ភ្នំពេញ៖ ឯកអគ្គរដ្ឋទូតសហព័ន្ធរុស្ស៊ីប្រចាំកម្ពុជា លោក អាណាតូលី បូរ៉ាវីក បានស្នើឱ្យប្រជាជន និងរាជរដ្ឋាភិបាលកម្ពុជា គប្បីឈ្វេងយល់អំពីសង្គ្រាមរវាងរុស្ស៉ី និងអ៊ុយក្រែន ឱ្យបានច្បាស់លាស់ ដើម្បីជៀសវាងការយល់ខុសតាមការផ្សាយព័ត៌មានបំពុលរបស់បណ្ដាប្រទេសលោកខាងលិច។

ការស្នើនេះ បានធ្វើឡើងនៅក្នុងជំនួបពិភាក្សាជាមួយឯកឧត្តម ខៀវ កាញារីទ្ធ រដ្ឋមន្រ្ដីក្រសួងព័ត៌មាន កាលពីព្រឹកថ្ងៃទី១៣ខែមេសា ឆ្នាំ២០២២ នៅទីស្តីការក្រសួងព័ត៌មាន។

ឯកអគ្គរដ្ឋទូតសហព័ន្ធរុស្ស៊ី បានជម្រាបជូនរដ្ឋមន្ត្រីក្រសួងព័ត៌មានអំពីដើមចមដែលនាំឱ្យផ្ទុះសង្គ្រាមរុស្ស៉ី-អ៊ុយក្រែន គឺមកពីអង្គការអូតង់ ឬណាតូ (NATO/OTAN) និងមកពីប្រទេសអ៊ុយក្រែនខ្លួនឯង។ ដោយសារកន្លងមក ប្រទេសជាសមាជិកនៃអង្គការណាតូ ឬអូតង់ ចេះតែរំកិលចូលមកជិតព្រំដែនរុស្ស៉ី។ កន្លងមកនេះ រុស្ស៉ីបានសំណូមពរទៅកាន់អង្គការណាតូ ដោយអះអាងថា ប្រសិនបើមានមីស៊ីលដាក់ក្នុងប្រទេសអ៊ុយក្រែន គឺប្រហែលតែជាង៣នាទី គឺបាញ់ដល់ទីក្រុងម៉ូស្កូហើយ ដែលសូម្បីតែប្រព័ន្ធការពារអាកាសរបស់រុស្ស៉ីក៏គ្មានលទ្ធភាពទប់បានដែរ។ ដូច្នេះរុស្ស៉ីបានស្នើឱ្យប្រទេសអ៊ុយក្រែន ត្រូវស្ថិតនៅអព្យាក្រឹត្យមិនចូលបក្សសម្ព័ន្ធ។ លោកអាណាតូលី បូរ៉ាវីក បានបញ្ជាក់ថា ដោយសារតែមានការរំលោភបំពានជាញឹកញាប់របស់ក្រុមជ្រុលនិយមអ៊ុយក្រែន ទៅលើប្រជាជនរុស្ស៊ីនៅក្នុងតំបន់គ្រីមៀរ និងតំបន់ដុងបាស់ បានធ្វើឱ្យប្រជាជនរស់នៅតំបន់នោះបានទាមទារយកស្វ័យភាពរបស់ខ្លួន។ទីបំផុតក្រោយពីកិច្ចចរចាជាច្រើនលើកច្រើនសាមិនបានទទួលលទ្ធផលមកនោះ ទើបរុស្ស៉ីបានបង្ខំចិត្ដដើម្បីបើកប្រតិបត្តិការយោធាដើម្បីកម្ចាត់ចេញនូវគ្រោះឧបសគ្គដែលបានគំរាមកំហែងដល់ប្រទេសរុស្ស៉ី។

លោកបានលើកឡើងថា ទាក់ទងនឹងបញ្ហាសង្គ្រាមរុស្ស៉ី និងអ៊ុយក្រែន គឺបណ្ដាប្រទេសលោកខាងលិចបានផ្សាយបំពុលនូវព័ត៌មានជាច្រើន ដែលបានផ្សាយអំពីសកម្មភាពរបស់កងទ័ពរុស្ស៉ី ដែលជាការភូតកុហកជាច្រើន។ ទន្ទឹមនេះ បណ្ដាប្រទេសលោកខាងលិចបានខិតខំហ៊ុមព័ទ្ធសេដ្ឋកិច្ច និងបានបិទប្រព័ន្ធផ្សព្វផ្សាយរបស់រុស្ស៉ីទាំងអស់ ប៉ុន្ដែគេមិនបានបិទប្រព័ន្ធបំពង់ប្រេងរបស់រុស្ស៉ីនោះទេ។តែទោះជាយ៉ាងនេះក្ដី រុស្ស៊ីនៅតែបំពេញកាតព្វកិច្ចរបស់ខ្លួន ដោយមិនបញ្ឈប់ការផ្គត់ផ្គង់ប្រេងនោះទេ ដោយសង្ឃឹមថានៅពេលខាងមុខប្រទេសទាំងអស់នឹងឈានដល់ដំណោះស្រាយមួយ បន្ទាប់ពីមានការចរចា និងមានផ្លែផ្កាបន្ដិចបន្ដួចនៅប្រទេសតួកគីនោះ។

ជាការឆ្លើយតប ឯកឧត្តម ខៀវ កាញារីទ្ធ បានសម្ដែងនូវការរីករាយ ដែលកន្លងមកនេះកម្ពុជា និងុស្ស៊ីបានពង្រឹងទំនាក់ទំនង និងកិច្ចសហការយ៉ាងល្អ ជាពិសេសលើវិស័យព័ត៌មានដែលបានដើរតួនាទីយ៉ាងសំខាន់ក្នុងការជំរុញទំនាក់ទំនងរវាងប្រទេសទាំងពីរ៕ 

ដោយ៖ ពលជ័យ