សម្តេចតេជោ៖ ខ្ញុំមិនចេញបញ្ជាណាមួយឱ្យប្រជាពលរដ្ឋខ្មែររស់នៅអ៊ុយក្រែន នាំគ្នារត់ចោលប្រជាជនអ៊ុយក្រែន នោះទេ
ភ្នំពេញ៖ ប្រមុខរាជរដ្ឋាភិបាលកម្ពុជា មានប្រសាសន៍ថា ខ្ញុំមិនចេញបញ្ជាណាមួយឱ្យប្រជាពលរដ្ឋខ្មែររស់នៅអ៊ុយក្រែន នាំគ្នារត់ចោលប្រជាជនអ៊ុយក្រែន នោះទេ ។ សម្ដេចថា ពលរដ្ឋដែលនៅក្រៅប្រទេសគួរកុំរត់ចោលប្រទេសដែលខ្លួនកំពុងនៅពេលគេជួបទុក្ខ គួររួមសុខរួមទុក្ខជាមួយគ្នា។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងបែបនេះ នៅក្នុងពិធីសម្ពោធដាក់ឱ្យប្រើប្រាស់ជាផ្លូវការអគារមន្ទីរពេទ្យមិត្តភាព កម្ពុជា-ចិន ព្រះកុសមៈ នៅព្រឹកថ្ងៃទី២១ ខែមីនា ឆ្នាំ២០២២ ។
សម្ដេចតេជោ ហ៊ុន សែន បានថ្លែងថា ការសម្រេចរបស់សម្ដេច គឺមិនចង់ឱ្យពលរដ្ឋរបស់កម្ពុជាចាកចេញពីប្រទេសដែលជួបការលំបាកនោះទេ ដោយថា ដើម្បីបង្ហាញនូវសាមគ្គីភាព និងការរួមសុខរួមទុក្ខជាមួយប្រទេសទាំងនោះ។
សម្តេចបន្តថា ជាក់ស្តែងស្ថានភាពសង្រ្គាមនៅអ៊ុយក្រែន មានពលរដ្ឋខ្មែរចំនួន ២៣គ្រួសារនៅទីនោះ ហើយសម្ដេច ពុំមានគោលការណ៍ណាមួយ ឱ្យជម្លៀសពួកគេចេញនោះទេ។ សម្ដេចបន្តថា៖ នៅពេលប្រទេសគេសុខ យើងនៅជាមួយគេ ក៏ប៉ុន្តែពេលគេមានការលំបាកបន្តិចបន្តួចយើងបែរជារត់ចេញពីគេ។ រឿងនេះគឺទៅមិនរួចទេ។
សម្តេចតេចៅ នាយករដ្ឋមន្ត្រី ក៏បានរំលឹកដែរថា កាលពីមុនពេលផ្ទុះកូវីដ និស្សិតយើង បាននាំគ្នារត់ចេញពីប្រទេសចិន ហើយដល់ពេលឥឡូវ ចង់ទៅរៀនវិញ គឺមានការលំបាក ដូច្នោះយើងគួរកុំរត់ចោលគ្នា ៕ ដោយ វណ្ណលុក