ស្ត្រីអាហ្វហ្គានីស្ថានអំពាវនាវសុំសិទ្ធិ និងតវ៉ាប្រឆាំងនឹងការសម្លាប់របស់តាលីបង់
ក្រុមស្ត្រីជនជាតិអាហ្វហ្កានីស្ថាន ដើរដង្ហែក្បួនក្នុងរដ្ឋធានីកាប៊ុលដោយអំពាវនាវឲ្យមានការគោរពសិទ្ធិស្ត្រី និងចោទអាជ្ញាធរតាលីបង់ថាបានសម្លាប់ទាហានដែលបម្រើអតីតរដ្ឋាភិបាលគាំទ្រដោយសហរដ្ឋអាមេរិក។
តាមការរាយការណ៍របស់ទីភ្នាក់ងារសារព័ត៌មាន AFP ស្ត្រីប្រហែល ៣០ នាក់ ប្រមូលផ្តុំគ្នានៅជិតវិហារអ៊ិស្លាមមួយនៅកណ្តាលរដ្ឋធានីកាលពីថ្ងៃអង្គារ ហើយដើរដង្ហែពីរបីរយម៉ែត្រដោយស្រែកថា «យុត្តិធម៌ យុត្តិធម៌» មុនពេលពួកគេត្រូវបាន កងកម្លាំងតាលីបង់បញ្ឈប់។
ការតវ៉ានេះធ្វើឡើងប៉ុន្មានសប្តាហ៍ បន្ទាប់ពីរបាយការណ៍ពីអង្គការសហប្រជាជាតិ និងអង្គការលើកលែងទោសអន្តរជាតិ និយាយថា មានការរាយការណ៍អំពីការសម្លាប់ក្រៅប្រព័ន្ធតុលាការជាង ១០០ ករណីដោយពួកតាលីបង់ចាប់តាំងពីចូលកាន់កាប់រដ្ឋធានីកាប៊ុលកាលពីខែសីហា។
អ្នកស្រី Nayera Koahistani ដែលជាអ្នកតវ៉ាម្នាក់និយាយថា៖ «ខ្ញុំចង់ប្រាប់ពិភពលោក ប្រាប់ពួកតាលីបង់ឱ្យឈប់សម្លាប់។ យើងចង់បានសេរីភាព យើងចង់បានយុត្តិធម៌ យើងចង់បានសិទ្ធិមនុស្ស»។
អ្នកតវ៉ាម្នាក់ទៀតឈ្មោះ Laila Basam អានសេចក្ដីប្រកាសមួយដែលអំពាវនាវឱ្យតាលីបង់បញ្ឈប់ម៉ាស៊ីនឧក្រិដ្ឋកម្មរបស់ខ្លួន។ សេចក្តីថ្លែងការណ៍និយាយថា អតីតទាហាន និងអតីតបុគ្គលិកនៃរដ្ឋាភិបាល ស្ថិតក្រោមការគំរាមកំហែងដោយផ្ទាល់ពីតាលីបង់ ដែលបំពានលើការសន្យាលើកលែងទោសរបស់ខ្លួនកាលទើបចូលកាន់កាប់ក្រុងកាប៊ុលដំបូង។
ក្រុមបាតុករក៏បញ្ចេញការជំទាស់ទៅនឹងការរឹតបន្តឹងដែលស្ត្រីកំពុងប្រឈមមុខក្រោមការគ្រប់គ្រងរបស់តាលីបង់។ អ្នកស្រី Koahistani និយាយថា៖ «សិទ្ធិស្ត្រីគឺជាសិទ្ធិមនុស្ស។ យើងត្រូវតែការពារសិទ្ធិរបស់យើង»។
រដ្ឋាភិបាលតាលីបង់កាលពីចុងសប្ដាហ៍មុន បានចេញសេចក្តីណែនាំថ្មីមួយ ដោយហាមស្ត្រីមិនឲ្យធ្វើដំណើរផ្លូវឆ្ងាយ លុះត្រាតែមានសាច់ញាតិជាបុរសនៅជាមួយ ខណៈសាលាមធ្យមសិក្សាភាគច្រើននៅតែបិទទ្វារមិនឱ្យក្មេងស្រីចូលរៀន ហើយស្ត្រីភាគច្រើនត្រូវបានហាមឃាត់មិនឱ្យចូលធ្វើការ។ ប៉ុន្តែតាលីបង់និយាយថា ការដាក់កំហិតរបស់ខ្លួនគឺគ្រាន់តែបណ្តោះអាសន្នប៉ុណ្ណោះ ហើយមានតែនៅក្នុងកន្លែងដើម្បីធានាថាកន្លែងធ្វើការ និងបរិយាកាសសិក្សាទាំងអស់ មានសុវត្ថិភាពសម្រាប់ស្ត្រី និងក្មេងស្រី។
ប្រភព៖ Aljazeera