លោកយាយអាយុ១០១ឆ្នាំ យំទារឱ្យកូននាំទៅចាក់វ៉ាក់សាំង
លោកយាយ ម៉ែន ឃន អាយុ១០១ឆ្នាំ បានយំទារទៅចាក់វ៉ាក់សាំង នេះបើតាមការឱ្យដឹងពីបុត្រ បុត្រធីតា របស់លោកយាយ ម៉ែន ឃន អាយុ១០១ឆ្នាំ បានឱ្យដឹងថា
កាលពីថ្ងៃទី២៩ ខែធ្នូ ឆ្នាំ២០២១ ឯកឧត្តម គួច ចំរើន អភិបាលខេត្តព្រះសីហនុបាននាំយកអំណោយរបស់សម្ដេចអគ្គមហាសេនាបតីតេជោ ហ៊ុន សែន ជូនដល់លោកយាយ ម៉ែន ឃន អាយុ១០១ឆ្នាំ មានទីលំនៅក្នុងក្រុម៨ ភូមិ២ សង្កាត់លេខ៣ ក្រុងព្រះសីហនុ ខេត្តព្រះសីហនុ ។
លោកយាយ ម៉ែន ឃន អាយុ១០១ឆ្នាំ បានយំទារចាក់វ៉ាក់សាំង ។ បើតាមការឱ្យដឹងពីបុត្រ បុត្រធីតា របស់លោកយាយ ម៉ែន ឃន អាយុ១០១ឆ្នាំ បានឱ្យដឹងថា លោកយាយ ម៉ែន ឃន បន្ទាប់ពីទទួលបានព័ត៌មានពីការផ្សព្វផ្សាយ ក្នុងយុទ្ធនាការចាក់វ៉ាក់សាំងជូនប្រជាពលរដ្ឋរួចមក លោកយាយបានទទូចឱ្យកូនៗរបស់គាត់ជូនទៅចាក់វ៉ាក់សាំង ។ ពេលនោះកូនៗគាត់បានប្រាប់គាត់ថា ម៉ែចាស់ហើយមិនបាច់ទេ ។ ពេលម្តាយគាត់ឮពាក្យនេះ ស្រាប់តែម្តាយគាត់យំខឹងពួកគាត់ ។ ពេលនោះពួកគាត់ក៏បានដឹកលោកយាយទៅទទួលការចាក់វ៉ាក់សាំងតាមការទទូចរបស់លោកយាយ ទៅតាមគម្លាតនៃដូសនីមួយៗ និងតាមការណែនាំរបស់ក្រុមគ្រូពេទ្យ ។
បើតាមកូនៗរបស់លោកយាយបានប្រាប់ឱ្យដឹងបន្ថែមថា បន្ទាប់ពីលោកយាយបានទទួលការចាក់វ៉ាក់សាំង តាំងពីដូសទី១ រហូតមកដល់ដូសទី៣ ដែលជាដូសជំរុញរួច មកដល់ពេលនេះសុខភាពរបស់លោកយាយមិនមានផលរំខានអ្វីពីវ៉ាក់សាំងនោះទេ ។ មិនតែប៉ុណ្ណោះលោកយាយថែមទាំងទទួលទានអាហារបានជាងពីមុនទៀតផង និងមានសុខភាពល្អធម្មតាទេ ។
ក្នុងឱកាសនោះឯកឧត្តមអភិបាលខេត្ត បានពាំនាំការផ្តាំផ្ញើសួរសុខទុក្ខពីសំណាកសម្ដេចតេជោ ហ៊ុន សែន ជូនចំពោះលោកយាយ និងកោតសរសើរចំពោះទឹកចិត្ត ក្លាហានរបស់លោកយាយ ដែលមានវ័យរហូតដល់ទៅជាង១០១ឆ្នាំ យំទារឱ្យកូនចៅជូនទៅចាក់វ៉ាក់សាំងការពារជំងឺកូវីដ-១៩ ដោយលោកយាយចាក់បានដូសទី៣រួចហើយ ។
ការសម្រេចចិត្តរបស់លោកយាយ គឺសបញ្ជាក់ឱ្យឃើញថា លោកយាយជឿទុកចិត្តមកលើរាជរដ្ឋាភិបាល ក្រោមការដឹកនាំរបស់សម្ដេចតេជោ ហ៊ុន សែន ដែលសម្តេចបានខិតខំស្វះស្វែងរកវ៉ាក់សាំងចាក់ជូនប្រជាពលរដ្ឋរបស់យើងដោយឥតគិតថ្លៃនៅទូទាំងប្រទេស ។ ជាមួយគ្នានេះ ឯកឧត្តមអភិបាលខេត្ត ក៏បានជូនពរទៅដល់លោកយាយសូមឱ្យមានសុខភាពល្អ ដើម្បីជាម្លប់ដល់កូនចៅចៅទួត នៃក្រុមគ្រួសារបានយូរអង្វែងបន្តទៅទៀតផងដែរ ។
អំណោយរបស់សម្ដេចអគ្គមហាសេនាបតីតេជោ ហ៊ុន សែន ជូនដល់លោកយាយ ម៉ែន ឃន អាយុ១០១ឆ្នាំ រួមមានប្រាក់ចំនួន៣លានរៀល អាវរងា អង្ករ ទឹកបរិសុទ្ធ ទឹកក្រូច សម្ភារប្រើប្រាស់ និងគ្រឿងឧបភោគ បរិភោគមួយចំនួនទៀត ៕
