ភ្នំពេញ៖ នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព បានឱ្យដឹងថា កម្ពុជា បានបន្តបញ្ជូនកងទ័ពមួកខៀវប្តូរវេនចំនួន ២១៩នាក់ (ស្ត្រីចំនួន២៣នាក់) ចេញទៅបំពេញបេសកកម្មមនុស្សធម៌ ក្រោមឆ័ត្រអង្គការសហប្រជាជាតិ នៅសាធារណរដ្ឋអាហ្វ្រិកកណ្តាល។ កងទ័ពមួកខៀវកម្ពុជាទាំងអស់ បានចេញដំណើរតាមអាកាសយានដ្ឋានអន្តរជាតិភ្នំពេញ នៅរលៀលថ្ងៃទី២០ ខែកុម្ភៈ ឆ្នាំ២០២២។

នាយឧត្តមសេនីយ៍ សែម សុវណ្ណនី បានឱ្យដឹងទៀតថា នេះឆ្នាំទី៨ហើយ ដែលកម្ពុជា បានបញ្ជូនកម្លាំងទៅបំពេញបេសកកម្មនៅសាធារណរដ្ឋអាហ្វ្រិកកណ្តាល ហើយកងវិស្វកម្មពហុជំនាញលេខ៤៣២ ទទួលបានទំនុកចិត្ត និងភារកិច្ចពី អ.ស.ប ក្នុងការចូលរួមចំណែកស្វែងរកសុខសន្តិភាពជូនប្រទេសដែលរងដោយជម្លោះដូចបណ្តាកងមុនៗដែរ។

សូមជម្រាបថា កម្ពុជា បានបញ្ជូនកងទ័ពមួកខៀវប្តូរវេនទៅកាន់ប្រទេសជាច្រើន ដើម្បីបំពេញបេសកកម្មមនុស្សធម៌ ក្រោមឆត្រអង្គការសហប្រជាជាតិ ខណៈអំឡុងឆ្នាំ១៩៩២ អង្គការសហប្រជាជាតិ បញ្ជូនទាហានមួកខៀវច្រើនជាតិសាសន៍ មករៀបចំសន្តិសុខ និងការបោះឆ្នោតនៅកម្ពុជា ៕ ដោយ វណ្ណលុក