នាយកប្រតិបត្តិ Twitter រងកំហឹងបុគ្គលិកក្នុងកិច្ចប្រជុំរបស់ក្រុមហ៊ុន ចំពោះការវាយប្រហាររបស់លោក Elon Musk
នាយកប្រតិបត្តិធ្វីតធឺរ លោក Parag Agrawal ព្យាយាមបំបាត់កំហឹងរបស់បុគ្គលិកក្នុងអំឡុងពេលកិច្ចប្រជុំពេញអង្គរបស់ក្រុមហ៊ុនកាលពីថ្ងៃសុក្រ ដែលបុគ្គលិកទាមទារចម្លើយចំពោះរបៀបដែលអ្នកគ្រប់គ្រងគ្រោងនឹងដោះស្រាយការការបញ្ឈប់ពីការងារទ្រង់ទ្រាយធំដែលលោក Elon Musk អាចធ្វើ។
កិច្ចប្រជុំនេះ ធ្វើឡើងបន្ទាប់ពីនាយកប្រតិបត្តិក្រុមហ៊ុនតេស្លាលោក Musk ដែលចុះកិច្ចព្រមព្រៀងតម្លៃ ៤៤ ប៊ីលាន ដុល្លារដើម្បីទិញក្រុមហ៊ុនធ្វីតធឺរ បានរិះគន់មិនឈប់នូវការអនុវត្តការសម្របសម្រួលមាតិការបស់ធ្វីតធឺរ និងនាយកប្រតិបត្តិកំពូល ដែលទទួលខុសត្រូវក្នុងការកំណត់ការបញ្ចេញមតិ និងគោលនយោបាយសុវត្ថិភាព។
ក្នុងកិច្ចប្រជុំផ្ទៃក្នុង នាយកប្រតិបត្តិនិយាយថា ក្រុមហ៊ុននឹងត្រួតពិនិត្យបុគ្គលិកប្រចាំថ្ងៃ ប៉ុន្តែវាឆាប់ពេកក្នុងការប្រាប់ពីរបៀបដែលកិច្ចព្រមព្រៀងទិញយកជាមួយលោក Musk នឹងប៉ះពាល់ដល់ការរក្សាការងារបុគ្គលិក។ តាមការចុះផ្សាយរបស់រ៉យទ័រដែលស្រង់សម្ដីប្រភពដឹងពីបញ្ហានេះ លោក Musk នឹងមិនធ្វើការសម្រេចចិត្តលើការកាត់បន្ថយការងារឡើយ រហូតទាល់តែលោកក្លាយជាម្ចាស់ក្រុមហ៊ុន។
បុគ្គលិកម្នាក់សួរលោក Agrawal ក្នុងអំឡុងកិច្ចប្រជុំថា៖ «ខ្ញុំធុញទ្រាន់នឹងការឮអំពីតម្លៃភាគហ៊ុនិក និងកាតព្វកិច្ចរបស់ម្ចាស់ភាគហ៊ុន។ តើអ្នកគិតយ៉ាងណាចំពោះលទ្ធភាពខ្ពស់ ដែលបុគ្គលិកជាច្រើននឹងមិនមានការងារធ្វើបន្ទាប់ពីកិច្ចព្រមព្រៀងបិទបញ្ចប់រួចរាល់»។ លោក Agrawal តបថា ធ្វីតធឺរតែងតែយកចិត្តទុកដាក់ចំពោះបុគ្គលិករបស់ខ្លួន ហើយនឹងបន្តធ្វើដូច្នេះ។
ក្នុងរយៈពេលប៉ុន្មានថ្ងៃថ្មីៗនេះ លោក Musk បានបង្ហោះសាររិះគន់ទៅលើមេធាវីកំពូលរបស់ធ្វីតធឺរ អ្នកស្រី Vijaya Gadde ដែលបង្កឱ្យមានការវាយប្រហារតាមអ៊ីនធឺណិតផ្តោតលើអ្នកស្រី។ បុគ្គលិកធ្វីតធឺរប្រាប់នាយកប្រតិបត្តិថា ពួកគេខ្លាចអាកប្បកិរិយាខុសឆ្គងរបស់លោក Musk អាចធ្វើឱ្យអាជីវកម្មធ្វីតធឺរមានអស្ថិរភាព និងធ្វើឱ្យប៉ះពាល់ដល់ផ្នែកហិរញ្ញវត្ថុពេលក្រុមហ៊ុនរៀបចំនិយាយទៅកាន់ពិភពផ្សាយពាណិជ្ជកម្ម។
យោងតាមក្រុមហ៊ុនស្រាវជ្រាវ Equilar លោកនាយកប្រតិបត្តិ Agrawal នឹងទទួលបានទឹកប្រាក់ប្រមាណ ៤២ លានដុល្លារ ប្រសិនបើលោកឈប់ក្នុងអំឡុងរយៈពេល ១២ ខែនៃការផ្លាស់ប្តូរការគ្រប់គ្រងនៅក្នុងក្រុមហ៊ុន។ ក្នុងកិច្ចប្រជុំកាលពីថ្ងៃសុក្រ លោក Agrawal ជំរុញឱ្យបុគ្គលិករំពឹងថា នឹងមានការផ្លាស់ប្តូរនាពេលអនាគតក្រោមការដឹកនាំថ្មី។
ប្រភព៖ Reuters
