មូលហេតុការទិញធ្វីតធឺររបស់លោក Elon Musk អាចធ្វើឱ្យចក្ខុវិស័យនៃសេរីភាពបញ្ចេញមតិរបស់វេទិកាធ្លាក់ចុះ
ក្នុងឯកសារផ្លូវច្បាប់មិនច្បាស់លាស់កម្រាស់ ៩៥ ទំព័រ ក្រុមហ៊ុនធ្វីតធឺរព្រមានទៅកាន់ម្ចាស់ក្រុមហ៊ុនតេស្លាលោក Elon Musk ថា «កុំប្រើអំណាចសន្ធឹកសន្ធាប់របស់អ្នកនៅលើវេទិកាប្រព័ន្ធផ្សព្វផ្សាយសង្គម ដើម្បីវាយប្រហារក្រុមហ៊ុន»។ នេះបើតាមការចុះផ្សាយរបស់កាសែតឌឺហ្កាឌៀន។
មហាសេដ្ឋីដ៏មានជាងគេបំផុតនៅលើលោក លោក Musk បានចុះហត្ថលេខាលើកិច្ចព្រមព្រៀង១លើការទិញយកក្រុមហ៊ុនចាបខៀវធ្វឺតធឺរក្នុងតម្លៃ ៤៤ ប៊ីលានដុល្លារកាលពីសប្តាហ៍មុនដោយបញ្ជាក់ថា លោកអាចបង្ហោះសារអំពីកិច្ចព្រមព្រៀងនេះ ដរាបណាសារនោះមិនធ្វើឱ្យខូចខាត ឬអ្នកតំណាងណា១របស់ក្រុមហ៊ុន។
ប៉ុន្តែមិនបានប៉ុន្មានផង ម្ចាស់ក្រុមហ៊ុនតេស្លា ដែលប្រសិទ្ធិនាមឱ្យខ្លួនឯងថាជា «អ្នកប្រកាន់យកសេវីភាពបញ្ចេញមតិដាច់ខាត»រូបនេះ បែរជាបង្ហោះសារដែលជាប់ទាក់ទងនឹងការរិះគន់បុគ្គលិកជាន់ខ្ពស់ក្រុមហ៊ុនធ្វីតធឺរ។ មិនត្រឹមតែប៉ុណ្ណេះ លោកថែមទាំងឆ្លើយឆ្លងជាមួយអ្នករៀបចំកម្មវិធីផតខែសនយោបាយម្នាក់ ដែលហៅប្រធានផ្នែកច្បាប់របស់ធ្វីតធឺរ អ្នកស្រី Vijaya Gadde ថាជា «អ្នកតស៊ូមតិលើការចាប់ពិរុទ្ធកំពូល»របស់ក្រុមហ៊ុន ទៀតផង។
មុនរឿងនេះកើតឡើង លោក Musk និយាយពេលប្រកាសពីកិច្ចព្រមព្រៀងទិញធ្វីតធឺរកាលពីសប្តាហ៍មុនថា៖ «ការបញ្ចេញមតិដោយសេរី គឺជាមូលដ្ឋានគ្រឹះនៃលទ្ធិប្រជាធិបតេយ្យដែលដំណើរការ ហើយធ្វីតធឺរគឺជាទីលានទីក្រុងឌីជីថល ដែលបញ្ហាសំខាន់សម្រាប់អនាគតរបស់មនុស្សជាតិត្រូវបានពិភាក្សា»។
លោកមហាសេដ្ឋី Musk ធ្លាប់មានប្រវត្តិចម្រូងចម្រាសលើការបង្ហោះសារនៅលើធ្វីតធឺរ ហើយការនិយាយរិះគន់របស់លោកលើអ្នកស្រី Gadde ជំរុញឱ្យមានការព្រួយបារម្ភមួយចំនួនអំពីការយល់ច្រឡំរបស់នាយកប្រតិបត្តិក្រុមហ៊ុនតេស្លារូបនេះ លើសេរីភាពបញ្ចេញមតិ។ ការព្រួយបារម្ភទាំងនោះ រួមបញ្ចូលទាំងការមិនការពារអ្នកប្រើប្រាស់ពីការរំលោភបំពាន សារស្អប់ខ្ពើម និងការគំរាមកំហែងតាមអ៊ីនធឺណិត ការអនុញ្ញាតមាតិកាជ្រុលនិយម និងលំហូនៃព័ត៌មានមិនពិតឬប្រឌិតនៅលើវេទិកានេះជាដើម។
អ្នកស្រី Jillian York សកម្មជនសេរីភាពនៃការបញ្ចេញមតិនិយាយថា៖ «ខ្ញុំគិតថាគំនិតរបស់លោក Musk អំពីការបញ្ចេញមតិដោយសេរីគឺផ្ទុយគ្នា និងភ្លីភ្លឺ»។ អ្នកស្រីបន្តថា៖ «ភាពដាច់ខាតនៅលើវេទិកាដូចជាធ្វីតធឺរ មិនបានគិតពីគ្រោះថ្នាក់ពិតប្រាកដដែលធ្វីតធឺរអាចបង្កឱ្យមានក្នុងនាមជាវេទិកាសកលនោះទេ ជាឧទាហរណ៍គឺការប្រើប្រាស់វេទិកានេះរបស់ពួកអាយស៊ីស ឬពួកស្ដាំជ្រុលនិយមជាដើម»។
អ្នកស្រី Deborah Brown អ្នកស្រាវជ្រាវសិទ្ធិឌីជីថល និងជាអ្នកតស៊ូមតិនៅអង្គការឃ្លាំមើលសិទ្ធិមនុស្ស និយាយកាលពីសប្ដាហ៍មុនថា៖ «សេរីភាពនៃការបញ្ចេញមតិ មិនមែនជាសិទ្ធិទាំងស្រុងនោះទេ ដែលនេះជាមូលហេតុដែលធ្វីតធឺរ ត្រូវការការវិនិយោគក្នុងកិច្ចខិតខំប្រឹងប្រែងដើម្បីការពារអ្នកប្រើប្រាស់ដែលងាយរងគ្រោះបំផុតរបស់ខ្លួន ឱ្យមានសុវត្ថិភាពនៅលើវេទិកា»។
អ្នកស្រី Brown បន្តថា៖ «ការផ្លាស់ប្តូរចំពោះគោលការណ៍ លក្ខណៈពិសេស និងក្បួនខ្នាតមិនថាតិច ឬច្រើន អាចមានផលប៉ះពាល់មិនសមាមាត្រ និងជួនកាលបំផ្លិចបំផ្លាញ រួមទាំងការជំរុញអំពើហិង្សាក្រៅវេទិកាផងដែរ»។
ស្រដៀងគ្នានេះដែរ លោក Michael Kleinman នាយកផ្នែកបច្ចេកវិទ្យា និងសិទ្ធិមនុស្សនៅអង្គការលើកលែងទោសអន្តរជាតិ បានលើកឡើងពីការព្រួយបារម្ភចំពោះធ្វីតធឺរ លើការសម្រេចចិត្តដែលអាចបំផ្លាញយន្តការអនុវត្តច្បាប់ ដែលរចនាឡើងដើម្បីសម្របសម្រួលដល់ការចែករំលែកសារស្អប់ខ្ពើម។ លោកនិយាយថា៖ «ធ្វីតធឺរនឹងធ្វើបិទភ្នែកចំពោះការបញ្ចេញមតិប្រកបដោយហិង្សា និងបំពានលើអ្នកប្រើប្រាស់ រួមទាំងស្ត្រី និងក្រុមមនុស្សដទៃទៀត»។
តាមរយៈភាពចម្រូងចម្រាសទាំងនេះ ក៏មានលទ្ធភាពផងដែរថា លោក Musk ប្រហែលជានឹងអនុញ្ញាតឱ្យបុគ្គលមួយចំនួនដែលត្រូវបានបិទពីលើវេទិកាជាអចិន្ត្រៃយ៍ ឱ្យត្រឡប់មកប្រើប្រាស់វិញ រួមទាំងអតីតប្រធានាធិបតីអាមេរិក លោក ដូណាល់ ត្រាំ ដែលបដិសេធថាលោកនឹងមិនវិលប្រើប្រាស់ធ្វីតធឺរវិញទេ។
មជ្ឈមណ្ឌលប្រឆាំងការស្អប់ខ្ពើមឌីជីថល ដែលជាក្រុមយុទ្ធនាការអាមេរិក-អង់គ្លេស និយាយថា ការអនុញ្ញាតឱ្យបុគ្គលដូចជាលោក ត្រាំ អ្នកវិភាគស្តាំជ្រុលនិយមអ្នកស្រី Katie Hopkins និងស្ថាបនិកវេបសាយទ្រឹស្តីសមគំនិតស្តាំជ្រុលនិយមអាមេរិក InfoWars លោក Alex Jones នឹងមានន័យថាច្បាប់សុវត្ថិភាពរបស់ធ្វីតធឺរ «មិនមានទៀតទេ»។
ធ្វីតធឺរគឺជាវេទិកាផ្ដល់ព័ត៌មានរហ័សដ៏ធំ ទោះបីជាអ្នកប្រើប្រាស់ប្រចាំថ្ងៃរបស់វាអាចទទួលបានព័ត៌មានពីវេទិកាដទៃក្ដី។ អ្នកដែលប្រើប្រាស់ធ្វីតធឺរភាគច្រើន គឺជាអ្នកនយោបាយ និងអ្នកមានឥទ្ធិពលតាមប្រព័ន្ធផ្សព្វផ្សាយ ដូចជាអ្នកសារព័ត៌មាន អ្នកអត្ថាធិប្បាយ តារាល្បីល្បាញ និងអ្នកនយោបាយជាដើម។
លោក Rasmus Kleis Nielsen នាយកវិទ្យាស្ថានរ៉យទ័រសម្រាប់ការសិក្សាផ្នែកសារព័ត៌មាន (RISJ) និយាយថា៖ «ការពិតដែលថាអ្នកនយោបាយ បុគ្គលមានអំណាច និងអ្នកវិភាគជាច្រើន គឺជាអ្នកប្រើប្រាស់ញឹកញាប់ មានន័យថា ធ្វីតធឺរគឺជាផ្នែកមួយដ៏សំខាន់នៃរបៀបវារៈនយោបាយ និងប្រព័ន្ធផ្សព្វផ្សាយត្រូវបានកំណត់»។
លោក Nielsen បន្តថា៖ «ក្នុងន័យនេះ ការគ្រប់គ្រងវេទិការដោយមហាសេដ្ឋីជំនួញដ៏សម្បូរបែប បង្កនូវបញ្ហាដូចគ្នាទៅនឹងបុគ្គលមានទ្រព្យសម្បត្តិស្តុកស្តម្ភ ធ្វើការគ្រប់គ្រងលើប្រព័ន្ធផ្សព្វផ្សាយព័ត៌មានដ៏មានឥទ្ធិពល ឬវេទិកាប្រព័ន្ធផ្សព្វផ្សាយសង្គមផ្សេងទៀត។ វាជាសំណួរនយោបាយថា តើប្រទេសនីមួយៗចង់គ្រប់គ្រងកម្មសិទ្ធិបែបណា»។
កិច្ចព្រមព្រៀងទិញក្រុមហ៊ុន មិនត្រូវបានគេរំពឹងថានឹងប្រឈមមុខនឹងការត្រួតពិនិត្យពីអាជ្ញាធរប្រកួតប្រជែងនៅក្នុងសហរដ្ឋអាមេរិកនោះទេ ប៉ុន្តែអ្នកនយោបាយកំពុងចាប់ផ្តើមដោះស្រាយសំណួរនៃបទប្បញ្ញត្តិអ៊ិនធឺណិត និងបញ្ហាជុំវិញសេរីភាពបញ្ចេញមតិដែលមាននៅក្នុងនោះ។
ក្នុងសារដែលបង្ហោះក្រោយកិច្ចព្រមព្រៀងមួយផ្សេងទៀតកាលពីសប្តាហ៍មុន លោក Musk បានសរសេរថា៖ «ការបញ្ចេញមតិដោយសេរី ខ្ញុំគ្រាន់តែចង់មានន័យថា ស្របទៅនឹងច្បាប់។ ខ្ញុំប្រឆាំងនឹងការចាប់ពិរុទ្ធដែលហួសពីច្បាប់»។
ការថ្លែងបែបនេះរបស់លោក ខណៈប្រទេសមួយចំនួនដូចជាអង់គ្លេស និងសហភាពអឺរ៉ុប នឹងដាក់ចេញច្បាប់ស្តីពីសុវត្ថិភាពលើអ៊ិនធឺណិត ដែលការពារអ្នកប្រើប្រាស់ពីមាតិកាដែលបង្កគ្រោះថ្នាក់ រួមទាំងមាតិកាខុសច្បាប់ជាដើម ដែលទាមទារឱ្យក្រុមហ៊ុនធ្វីតធឺរ មិនថាគ្រប់គ្រង ឬមិនគ្រប់គ្រងដោយលោក Musk ត្រូវតែទទួលយកច្បាប់ទាំងអស់នេះ។
ប្រភព៖ The Guardian
