បុរស២នាក់ជួបគ្រោះពេលកំពុងបើកម៉ូតូទឹកក្នុងសមុទ្រផ្ទុះឆាបឆេះផ្អើលកោះរុងសន្លឹម
ករណីផ្ទុះឆេះម៉ូតូទឹកមួយគ្រឿង ម៉ាក Sea Do ពណ៌លឿង ដែលមានកម្លាំងម៉ាស៊ីន៣០០សេះ បណ្តាលឱ្យខូចខាតទាំងស្រុង និងបណ្តាលឱ្យបុរសចំនួន២នាក់
នៅវេលាម៉ោងប្រមាណ១០និង៣០នាទីព្រឹក ថ្ងៃទី៣ ខែមករា ឆ្នាំ២០២២ នៅមុខភូមិកោះរុងសន្លឹម (ភូមិ២៣)ប្រហែល១០០ម៉ែត្រពីឆ្នេរ ស្ថិតក្នុងសង្កាត់កោះរុងសន្លឹម ក្រុងកោះរ៉ុង មានករណីផ្ទុះឆេះម៉ូតូទឹកមួយគ្រឿង ម៉ាក Sea Do ពណ៌លឿង ដែលមានកម្លាំងម៉ាស៊ីន៣០០សេះ បណ្តាលឱ្យខូចខាតទាំងស្រុង និងបណ្តាលឱ្យបុរសចំនួន២នាក់រងរបួសផងដែរ ។
បុរសទាំង២នាក់ខាងលើនេះ មានម្នាក់ឈ្មោះ សុខ លីហូវ អាយុ១៩ឆ្នាំ ជាបុគ្គលិកម៉ូតូទឹក មានទីលំនៅក្នុងភូមិ៣ សង្កាត់លេខ១ ក្រុងព្រះសីហនុ រងរបួសស្រាល ដោយឆេះរលាត់ត្រង់ចុងចិញ្ចើមខាងស្តាំ និងម្នាក់ទៀតមានឈ្មោះ ហ៊ុត វណ្ណៈ អាយុ២៥ឆ្នាំ ជាបុគ្គលិកម៉ូតូទឹកដូចគ្នា និងមានស្រុកកំណើតនៅភូមិបឹង ឃុំបឹង ស្រុកបារាយណ៍ ខេត្តកំពង់ធំ រងរបួសធ្ងន់ ដោយសាររយះដាច់បាតជើង ។
ហើយមូលហេតុដែលបណ្តាលឱ្យមានការផ្ទុះឆាបឆេះម៉ូតូទឹកដ៏កម្រខាងលើនេះ ត្រូវបានឲ្យដឹងថា បណ្តាលមកពីបញ្ហាឆ្លងចរន្តភ្លើង ខណៈពេលកំពុងតែបើកបរ ។ ចំណែកជនរងគ្រោះទាំង២នាក់ ក៏ត្រូវបានដឹកយកទៅសង្គ្រោះនៅគ្លីនិកមង្គលផងដែរ ៕
