ជប៉ុន និងកូរ៉េខាងត្បូងថ្កោលទោសការសាកល្បងមីស៊ីលកូរ៉េខាងជើងជាលើកទីពីរក្នុងរយៈពេលមិនដល់មួយសប្ដាហ៍
កាលពីថ្ងៃអង្គារ ទី១១ មករា កូរ៉េខាងជើងហាក់ដូចជាបានធ្វើការបាញ់សាកល្បងមីស៊ីលជាលើកទីពីរក្នុងរយៈពេលមិនដល់មួយសប្ដាហ៍ ធ្វើឱ្យមានការថ្កោលទោសពីកូរ៉េខាងត្បូង និងជប៉ុន ដែលបាននិយាយថាការបាញ់សាកល្បងម្ដងហើយម្ដងទៀតនឹងប្រថុយបង្កអស្ថិរភាពក្នុងតំបន់។
គណៈសេនាធិការចម្រុះកូរ៉េខាងត្បូង (JCS) បាននិយាយក្នុងសេចក្ដីថ្លែងការណ៍មួយថាការបាញ់សាកល្បងត្រូវបានប្រព័ន្ធតាមដានរកឃើញនៅម៉ោង ៧:២៧ ព្រឹក ដែលបានហោះចេញពីផ្ទៃក្នុងនៃកូរ៉េខាងជើងទៅកាន់សមុទ្រនៅខាងកើតប្រទេស។
ក្រុមប្រឹក្សាសន្តិសុខជាតិរបស់កូរ៉េខាងត្បូងបានរៀបចំកិច្ចប្រជុំបន្ទាន់ ហើយបានជំរុញកូរ៉េខាងជើងឱ្យ«ឆ្លើយតបយ៉ាងឆាប់រហ័សចំពោះការរំពឹងទុករបស់សហគមន៍អន្តរជាតិសម្រាប់សន្តិភាព និងស្ថិរភាពនៅលើឧបទ្វីបកូរ៉េ ហើយយល់ព្រមបន្តកិច្ចសន្ទនា និងកិច្ចសហប្រតិបត្តិការឡើងវិញ»។
ការសាកល្បងនេះបានកើតឡើងបន្ទាប់ពីកូរ៉េខាងជើង បានអះអាងថាខ្លួនបានសាកល្បងមីស៊ីលល្បឿនលឿនជាងសំឡេងកាលពីថ្ងៃពុធសប្ដាហ៍មុន បន្ទាប់ពីមេដឹកនាំកូរ៉េខាងជើងលោកគីម ជុងអ៊ុនបានប្ដេជ្ញាធ្វើការពង្រឹងសមត្ថភាពយោធារបស់ខ្លួន ខណៈពេលដែលការចរចាជាមួយសហរដ្ឋអាមេរិក និងកូរ៉េខាងត្បូងជាប់គាំង។
នាយករដ្ឋមន្ត្រីជប៉ុនលោកហ្វូមីអូ គីស៊ីដា បានកត់សម្គាល់ថាអង្គការសហប្រជាជាតិទើបតែបានបញ្ចប់ការពិភាក្សាអំពីរបៀបឆ្លើយតបទៅនឹងការបាញ់សាកល្បងកាលពីសប្ដាហ៍មុន។ លោកនិយាយថា៖ «ការដែលកូរ៉េខាងជើងបន្តបាញ់មីស៊ីលគឺជារឿងគួរឱ្យសោកស្ដាយយ៉ាងខ្លាំង»៕
ប្រភព៖ Reuters
