មនុស្សយ៉ាងហោចណាស់ចំនួន ១៦៤នាក់ ស្លាប់ក្នុងការបង្ក្រាបលើការតវ៉ានៅកាហ្សាក់ស្ថាន
មនុស្សយ៉ាងហោចណាស់ ១៦៤ នាក់ ស្លាប់ក្នុងបាតុកម្មតវ៉ាដោយហិង្សាប្រឆាំងនឹងរដ្ឋាភិបាលកាហ្សាក់ស្ថានជុំវិញការឡើងតម្លៃប្រេងសាំងទ្វេដង។ នេះបើតាមការចុះផ្សាយរបស់ប្រព័ន្ធផ្សព្វផ្សាយនានាដែលស្រង់សម្ដីមន្រ្តីសុខាភិបាលរបស់ប្រទេស។
ក្រសួងមហាផ្ទៃកាហ្សាក់ស្ថាននិយាយកាលពីថ្ងៃចន្ទថា មនុស្សជិត ៨ ០០០ នាក់ត្រូវបានចាប់ខ្លួន រួមទាំងជនបរទេសមួយចំនួនធំផងដែរ ក្រោយបាតុកម្មដែលចាប់ផ្ដើមកាលពីដើមសប្ដាហ៍មុនប្រែក្លាយជាកុប្បកម្ម ហើយរីករាលដាលពេញប្រទេស ដោយក្រុមអ្នកតវ៉ាបង្ហាញពីការមិនសប្បាយចិត្តចំពោះរដ្ឋាភិបាល និងអតីតប្រធានាធិបតីលោក Nursultan Nazarbayev ដែលលាលែងនៅឆ្នាំ ២០១៩ ប៉ុន្តែនៅតែបន្តមានឥទ្ធិពលលើរដ្ឋាភិបាល។
កាលពីសប្តាហ៍មុន រុស្ស៊ីបានបញ្ជូនយោធារបស់ខ្លួនមកកាហ្សាក់ស្ថាន ដើម្បីជួយស្តារសណ្តាប់ធ្នាប់។ សេចក្តីថ្លែងការណ៍របស់ការិយាល័យប្រធានាធិបតីបន្ថែមថា ស្ថានការណ៍មានស្ថិរភាព ដោយកងទ័ពកំពុងបន្តប្រតិបត្តិការ «បោសសម្អាត» និងយាមកាមកន្លែងយុទ្ធសាស្ត្រ។
អ្នកស្លាប់ភាគច្រើនប្រហែល ១០៣ នាក់ នៅក្រុង Almaty ដែលជាក្រុងធំបំផុតរបស់ប្រទេស។ កងកម្លាំងសន្តិសុខនិយាយថា ខ្លួនសម្លាប់អ្នកបះបោរនៅក្នុងទីក្រុង Almaty ខណៈពេលដែលព្យាយាមស្តារសណ្តាប់ធ្នាប់ ហើយថាក្រុមអ្នកតវ៉ាព្យាយាមដណ្តើមយកប៉ុស្តិ៍ប៉ូលីសនៅក្នុងទីក្រុង។
រថយន្តប្រហែល ៤០០ គ្រឿង ដែលភាគច្រើនជារថយន្តប៉ូលីស ក៏ដូចជាមជ្ឈមណ្ឌលផ្សារទំនើប និងធនាគារជាង ១០០ ត្រូវបានបំផ្លាញនៅក្នុងអំពើហិង្សា។ អ្នកជាប់ឃុំកំពុងប្រឈមមុខនឹងការចោទប្រកាន់ពីបទហិង្សាលើមន្ត្រីរដ្ឋាភិបាល អំពើទុច្ចរិត ឃាតកម្ម និងចោរកម្ម។
ប្រភព៖ BBC