនបទបានកើនដល់ ៧៨% ដោយសារការខិតខំប្រឹងប្រែងរបស់រដ្ឋាភិបាល និងការចូលរួមសហការពីគ្រប់ភាគីពាក់ព័ន្ធក្នុងវិស័យអនាម័យ។
សម្តេចតេជោ ថ្លែងថា៖ «[ផ្នែកពាក់ព័ន្ធ] ធ្វើយ៉ាងណាឱ្យស្ថានភាពអនាម័យជនបទនៅកម្ពុជាមានសន្ទុះបន្ថែមទៀតក្នុងអត្រា ៥% ជារៀងរាល់ឆ្នាំ ទើបយើងអាចសម្រេចបាននូវទស្សនវិស័យដែលបានកំណត់ថា ប្រជាជនទាំងអស់នឹងទទួលបានសេវាផ្គត់ផ្គង់ទឹកស្អាត និងអនាម័យប្រកបដោយសមធម៌ និងមាននិរន្តរភាពនៅឆ្នាំ២០២៥»។
សម្តេចតេជោ ជំរុញឱ្យក្រុមការងារបច្ចេកទេសវិស័យផ្គត់ផ្គង់ទឹកស្អាត និងអនាម័យជនបទថ្នាក់ជាតិនិងខេត្ត បន្តយកចិត្តទុកដាក់សម្របសម្រួល និងសហប្រតិបត្តិការល្អជាមួយដៃគូអភិវឌ្ឍន៍ អង្គការមិនមែនរដ្ឋាភិបាល និងភាគីពាក់ព័ន្ធ ដើម្បីរិះរកវិធានការ និងធនធានក្នុងការលើកកម្ពស់អនាម័យជនបទឱ្យកាន់តែមានប្រសិទ្ធភាពបន្ថែមទៀត។ សម្តេចតេជោ ហ៊ុន សែន ណែនាំដល់ក្រសួងអភិវឌ្ឍន៍ជនបទ ក្រសួងនិងស្ថាប័នពាក់ព័ន្ធឱ្យបង្កើនការគាំទ្រ និងបន្តជំរុញការលើកកម្ពស់អនាម័យសមស្របតាមសមត្ថកិច្ចការងាររបស់ខ្លួន ដោយកៀរគរធនធាន និងសហប្រតិបត្តិការជាមួយដៃគូអភិវឌ្ឍន៍ និងវិស័យឯកជន ដើម្បីឈានសម្រេចបានគោលដៅអត្រាគ្របដណ្តប់អនាម័យ ៩០% នៃផែនការសកម្មភាពជាតិជំហានទី២ នៅឆ្នាំ២០២៣។ សម្តេច តេជោ ជំរុញឱ្យខេត្ត-ក្រុង ដែលមានអត្រាគ្របដណ្តប់អនាម័យខ្ពស់ឱ្យក្លាយជាខេត្ត ដែលឈប់បន្ទោបង់ពាសវាលពាសកាល ១០០%៕