រោងចក្រដេកាបូបនិងដេអាវពោងសម្រាប់ហែលទឹក១កន្លែង ត្រូវបានអគ្គីភ័យឆាបឆេះបំផ្លាញ ខណ:ពេលដែលកម្មករកម្មការីនីបានដល់ម៉ោងសម្រាកចេញមកហូបបាយថ្ងៃត្រង់
ហេតុការណ៍អគ្គីភ័យឆាបឆេះរោងចក្រនេះ បានកើតឡើងនាវេលាម៉ោង១១និង២០នាទីថ្ងៃត្រង់ នៅចំនុចខាងកើតផ្លូវជាតិលេខ៣ ក្នុងភូមិស្រង៉ែ ឃុំឌត្តមសូរិយា ស្រុកត្រាំកក់ខេត្តតាកែវ ។
បើតាមសម្តីកម្មកររោងចក្ររបស់ក្រុមហ៊ុនអៅដរហ្គៀរ បានអោយដឹងថា រោងចក្រនេះដេកាបូបយួ និងអាវពោងសម្រាប់ពាក់ហែលទឹក ហើយមានថៅកែជាជនជាតិចិន ជាអ្នកគ្រប់គ្រង ដោយរោងចក្រនេះមានកម្មករ កម្មការីនីសរុបចំនួន១៣៩៦នាក់ ក្នុងស្រី១១២២នាក់ ។
កម្មករកម្មការីនីរោងចក្រខាងលើបានបន្តទៀតថា នៅពេលបងប្អូនយើងកំពុងតែហូបបាយខាងក្រៅរោងចក្រនោះ ស្រាប់តែមានការភ្ញាក់ផ្អើលឆោឡោឡើង ហើយឃើញផ្សែងខ្មៅខ្មួលខ្មាញ់ឆេះកន្លែងដាក់សម្ភារ:ពីខាងត្បូង ដោយមិនមាននរណាជួយកើតឡើយ ឆេះជិតកន្លះម៉ោងទើបមានឡានទឹកទៅជួយបាញ់ពន្លត់ តែដោយសារក្នុងរោងចក្រសម្ភារៈសុទ្ធតែជាតិស្នោ និងជ័រនោះ ទើបធ្វើអោយអណ្តាតភ្លើងបានឆាបឆេះយ៉ាងឆាប់រហ័សសន្ធោសន្ធៅបែបនេះ រហូតមកដល់ម៉ោង៣រសៀលនេះទៅហើយ អណ្តាតភ្លើងនៅតែបន្តឆាបឆេះដោយរថយន្តពន្លត់អគ្គីភ័យមិនទាន់គ្រប់គ្រងបានទៅឡើយទេ ។
ចំពោះករណីឆេះខាងលើនេះ ខាងយើងនៅមិនទាន់ដឹងថា ឆេះរោងចក្រមួយនេះដោយសារអ្វី និងឆេះអស់អ្វីខ្លះដែរ ៕
