លោកចូ បៃដិនថានៅមាន «កន្លែងច្រើនសម្រាប់ការទូត» ដើម្បីដោះស្រាយវិបត្តិអ៊ុយក្រែន
លោកចូ បៃដិនបាននិយាយថានៅមាន «កន្លែងច្រើនសម្រាប់ការទូត» ដើម្បីដោះស្រាយវិបត្តិអ៊ុយក្រែន ដោយការលើកឡើងបែបនេះជំរុញក្ដីសង្ឃឹមថា នៅមានពេលវេលាសម្រាប់កិច្ចពិភាក្សា ដែលនឹងនាំឱ្យរុស្សីដកថយទាហានជិតព្រំដែនអ៊ុយក្រែន។
ក្នុងការថ្លែងសុន្ទរកថាកាលពីថ្ងៃអង្គារ ទី១៥ កុម្ភៈ ពីសេតវិមាន លោកបៃដិនបាននិយាយថារុស្សីបានប្រមូលផ្ដុំទាហានប្រមាណ ១៥០.០០០នាក់នៅព្រំដែនជាមួយប្រទេសអ៊ុយក្រែន ហើយនៅតែឈរជើង «នៅកន្លែងបង្កការគំរាមកំហែង» ដោយការវាយប្រហារនៅតែអាចកើតឡើង។ បើទោះជាយ៉ាងនេះក៏ដោយលោកបៃដិនបានជៀសវាងការប្រើប្រាស់ល្បះ «ការវាយប្រហារនឹងកើតឡើងឆាប់ៗនេះ» ដូចដែលមន្ត្រីអាមេរិកដទៃទៀតបានប្រើប្រាស់ក្នុងរយៈពេលប៉ុន្មានថ្ងៃចុង។
លោក បៃដិនបាននិយាយថា «យើងគួរតែផ្ដល់ឱកាសគ្រប់បែបយ៉ាងដើម្បីឱ្យមធ្យោបាយការទូតជោគជ័យ»។ ហើយខ្ញុំជឿថាមានវិធីពិតប្រាកដក្នុងការដោះស្រាយកង្វល់សុវត្ថិភាពរៀងៗខ្លួន»។
លោកនិយាយថាសហរដ្ឋអាមេរិកនៅមិនទាន់អាចបញ្ជាក់បានទេថារុស្សីកំពុងដកទាហានទៅមូលដ្ឋានពួកគេវិញ ដូចដែលក្រុងមូស្គូបានប្រកាសកាលបីដើមថ្ងៃនោះ។
ការថ្លែងសុន្ទរកថារបស់លោកបៃដិន ធ្វើឡើងនៅការបញ្ចប់នៃថ្ងៃមួយដែលពោរពេញទៅដោយសកម្មភាពការទូតដ៏មមាញឹកដើម្បីកាត់បន្ថយភាពតានតឹងដែលអាចឈានដល់ការផ្ទុះសង្គ្រាម។
បន្ទាប់ពីជំនួបពិភាក្សាជាបីម៉ោងជាមួយអធិការបតីអាល្លឺម៉ង់លោកអូឡាហ្វ សូល ប្រធានាធិបតីរុស្សីលោកវ្ល៉ាឌីមៀរ ពូទីនបានធ្វើការប្រកាសថាក្រុងមូស្គូនឹងចាប់ផ្ដើមដកទាហានមួយចំនួនចេញពីតំបន់ព្រំដែនជាមួយអ៊ុយក្រែន ដើម្បីបើក «កិច្ចសន្ទនា» ជាមួយខាងលិច ខណៈពេលដែលសម្ពាធយោធាសឹងតែនៅដដែល។
លោកពូទីន និយាយថាលោកយល់ព្រមធ្វើការពិភាក្សាលើការគ្រប់គ្រងមីស៊ីលនុយក្លេអ៊ែរចម្ងាយមធ្យម និងវិធានការពង្រឹងការទុកចិត្តជាមួយអាមេរិក និងណាតូ ប្រសិនបើពួកគេយល់ព្រមដោះស្រាយការព្រួយបារម្ភសន្តិសុខរបស់រុស្សី៕
