ការតវ៉ាទូទាំងប្រទេសធ្វើឡើង ខណៈលោក ម៉ាក្រុង និងអ្នកស្រី ឡឺប៉ែន ត្រៀមខ្លួនប្រកួតប្រជែង
បាតុកម្មទូទាំងប្រទេសបារាំងត្រូវបានធ្វើឡើងកាលពីថ្ងៃសៅរ៍ នៅពេលដែលក្រុមប្រឆាំងបេក្ខជនស្កាំជ្រុលនិយមអ្នកស្រី ម៉ារីន ឡឺប៉ែន (Marine Le Pen) ស្វែងរកការបង្កើតរណសិរ្សរួបរួមមួយ ដើម្បីការពារអ្នកស្រីពីការយកឈ្នះលោក អេម៉ាណូអែល ម៉ាក្រុង ក្នុងការបោះឆ្នោតប្រធានាធិបតីជុំចុងក្រោយនាថ្ងៃទី ២៤ មេសា ខាងមុន។
ប៉ូលីសបារាំងបានព្រមានពីឧប្បត្តិហេតុដែលអាចកើតមាន ខណៈក្រុមបាតុករបានប្រមូលផ្តុំគ្នាក្នុងទីក្រុងចំនួន ៣០។
សេចក្ដីថ្លែងការណ៍រួមមួយដែលអំពាវនាវឱ្យមានការតវ៉ា និងចុះហត្ថលេខាដោយក្រុមសិទ្ធិមនុស្ស សហជីព និងសមាគមរាប់សិបផ្សេងទៀត និយាយថា៖ «ក្រុមស្ដាំជ្រុលនិយមបានឈានទៅដល់ការបោះឆ្នោតប្រធានាធិបតីជុំទី២ ដោយកម្រិតនៃការគាំទ្រដែលមិនធ្លាប់មានពីមុនមក។ យើងបដិសេធមិនឱ្យក្រុមនេះឈ្នះអំណាច»។
ក្រុមដដែលថា ជ័យជំនះរបស់ក្រុមស្ដាំនិយម នឹងធ្វើឱ្យលទ្ធិប្រជាធិបតេយ្យ និងការប្រឆាំងនឹងការរើសអើងពូជសាសន៍ដួលចុះ ហើយកំហឹងចំពោះលោកម៉ាក្រុង មិនស្មើនឹងបេក្ខជនអភិរក្ស ឬស្ដាំជ្រុលនិយមនោះទេ។
អ្នកស្រី ឡឺប៉ែន ដែលប្រឆាំងនឹងអន្តោប្រវេសន៍ ច្រានចោលការតវ៉ានេះ ខណៈអ្នកប្រឆាំងលោក ម៉ាក្រុង ក៏គ្រោងនឹងធ្វើការតវ៉ានៅក្រុងប៉ារីសផងដែរ។ អ្នកស្រីនិយាយថា៖ «ការដែលប្រជាពលរដ្ឋតវ៉ាប្រឆាំងនឹងលទ្ធផលបោះឆ្នោត គឺអប្រជាធិបតេយ្យយ៉ាងខ្លាំង»។
លោក ម៉ាក្រុង ដែលជាអ្នកនយោបាយកណ្តាលនិយម បានឈ្នះតំណែងប្រធានាធិបតីក្នុងឆ្នាំ ២០១៧ បន្ទាប់ពីផ្តួលអ្នកស្រី ឡឺប៉ែន ភ្លូកទឹកភ្លូកដីនាពេលនោះ នៅពេលដែលអ្នកបោះឆ្នោតប្រមូលគ្នាគាំទ្រលោក។ ប៉ុន្តែលទ្ធផលបោះឆ្នោតជុំទី១អាណត្តិនេះ បានបង្កើតជាសមរភូមិប្រជែងមួយដ៏ធំ ពេលអ្នកស្រី ឡឺប៉ែន តាមកាន់តែប្រកិតនឹងលោកម៉ាក្រុង។
តាមការស្ទង់មតិភ្លាមៗបន្ទាប់ពីការបោះឆ្នោតជុំទី១ លោក ម៉ាក្រុង នឹងឈ្នះអ្នកស្រី ឡឺប៉ែន ក្នុងជុំទី២ទាំងប្រកៀកប្រកើយ។ យ៉ាងណាមិញ វាហាក់ដូចជាការគួរឱ្យភ្ញាក់ផ្អែលមួយសម្រាប់អ្នកស្រី ឡឺប៉ែន នៅពេលដែលលទ្ធផលនៃការស្ទង់មតិពីវិទ្យាស្ថានស្រាវជ្រាវ Ipsos-Sopra-Steria កាលពីថ្ងៃសុក្របង្ហាញថា លោក ម៉ាក្រុង នឹងឈ្នះអ្នកស្រីក្នុងសម្លេង ៥៦ ភាគរយទល់នឹង ៤៤ ភាគរយ ដែលជាការកើនឡើងវិញសម្រាប់ប្រធានាធិបតីរូបនេះ បើធៀបនឹងការស្ទង់មតិមុនៗ។ លោក ម៉ាក្រុង កំពុងតែទទួលបានការគាំទ្រយ៉ាងខ្លាំងពីអតីតប្រធានាធិបតីបារាំងលោក Nicolas Sarkozy និង François Hollande រួមជាមួយនឹងតារាៗ និងកីឡាករល្បីៗរាប់រយនាក់។
ប្រភព៖ The Guardian
