កូរ៉េខាងជើងធ្វើតេស្តបាញ់មីស៊ីលជាលើកទី៥ ស្របពេលគីម ជុងអ៊ុនចង់ពង្រឹងអានុភាពកងទ័ព
កូរ៉េខាងជើងបានធ្វើតេស្តបាញ់មីស៊ីលម្ដងទៀតហើយកាលពីថ្ងៃអង្គារនេះ ខណៈពេលដែលមេដឹកនាំកំពូលរបស់ប្រទេសកុម្មុយនិស្តមួយនេះគឺ លោក គីម ជុងអ៊ុន មានគោលបំណងក្នុងការពង្រឹងអានុភាពកងទ័ពប្រទេសរបស់ខ្លួន។
ការបាញ់មីស៊ីលនេះជា ការធ្វើតេស្តលើកទី៥ ហើយរបស់កូរ៉េខាងជើង គិតត្រឹមមួយខែដំបូង នៅឆ្នាំ២០២២។ បើយោងតាមប្រភពពីយោធាកូរ៉េខាងត្បូង កូរ៉េខាងជើងលើកនេះបាញ់មីស៊ីលគ្រូស (Cruise Missile) ចំនួន ២គ្រាប់ទម្លាក់ទៅកាន់សមុទ្រភាគខាងកើត។
ភាពប្រឈមមុខរវាងកូរ៉េខាងជើង នឹងភាគីកូរ៉េខាងត្បូង ក៏ដូចជាសហរដ្ឋអាមេរិកកាន់តែតឹងតែងឡើង ស្របពេលដែលលោក គីម បានអំពាវនាវឱ្យអ្នកវិទ្យាសាស្ត្រយោធារបស់ខ្លួនស្វែងរកបច្ចេកវិទ្យាថ្មីៗដើម្បីពង្រឹងអានុភាពកងទ័ពរបស់ខ្លួន។
ឆ្លើយតបនឹងស្ថានភាពនេះដែរ អ្នកនាំពាក្យក្រសួងការបរទេសអាមេរិកបានលើកឡើងថា ខ្លួនជ្រួតជ្រាបអំពីការបាញ់មីស៊ីលរបស់កូរ៉េខាងជើង តែខ្លួនរក្សាជំហរក្នុងការចរចាជាមួយទីក្រុងព្យុងយ៉ាង ក្នុងគោលបំណងរំសាយអាវុធនុយក្លេអ៊ែរទាំងស្រុងនៅឧបទ្វីបកូរ៉េ។
ខាងអាមេរិកបានបន្ថែមថា ខ្លួនក៏បន្តសម្របសម្រួលជាមួយសហគមន៍អន្តរជាតិក្នុងការទប់ស្កាត់ការអភិវឌ្ឍអាវុធទំនើបៗរបស់កូរ៉េខាងជើង។
កន្លងមកអង្គការសហប្រជាជាតិបានដាក់ទណ្ឌកម្មកូរ៉េខាងជើង ពាក់ព័ន្ធនឹងការបាញ់មីស៊ីលបាលីស្ទិក តែមិនមែនមីស៊ីលគ្រូសទេ។ ទណ្ឌកម្មទាំងនោះរាប់បញ្ចូលទាំងការរកស៊ីនានា ដែលនាំចំណូលចូលទៅកាន់របបព្យុងយ៉ាង។ អាមេរិកនាពេលថ្មីៗនេះអំពាវនាវឱ្យដាក់ទណ្ឌកម្មថែម ចំណែកឯចិន និងរុស្ស៊ីអំពាវនាវឱ្យបន្ធូរបន្ថយទណ្ឌកម្មមួយចំនួនដល់ប្រទេសមួយនេះ៕
ប្រភព៖ Reuters
