អាជ្ញាធរសុខាភិបាលអាមេរិកអនុម័តអោយប្រើថ្នាំគ្រាប់របស់ក្រុមហ៊ុន Pfizer ដើម្បីព្យាបាលអ្នកជំងឺកូវីដ-១៩
វ៉ាស៊ីនតោន៖ រដ្ឋបាលចំណីអាហារ និងឱសថអាមេរិក (FDA) នៅថ្ងៃពុធសប្តាហ៍នេះ បានអនុម័តអោយប្រើប្រាស់ថ្នាំគ្រាប់ប្រឆាំងនឹងជំងឺកូវីដ១៩របស់ក្រុមហ៊ុន ហ្វាយហ្សឺ (Pfizer) សម្រាប់ករណីបន្ទាន់ ដើម្បីព្យាបាលអ្នកជំងឺកូវីដ។
ការសម្រេចចិត្តរបស់រដ្ឋបាលចំណីអាហារ និងឱសថអាមេរិក ក្នុងការអនុម័តឱ្យប្រើប្រាស់ជាបន្ទាន់នូវថ្នាំគ្រាប់ព្យាបាលជំងឺកូវីដ១៩បានកើតឡើង នៅពេលដែលអាមេរិកកំពុងព្យាយាមប្រយុទ្ធប្រឆាំងនឹងការកើនឡើងនៃករណីឆ្លងជំងឺកូវីដដែលបង្កឡើងដោយវីរុសបំប្លែងថ្មី អូមីក្រុង ដោយប្រធានាធិបតីអាមេរិក លោក ចូ បៃដិន បានប្រកាសអំពីផែនការបើកកន្លែងចាក់វ៉ាក់សាំង និងធ្វើតេស្តសហព័ន្ធបន្ថែមទៀត។ ក្រោយទទួលបានការអនុម័តអោយប្រើប្រាស់ ថ្នាំគ្រាប់ព្យាបាលជំងឺកូវីដ១៩របស់ ហ្វាយហ្សឺ នឹងត្រូវប្រើប្រាស់សម្រាប់មនុស្សដែលមានអាយុចាប់ពី ១២ ឆ្នាំឡើងទៅដែលមានហានិភ័យឈឺធ្ងន់ធ្ងរ ដែលនេះជាថ្នាំលេបនៅផ្ទះលើកដំបូង ក៏ដូចជាឧបករណ៍ថ្មីប្រឆាំងនឹងវីរុសបំប្លែងថ្មី អូមីក្រុង ដែលកំពុងឆ្លងរាលដាលយ៉ាងឆាប់រហ័ស។
បើតាមទិន្នន័យចុងក្រោយពីការធ្វើតេស្តនោះ ថ្នាំគ្រាប់ព្យាបាលជំងឺកូវីដ១៩របស់ក្រុមហ៊ុន ហ្វាយហ្សឺ មានឈ្មោះសម្គាល់ថា Paxlovid ដែលមានប្រសិទ្ធភាពជិត ៩០ភាគរយ ក្នុងការកាត់បន្ថយហានិភ័យត្រូវសម្រាកព្យាបាលនៅមន្ទីរពេទ្យ ឬស្លាប់។ មិនតែប៉ុណ្ណោះ ថ្នាំគ្រាប់នេះក៏មានប្រសិទ្ធភាពប្រឆាំងនឹងវីរុសបំប្លែងថ្មី អូមីក្រុង ផងដែរ៕ ប្រភព៖ CNA
