Story ក្រោយខកខានប្រកួតអន្តរជាតិអស់រយៈពេលជាង២ឆ្នាំដោយសារតែវិបត្តិជំងឺកូវីដ១៩ កីឡាករប្រដាល់គុនខ្មែរជួមុខ ឡៅ ចិត្រា ទើបតែទទួលបានឱកាសជួបកីឡាករចិន ក្នុងកម្មវិធីប្រដាល់មិត្តភាពអន្តរជាតិ ស្តេចប្រដាល់អង្គរ នៅថ្ងៃទី១០ ខែ មេសា ឆ្នាំ២០២២ នៅមុខប្រាសាទអង្គរវត្ត ក្រុងសៀមរាប ខេត្តសៀមរាប។

ថ្លែងប្រាប់ទូរទស្សន៍អប្សរា ឡៅ ចិត្រា បានបញ្ជាក់ថា ប្រកួតជាលក្ខណៈឃីតបុកស៊ីងអាចមានឧបសគ្គខ្លះៗសម្រាប់រូបគេ ព្រោះមិនអោយប្រើកែង និងជង្គង់ ដូចគុនខ្មែរឡើយ។ ឡៅ ចិត្រា លើកឡើងទៀតថា ទោះបីឃីតបុកស៊ីងមិនមែនជាជំនាញដែលធ្លាប់ហ្វឹកហាត់ក៏ដោយ ប៉ុន្តែការប្រកួតនៅលើទឹកដីអង្គរខាងមុខនេះ មិនធ្វើឲ្យអ្នកគាំទ្រខកចិត្តឡើយ ពោលគឺប្រកួតឲ្យអស់ពីលទ្ធភាព ដើម្បីដណ្តើមជ័យជំនះ។

ឡៅ ចិត្រា បានបញ្ជាក់បន្ថែមថា កម្មវិធីស្តេចប្រដាល់អង្គរ ដែលកម្ពុជារៀបចំ សហការជាមួយចិនមួយនេះ ប្រសិនបើមានប្រកួតញឹកញាប់នៅកម្ពុជា កីឡាករប្រដាល់នឹងកើនឡើងសមត្ថភាពខ្លាំង ព្រោះព្រឹត្តិការណ៍ប្រដាល់អន្តរជាតិសម្បូរទៅដោយកីឡាករខ្លាំងៗ។

សូមបញ្ជាក់ ព្រឹត្តិការណ៍ប្រដាល់មិត្តភាពអន្តរជាតិ ស្តេចប្រដាល់អង្គរ នៅថ្ងៃទី១០ ខែមេសា ឆ្នាំ២០២២ នាមុខប្រាសាទអង្គរវត្ត កីឡាករ ឡៅ ចិត្រាជួបជាមួយកីឡាករចិន wei Weiyang ប្រកួតឃីតបុកស៊ីងលើប្រភេទទម្ងន់៦៥គីឡូក្រាម៕ អត្ថបទ៖ ជាវ ចន្ធូ