ឥណ្ឌូនេស៊ីបានដាក់ឈ្មោះរដ្ឋធានីថ្មី ជំនួសហ្សាកាតាបានហើយ
រដ្ឋធានីថ្មីរបស់ប្រទេសឥណ្ឌូនេស៊ីដែលធ្លាប់បានគ្រោងបង្កើត ស្ថិតនៅតំបន់ Kalimatan ភាគខាងកើតប្រទេសនោះ នឹងមានឈ្មោះថា Nusantara នេះបើតាមរដ្ឋមន្ត្រីអភិវឌ្ឍន៍ផែនការជាតិ Suharso Monoarfa ប្រកាសឲ្យដឹង នាថ្ងៃទី១៧ មករា ២០២២នេះ ចេញផ្សាយដោយទីភ្នាក់ងារសារព័ត៌មាន CNA។
លោកថា ឈ្មោះរដ្ឋធានីថ្មី ដែលមានន័យថា ប្រជុំកោះ ជាភាសាឥណ្ឌូនេស៊ីនេះ ត្រូវបានផ្តល់យោបល់ និងឯកភាព ដោយប្រធានាធិបតីរួចហើយ ដោយលោកថា ការឯកភាពនេះត្រូវបានធ្វើឡើង ក្នុងកិច្ចប្រជុំមួយ កាលពីចុងសប្តាហ៍។ លោកបន្ថែមទៀតថា មូលហេតុគឺដោយសារតែ Nusantara ត្រូវបានស្គាល់ជាយូរណាស់មកហើយ។
គួរបញ្ជាក់ថា គម្រោងប្តូររដ្ឋធានីហ្សាកាតានេះបានធ្វើឡើង ខណៈដែលរដ្ឋធានីហ្សាកាតា បច្ចប្បន្ន ចាំបាច់ត្រូវស្រោវស្រង់ពីការលិចទឹក និងការកកស្ទះចរាចរណ៍ ខណៈដែលហ្សាកាតា ជាតំបន់ស្ថិតនៅកោះជ្វាកំពុងតែសកម្មយ៉ាងខ្លាំងខាងសេដ្ឋកិច្ច៕
