១០ឆ្នាំ គីម ជុងអ៊ុន ចង់បង្កើតមនោគមវិជ្ជាផ្ទាល់ខ្លួន អ្នកជំនាញថា កូរ៉េខាងជើងនឹងមិនមានការផ្លាស់ប្ដូរជាដុំកំភួនទេ
លោក គីម ជុងអ៊ុន ឡើងកាន់តំណែងបាន ១០ឆ្នាំហើយ ក្រោយពេលដែលឪពុករបស់លោកគឺ លោក គីម ជុងអ៊ីល បានទទួលមរណភាពដោយជំងឺបេះដូងកាលពីឆ្នាំ២០១១។ ជាង ១០ឆ្នាំមកនេះ កូរ៉េខាងជើងបានជួបនូវព្រឹត្តិការណ៍ជាច្រើនទាំងនៅក្នុងស្រុក និងទំនាក់ទំនងកិច្ចការបរទេស។ ចំណោមព្រឹត្តិការណ៍ដែលគេដឹងឮជាងគេគឺ ការធ្វើតេស្តបាញ់មីស៊ីលរបស់ប្រទេសកូរ៉េខាងជើង។
មតិមហាជនអន្តរជាតិជាច្រើនហាក់មិនសូវដឹងច្រើនឡើយអំពីគោលនយោបាយក្នុងស្រុកកូរ៉េខាងជើង។ នេះក៏ព្រោះតែប្រទេសកុម្មុយនិស្តមួយនេះហាក់ដូចជាបិទជិតពីពិភពលោក ស្របពេលដែលសារព័ត៌មានរដ្ឋកូរ៉េខាងជើង ចុះផ្សាយតែពីពាក្យសរសើរយ៉ាងលើសលប់ចំពោះ លោក គីម ជុងអ៊ុន។
យ៉ាងណាមិញ បើតាមប្រភពពីចារកម្មកូរ៉េខាងត្បូង ក៏ដូចជាការវិភាគអំពីលទ្ធផលនៃកិច្ចប្រជុំគណបក្សពលករកូរ៉េ ក៏ដូចជាសុន្ទរកថា របស់លោក គីម ជុងអ៊ុន មានការចុះផ្សាយជាច្រើនបានឱ្យដឹងថា មេដឹកនាំជាន់ខ្ពស់របស់កូរ៉េខាងជើងរូបនេះ កំពុងតែបង្កើតមនោគមវិជ្ជាផ្ទាល់ខ្លួន ដែលអាចជាការដើរចេញពីស្រមោលរបស់ឪពុក និងជីតារបស់លោក។
កាលពីខែតុលា ឆ្នាំមុន ចារកម្មកូរ៉េខាងត្បូងបានទម្លាយប្រាប់សភាកូរ៉េខាងត្បូងថា ទីក្រុងព្យុងយ៉ាងកំពុងតែអភិវឌ្ឍនូវមនោគមវិជ្ជាមួយ ដែលហៅថា «គីមជុងអ៊ុននិយម»។ អំឡុងពេលនោះដែរ ចារកម្មកូរ៉េខាងត្បូងបានធ្វើការកត់សម្គាល់ថា កូរ៉េខាងជើងហាក់បីដូចជាមិនសូវធ្វើការឃោសនាផុលផុសអំពីលោក គីម អ៊ីលស៊ុង ដែលជាជីតារបស់លោក និងជាមេដឹកនាំទីមួយ និងលោក គីម ជុងអ៊ីល ដែលជាឪពុករបស់លោក គីម ជុងអ៊ុន។
មេដឹកនាំកូរ៉េខាងជើងទាំងពីររូប ដែលដឹកនាំមុនលោក គីម ជុងអ៊ុន ក៏ធ្លាប់មានមនោគមវិជ្ជាផ្ទាល់ខ្លួនផងដែរ។
ជាក់ស្ដែងសម្រាប់លោក គីម អ៊ីលស៊ុង ដែលដឹកនាំប្រទេសកុម្មុយនិស្តនេះចាប់តាំងពីក្រោយសង្គ្រាមលោកលើកទី២ រហូតដល់មរណភាពរបស់លោកនៅឆ្នាំ១៩៩៤ កូរ៉េខាងជើងស្ថិតក្រោមគោលការណ៍មគ្គុទ្ទេសក៍ Juche។ គោលការណ៍នេះគឺផ្ដោតលើភាពជាម្ចាស់ការលើខ្លួនឯងទាំងស្រុង ទាំងផ្នែកនយោបាយ សេដ្ឋកិច្ច និងមនោគមវិជ្ជា ក៏ដូចជាមានអានុភាពយោធាដ៏រឹងមាំ។ គោលការណ៍នេះហើយធ្វើឱ្យកូរ៉េខាងជើងប្រកាន់យកនូវភាពឯកានិយមចេញពីពិភពលោក។
ចំណែកឯលោក លោក គីម ជុងអ៊ីល ដែលដឹកនាំប្រទេសពីឆ្នាំ១៩៩៤ រហូតដល់ឆ្នាំ២០១១ បានប្រកាន់យកនូវគោលការណ៍ Songun ដែលជាការបន្តពីឪពុករបស់លោកដែរ តែប្រកាន់ខ្ជាប់យ៉ាងមុតមាំនូវគោលនយោបាយ «យោធាជាចម្បង» ដែលបានសេចក្ដីថា យោធាជាអាទិភាពសម្រាប់នយោបាយ និងសេដ្ឋកិច្ចកូរ៉េខាងជើង។
សម្រាប់ «គីមជុងអ៊ុននិយម» វិញ នៅមិនទាន់មានលេចចេញរូបរាងច្បាស់លាស់នៅឡើយ ដោយមិនទាន់មានសេចក្ដីថ្លែងការណ៍ផ្លូវការណាមួយរបស់កូរ៉េខាងជើងនោះទេ។
ជាមួយគ្នានេះដែរ អ្នកនាង Soo Kim អ្នកវិភាគគោលនយោបាយនៃស្ថាប័នសិក្សាស្រាវជ្រាវមូលដ្ឋានអាមេរិក RAND Corporation បានលើកឡើងថា មនោគមវិជ្ជាបែបនេះអាចជាសញ្ញានៃការពង្រឹងអំណាចរបស់លោក គីម ជុងអ៊ុន។ នេះបើតាមការប្រាប់របស់អ្នកនាងទៅកាន់សារព័ត៌មាននីកេ។
ចំណែកឯលោក Lee Kwang-baek ប្រធាននៃអង្គការសារព័ត៌មាន Daily NK ដែលជាសារព័ត៌មានស្រង់យកពីប្រភពខាងក្នុងកូរ៉េខាងជើង បានប្រាប់សារព័ត៌មាននីកេថា លោកនៅមិនទាន់ឮអំពី «គីមជុងអ៊ុននិយម» នោះទេ។ យ៉ាងណាមិញ លោកបានកត់សម្គាល់ថា នៅកូរ៉េខាងជើងចាប់ផ្ដើមប្រើប្រាស់ពាក្យ «ទស្សនវិជ្ជាបដិវត្តន៍របស់គីម ជុងអ៊ុន» សម្រាប់ការចុះផ្សាយក្នុងសារព័ត៌មានក្នុងស្រុក ក៏ដូចជាកម្មវិធីសិក្សានានា។
លោកបានបន្ថែមទស្សនវិជ្ជានេះ មានជាប់ទាក់ទិននឹងគោលការណ៍ «ប្រជាជនចម្បង» ដែលជាគោលការណ៍ថ្មីជំនួសនឹងគោលការណ៍ Sogun របស់លោក គីម អ៊ីលស៊ុង សម្រាប់ជា «គោលការណ៍មគ្គុទ្ទេសក៍តម្រង់ប្រព័ន្ធសង្គមនិយមរបស់ប្រទេស» នៅក្នុងសមាជគណបក្សលើកទី៨ ដែលប្រព្រឹត្តិទៅកាលពីខែមករា ឆ្នាំ២០២១។
គោលការណ៍ «ប្រជាជនចម្បង» មានន័យថាជា មនោគមវិជ្ជានយោបាយក្នុងការតម្កល់ប្រយោជន៍ជាធំ។ នេះបើតាមការចុះផ្សាយរបស់អត្ថបទមួយក្នុងកាសែតជាតិកូរ៉េខាងជើង Rodong Sinmun។ កាសែតនេះបានបន្តថា គោលការណ៍នេះកើតចេញពីទស្សនវិស័យទៅលើប្រជាជនរបស់លោក គីម អ៊ីលស៊ុង និងលោក គីម ជុងអ៊ីល។
មិនថាក្រោមឈ្មោះ «គីមជុងអ៊ុននិយម» ក្ដី ឬ ក្រោមឈ្មោះ «ទស្សនវិជ្ជាបដិវត្តន៍គីម ជុងអ៊ុន» និងគោលការណ៍ «ប្រជាជនចម្បង» ក្ដី អ្នកវិភាគ និងអ្នកតាមដាននានាយល់ឃើញថា មនោគមវិជ្ជាថ្មីរបស់លោក គីម ជុងអ៊ុន នឹងមិនខុសប្លែកពីមេដឹកនាំមុនៗឡើយ។
លោក Jung Kim សាស្ត្រាចារ្យជំនួយនៃសាកលវិទ្យាល័យសិក្សាកូរ៉េខាងជើង ដែលមានមូលដ្ឋាននៅរដ្ឋធានីសេអ៊ូល បានលើកឡើងថា៖ «ស្របពេលដែល គីម ជុងអ៊ុន មិនទាន់ក្លាយជា តេង ស៊ាវភីង នៃកូរ៉េខាងជើង មើលទៅលោកប្រហែលជាមិនបង្កើតការផ្លាស់ប្ដូរជាដុំកំភួនណាមួយនៅក្នុងគោលនយោបាយក្នុងស្រុក និងការបរទេស នៅពេលអនាគតនោះទេ»។
លោក តេង ស៊ាវភីង ត្រូវបានគេស្គាល់ថាជា បុរសរដ្ឋរបស់ចិន និងអ្នកជាបើកចំហព្រំដែនរបស់ចិនក្នុងការទំនាក់ទំនងជំនួញជាមួយពិភពខាងក្រៅ៕
ប្រភព៖ Nikkie Asia
