ប្រមុខរាជរដ្ឋាភិបាលកម្ពុជា ប្រកាសពីកំណត់ត្រាជោគជ័យ ដោយថ្ងៃនេះ គ្មានអ្នកឆ្លងជំងឺកូដ សូម្បីតែម្នាក់
ភ្នំពេញ៖ ប្រមុខរាជរដ្ឋាភិបាលកម្ពុជា បានប្រកាសពីកំណត់ត្រាជោគជ័យថ្ងៃនេះ ដោយគ្មានអ្នកឆ្លងជំងឺកូដសូម្បីតែម្នាក់។ នេះបើយោងតាមសារជាសំលេងពិសេស របស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា នោល្ងាចថ្ងៃទី០៦ ខែឧសភា ឆ្នាំ២០២២ ។
សម្តេចតេជោ ហ៊ុន សែន មានប្រសាសន៍សង្កត់ធ្ងន់ថា ថ្ងៃទី៧ ខែឧសភា គឺជាកំណត់ត្រាលើកដំបូង នៅក្នុងរយៈពេលជាងមួយឆ្នាំ ដែលកម្ពុជារកមិនឃើញអ្នកឆ្លងជំងឺកូវីដ-១៩នោះទេ។ សម្តេចតេជោ ហ៊ុន សែន បន្តថា នេះគឺជាជោគជ័យរបស់កម្ពុជា ក្នុងការប្រយុទ្ធប្រឆាំងនឹងជំងឺកូវីដ-១៩ ហើយបើទោះបីជានៅថ្ងៃស្អែកនេះ មានអ្នកឆ្លងជំងឺកូវីដ-១៩ថ្មី ឬ មិនមានក្តី តែយ៉ាងហោចណាស់កម្ពុជាមានមួយថ្ងៃ គឺថ្ងៃទី៧ ខែឧសភានេះ ដែលមិនមានអ្នកឆ្លងជំងឺកូវីដ-១៩នោះឡើយ។
សម្តេចតេជោ ហ៊ុន សែន មានប្រសាសន៍បញ្ជាក់ថា រឿងនេះបានកើតឡើង បន្ទាប់ពីការសាកល្បងដ៏ខ្លាំងមួយ នៅក្នុងដំណាក់កាល នៃការបើកឱកាសឱ្យប្រជាជន បានដើរលេងចូលឆ្នាំ ដែលជាការបើកសាកល្បងដ៏ធំធេង ហើយដែលពុំធ្លាប់មាននៅក្នុងប្រវត្តិសាស្ត្រ ដែលមានអ្នកចូលរួមដើរលេងដ៏ច្រើនកុះករ។
សម្តេចតេជោនាយករដនឋមន្ត្រី មានប្រសាសន៍ថា ខ្ញុំសូមជំរាបជូនបងប្អូនជនរួមជាតិជាទីគោរពស្រលាញ់ថា ថ្ងៃនេះជាលើកដំបូង ក្នុងរយៈពេលចាប់តាំងពីថ្ងៃទី២០ ខែកុម្ភៈ ឆ្នាំ២០២១ ដែលព្រះរាជាណាចក្រកម្ពុជារបស់យើង ពុំមានករណីកូវីដកើតឡើងនោះទេ បានសេចក្តីថា ថ្ងៃនេះយើងពុំមានការឆ្លងសូម្បីមួយករណី គឺសូន្យករណី។
សូមជំរាបថា កម្ពុជារកឃើញអ្នកឆ្លងជំងឺកូវីដ-១៩ តែ ២ នាក់ទេ ខណៈអ្នកជំងឺជាសះស្បើយមាន ៥ នាក់ កាលពីថ្ងៃទី ៦ ខែឧសភា ម្សិលមិញ៕ ដោយ៖ វណ្ណលុក