ភ្នំពេញ៖ របាយការណ៍របស់ក្រសួងកសិកម្ម រុក្ខាប្រមាញ់ និងនេសាទបានបង្ហាញថា រយៈ ពេលបី ខែដើមឆ្នាំ២០២២នេះ ការនាំចេញគ្រាប់ស្វាយចន្ទីស្រស់ ឬគ្រាប់ឆៅមិនទាន់កែច្នៃមានបរិមាណ ជាង ២៧ម៉ឺនតោន ធ្លាក់ចុះប្រហែល៤០ភាគរយ បើធៀបនឹងរយៈពេលដូចគ្នាឆ្នាំ២០២១ ស្រប ពេល ការនាំចេញគ្រាប់ស្វាយចន្ទីកែច្នៃមានបរិមាណ២១៣តោន កើនឡើងជាង៣០០ ភាគរយ។

បើតាមរបាយការណ៍ដដែលនេះ រយៈពេលបីខែដើមឆ្នាំនេះ កម្ពុជាបាននាំចេញគ្រាប់ស្វាយចន្ទី កែច្នៃចំនួន២១៣.៤១តោន កើនឡើង៣១១.៨៣ភាគរយ បើធៀបនឹងរយៈពេលដូចគ្នាឆ្នាំ២០២១ ក្នុងនោះនាំចេញទៅប្រទេសចិនចំនួន១២៣.៣៨តោន, ថៃចំនួន៧៦តោន, ជប៉ុនចំនួន១២.១០ តោន និងកោះតៃវ៉ាន់ចំនួន១.៩៣តោន។

ចំណែកការនាំចេញគ្រាប់ស្វាយចន្ទីឆៅចំនួន២៧១,៩៩៤.៤៨តោនធ្លាក់ចុះ៣៩.៦៧ភាគរយ ក្នុងនោះនាំចេញទៅប្រទេសវៀតណាមចំនួន២៧១,៩៨០.៩០តោន និងប្រទេសចិនចំនួន ១៣.៥៨តោន។

លោក អួន ស៊ីឡូត ប្រធានសមាគមស្វាយចន្ទីកម្ពុជា បានឱ្យដឹងថា ការបញ្ជាទិញគ្រាប់ ស្វាយចន្ទី ឆៅពីប្រទេសវៀតណាមបានធ្លាក់ជាងឆ្នាំមុន ព្រោះភាគច្រើនទីផ្សារគ្រាប់ស្វាយចន្ទីឆៅ ពឹងផ្អែកទៅ លើប្រទេសវៀតណាមស្ទើរតែ៩០ភាគរយ។

លោកបានជំរុញឱ្យមានការកែច្នៃគ្រាប់ស្វាយចន្ទីក្នុងស្រុកបន្ថែម ដើម្បីកសិករលក់បានក្នុងតម្លៃថ្លៃ ដោយមិនឆ្លងកាត់ឈ្មួញកណ្តាល។ តែយ៉ាងណាតម្លៃគ្រាប់ស្វាយចន្ទីឆ្នាំនេះមិនសូវល្អប៉ុន្មានទេ ដោយ គ្រាប់ស្ងួតលក់បានតែចន្លោះពី១,៣០០ ទៅ១,៥០០ដុល្លារក្នុងមួយតោន ខុសពីឆ្នាំមុន លក់ បានពីចន្លោះ១,៣០០ដុល្លារទៅ១,៦០០ដុល្លារក្នុងមួយតោន ដោយសារតែអាកាស ធាតុ ប្រែប្រួល ធ្វើឱ្យគ្រាប់ថយគុណភាពជាងមុន ខណៈទិន្នន័យនេះអាចនឹងធ្លាក់ចុះ១០ភាគរយ៕
ប្រភព៖ Freshnews ដោយ៖ ឈឹម ទីណា