នាយករដ្ឋមន្ត្រីថៃនឹងធ្វើទស្សនកិច្ចទៅអារ៉ាប៊ីសាអ៊ូឌីត ខណៈប្រទេសទាំងពីរមានបញ្ហាការទូតនឹងគ្នា
លោក ប្រាយុធ ចាន់អូឆា នាយករដ្ឋមន្ត្រីថៃនឹងធ្វើដំណើរទស្សនកិច្ចទៅកាន់ប្រទេសអារ៉ាប៊ីសាអ៊ូឌីតរយៈពេល ២ថ្ងៃ ចាប់ពីថ្ងៃអង្គារសប្ដាហ៍នេះ ខណៈទំនាក់ទំនងការទូតរវាងថៃ និងប្រទេសមជ្ឈិមបូព៌ាមួយនេះបានពើបប្រទះនឹងបញ្ហាជាមួយគ្នាអស់រយៈពេលជាង ៣០ឆ្នាំមកហើយ។
បើយោងតាមសេចក្ដីប្រកាសព័ត៌មានរបស់រដ្ឋាភិបាលថៃ ដែលចុះផ្សាយកាលពីថ្ងៃអាទិត្យ លោក ប្រាយុធ ត្រូវបានអញ្ជើញដោយរជ្ជទាយាទដ៏មានឥទ្ធិពលនៅអារ៉ាប៊ីសាអ៊ូឌីតគឺ ព្រះអង្គម្ចាស់ Mohammad bin Salman ដែលសារព័ត៌មានលោកខាងលិចភាគច្រើនហៅព្រះអង្គថា MBS។
នាយករដ្ឋមន្ត្រីថៃគ្រោងនឹងជួបជាមួយព្រះអង្គម្ចាស់ MBS ក្នុងគោលបំណង «ពង្រឹង និងលើកកម្ពស់ទំនាក់ទំនងទ្វេភាគីរវាងប្រទេសទាំងពីរ»។ នេះបើតាមការចុះផ្សាយពីប្រទេសថៃ។
រដ្ឋាភិបាលថៃបាននិយាយនៅក្នុងសេចក្ដីប្រកាសព័ត៌មានរបស់ខ្លួនថា៖ «ដំណើរទស្សនកិច្ចនេះជាទស្សនកិច្ចលើកដំបូងរបស់ប្រមុខរដ្ឋាភិបាលនៅក្នុងរយៈពេលច្រើនជាង ៣០ឆ្នាំ»។
ភាគីអារ៉ាប៊ីសាអ៊ូឌីតបាននិយាយថា ដំណើរទស្សនកិច្ចរយៈពេល ២ថ្ងៃនេះធ្វើឡើងក្រោយពេលដែលមាន «កិច្ចពិគ្រោះយោបល់គ្នា ដែលបង្កឱ្យមានលក្ខណៈក្នុងបញ្ចូលទស្សនៈគ្នាទៅវិញទៅមក ចំពោះបញ្ហាផ្សេងៗនៃការព្រួយបារម្ភរួម និងដើម្បីធានាឱ្យមានកិច្ចពិគ្រោះយោបល់គ្នា និងការសម្របសម្រួលគ្នា ក្នុងការផ្លាស់ប្ដូរទស្សនៈចំពោះបញ្ហាទាំងនេះ»។ នេះបើតាមការលើកឡើងរបស់ក្រសួងការបរទេសអារ៉ាប៊ីសាអ៊ូឌីត។
យ៉ាងណាមិញ ភាគីទាំងសងខាងមិនបានបញ្ជាក់ថា ថ្នាក់ដឹកនាំប្រទេសទាំងពីរនឹងពិភាក្សាគ្នាលើបញ្ហាអ្វីនោះឡើយ។
ភារធារីថៃប្រចាំរាជធានីរីយ៉ាដ ប្រទេសអារ៉ាប៊ីសាអ៊ូឌីត លោក Sathana Kashemsanta បានបង្ហាញពីសុទិដ្ឋិនិយមថា ថ្នាក់ដឹកនាំទាំងពីរនឹងជជែកគ្នាទទួលបានផ្លែផ្កាជាមិនខាន។ នេះបើតាមការលើកឡើងរបស់លោកប្រាប់ទៅកាន់សារព័ត៌មាន Arab News។
កន្លងមក នៅក្នុងរដ្ឋបាលរបស់លោក ប្រាយុធ រដ្ឋមន្ត្រីការបរទេសថៃ លោក ដន ប្រាមុដវិណៃ (Don Pramudvinai) ក៏បានធ្វើដំណើរទស្សនកិច្ចទៅកាន់ប្រទេសមជ្ឈិមបូព៌ាមួយនេះ កាលពីដើមឆ្នាំ២០២០ ក្នុងគោលបំណងពង្រឹងចំណងមិត្តភាពទ្វេភាគីរវាងប្រទេសទាំងពីរ។
ថៃ និងអារ៉ាប៊ីសាអ៊ូឌីតបានភ្ជាប់ចំណងការទូតជាមួយគ្នាតាំងពីឆ្នាំ១៩៥៧មក។ ប្រទេសទាំងពីរបានភ្ជាប់ទំនាក់ទំនងជាមួយគ្នាតាមរយៈសកម្មភាពពាណិជ្ជកម្ម ក៏ដូចជាការនាំចេញកម្លាំងពលកម្មពីថៃ ទៅកាន់ប្រទេសនេះ ហើយទំនាក់ទំនងរវាងអ្នកកាន់សាសនាអ៊ិស្លាមនៅថៃ ជាមួយនឹងអារ៉ាប៊ីសាអ៊ូឌីត។
យ៉ាងណាមិញ កាលពីឆ្នាំ១៩៨៩ មានអ្នកថែសួនជនជាតិថៃម្នាក់ ដែលបម្រើការនៅវាំងអារ៉ាប៊ីសាអ៊ូឌីត បានលួចគ្រឿងពេជ្រ ដែលគេហៅព្រឹត្តិការណ៍នេះថា ពេជ្រខៀវ (Blue Diamond Affair) របស់ព្រះអង្គម្ចាស់ប្រទេសនេះក្នុងតម្លៃសរុប ២០លានដុល្លារ។ បុរសរូបនេះបានធ្វើដំណើរទៅថៃ ហើយដឹកជញ្ជូនគ្រឿងអលង្ការទាំងនេះទៅថៃតាមកប៉ាល់។
ក្រោយៗមកលោកក៏បានចាប់ខ្លួន ពេលត្រលប់មកស្រុកថៃវិញ តែលោកបានលក់គ្រឿងពេជ្រទាំងនោះជាច្រើនមកហើយ។ បន្ទាប់ពីមានការចាប់ខ្លួន ប៉ូលិសថៃបានដកហូតដល់គ្រឿងអលង្ការបានមួយចំនួនមកវិញ ហើយឡើងយន្តហោះប្រគល់ឱ្យខាងអារ៉ាប៊ីសាអ៊ូឌីតវិញ។
យ៉ាងណាមិញ ខាងអារ៉ាបរកឃើញថា ត្បូងដែលជញ្ជូនមកវិញ មិនត្រឹមតែមិនគ្រប់ចំនួនទេ ថែមទាំងជាត្បូងក្លែងក្លាយទៀតផង។
ដោយសារតែមិនអស់ចិត្តនឹងខាងថៃ នៅឆ្នាំ១៩៩០ អារ៉ាប៊ីសាអ៊ូឌីតបានបញ្ជូនអ្នកធុរកិច្ចរបស់ខ្លួនមួយរូបមកស៊ើបអង្កេតដោយខ្លួនឯង តែក្រោយមកអ្នកធុរកិច្ចត្រូវបានបាត់ខ្លួន ហើយក្រោយមករកឃើញថាបាត់បង់ ស្របពេលដែលអ្នកការទូតអារ៉ាប៊ីសាអ៊ូឌីតចំនួន ៣រូប ត្រូវបានសម្លាប់នៅកន្លែងខុសគ្នា នៅយប់តែមួយ។
ឆ្លើយតបនឹងស្ថានភាពដូច្នេះ ចាប់តាំងពីពេលនោះមកអារ៉ាប៊ីសាអ៊ូឌីតបានទម្លាក់កម្រិតការទូតជាមួយថៃពីថ្នាក់ឯកអគ្គរាជទូត មកត្រឹមកម្រិតភារធារី ហើយទិដ្ឋាការសម្រាប់ពលករថៃក៏បានកាត់បន្ថយក្នុងចំនួនច្រើនផងដែរ។
បន្ទាប់ពីមានហេតុការណ៍កើតឡើង រដ្ឋាភិបាលថៃក៏ព្យាយាមទទូចក្នុងការធ្វើប្រក្រតីភាពប្រទេសទាំងពីរជាច្រើនលើកផងដែរ៕
ប្រភព៖ Aljazeera
